‘दुई वर्ष झुलाएपछि त्रिविले भन्यो– काम हुँदैन, फेरि सुरुबाट पढ्नू'

A+ A A-

‘एउटा समस्या त झेलियो, यसबारे बोल्दा अर्कोतिर पनि समस्या पार्देलान्,’ डराएको भावमा धादिङकी एक विद्यार्थीले गुनासो पोखिन् । त्रिभुवन विश्वविद्यालयले दिएको प्रशासनिक झमेलालाई लिएर उनी आक्रोशित सुनिइन् ।

शिक्षा संकायअन्तर्गत रहेर स्नातक सकेपछि उनमा एलएलबी गर्ने इच्छा जाग्यो । कानुनको पनि ज्ञान लिनुपर्छ भन्दै उनले काठमाडौंको नेपाल ल क्याम्पसमा भर्ना गरिन् ।

२०७१ सालमा प्रथम वर्ष एलएलबीको परीक्षा फारम भर्दा जुरिस्प्रुडेन्स (३२१) र कम्पेरेटिभ ल एण्ड नेपलिज लिगल सिस्टम (३२४) विषयमा भरिन् । सोहीअनुसार उनले प्रवेशपत्रसमेत पाइन् र परीक्षा दिइन् । त्यसलगत्तै आएको नतिजामा उनलाई ‘पास’ देखायो ।

तर, २०७५ सालमा जब सबै वर्षको परीक्षाको प्रमाणपत्र आयो, परीक्षा दिएको भन्दा अलग विषयमा ‘पास’ भएको प्रमाणपत्र उनले पाइन् । तीनवर्षे एलएलबीको पढाइमा अन्य वर्षको नतिजा ठीक भए पनि प्रथम वर्षको भने बिग्रिएर आयो ।

प्रथम वर्षको प्रमाणपत्र हेर्दा उनले जुरिस्प्रुडेन्स र कम्पनी एण्ड कर्पोरेसन ल विषयमा उनले क्रमश: ३० र २० अङ्क पाएकी छिन् । परीक्षा नै नदिएको 'कम्पनी एण्ड कर्पोरेसन ल'मा उनले ५० पूर्णाङ्कमा २० अङ्क पाएकी छिन् । परीक्षा नै नदिएको विषयमा उनलाई पास भएको देखाइएको छ ।

यसरी प्रमाणपत्रमा आफूले फारममा उल्लेख नै नगरेको विषयमा उत्तीर्णाङ्क देखेपछि उनले तत्काल साथीहरूसँग सल्लाह गरिन् । सल्लाहबमोजिम क्याम्पस प्रशासनमा गएर उजुरी गरिन् । क्याम्पसले समेत माथिबाटै त्रुटि भएको आँकलन गर्दै त्रिविमा पुगेर सच्याउन मिल्ने बतायो ।

अब उनले आफूले गर्दै नगरेको गल्तीको सजाय झेल्न विवश हुनुपर्ने भयो । क्याम्पसले आस देखाएपछि उनी प्रमाणपत्र सच्याउन त्रिवि परीक्षा नियन्त्रण कार्यालय (पनिका) को दैलोसम्म पुगिन् । त्रिविले क्याम्पसको सिफारिस ल्याउन भन्यो ।

त्यसअघि क्याम्पसमै गएर सल्लाह गर्दा सिफारिसको कुरासमेत ननिकालेकोमा उनको चित्त दुखाइ छ । ‘अगाडि क्याम्पसमै जाँदा त्यति भनिदिएको भए मैले दोहोरो दु:ख त पाउने थिइनँ,’ उनले भनिन् ।

क्याम्पसबाट सिफारिस लिए पनि त्रिविमा उनलाई काम गर्न सहज भएन । प्रवेशपत्रअनुसार प्रमाणपत्र सच्याई पाऊँ भन्दै उनी पनिकाको कानुन गोप्य शाखामा गइन् । १२ फागुन २०७५ मा आवश्यक कागजातसहित दर्ता नं. १२२६३ मा उनको निवेदन दर्ता भयो ।

निवेदन दर्तापछि परीक्षा नियन्त्रकसहितको टोलीले जाँचबुझ गरेपछि खबर गर्ने भन्दै पठाइएको उनी बताउँछिन् । त्यसअघि पनि कहिले सात नम्बर, कहिले अन्य कोठा धाउँदाधाउँदै उनी वाक्क भइसकेकी थिइन् । ‘तपाईंको समस्या समाधान हुन समय लाग्छ । हामी सल्लाह गरेर काम भएपछि खबर गर्छौं,’ गोप्य शाखाका कर्मचारीलाई उद्धृत गर्दै उनले बताइन् ।

पनिकाले खबर गर्ने भनेपछि उनी आफ्नो घर धादिङ आइन् । तर, पनिकाबाट खबर आएन । तत्काल काठमाडौं आएर बुझ्न पनि उनलाई घरेलु कामले फुर्सद मिलेन । घरमा बालबच्चा भएकाले छोडेर जान नमिलेको उनी बताउँछिन् ।

२०७५ मा दिएको उक्त निवेदनको समय गुज्रिएको भनेपछि पुन: २०७७ मा सोही प्रक्रियाअनुसार उनले निवेदन दिइन् । उनका अनुसार निवेदन, प्रवेशपत्र, वास्तविक मार्कसिट र एलएलबी प्रथम वर्षको परीक्षा तालिकालगायतका कागजपत्र गोप्य शाखामा बुझाउनुपरेको थियो ।

दोस्रोपटक निवेदन दिँदा पनि पहिलेको जस्तै खबर गर्ने भन्दै उनलाई फर्काइयो । ‘त्यसपछि पनि कुनै खबर आएन । मैले एक महिनापछि सम्पर्क गर्दा काम नै अघि बढेको छैन भन्ने जवाफ पाएँ,’ उनले शिलापत्रसँग भनिन्, ‘परीक्षाको कामले गर्दा व्यस्त छौँ भनेर गोप्यशाखाको कसैले भन्नुभएको थियो ।’

पछि लगभग छ/सातपटक परीक्षा नियन्त्रण कार्यालय गएको उनी सम्झिन्छिन् । त्यसबेला विशेषगरी गोप्य शाखाका कर्मचारीले झर्कोफर्को गरेको उनले बताइन् । ‘उल्टै मेरै गल्तीजस्तो गर्थे त्यहाँका कर्मचारी । जबकि उसैले मेरो भरिएको फारमभन्दा उल्टो विषयमा अङ्क हालेर उसैले प्रमाणपत्र पठाएको थियो,’ उनले भनिन् ।

२०७१ मा परीक्षा भए पनि सबै वर्षको परीक्षा सकिएपछि २०७५ मा आएर उनले प्रमाणपत्रमा गलत विषय उल्लेख भएको थाहा पाइन् । जुन समस्या आजसम्म हल भएको छैन । आफैँ बुझ्न जाँदा पनि अन्त्यमा पनिकाले ‘फेरि सुरुबाट पढ्नू’ भनेर फर्काइदिएको उनी बताउँछिन् ।

पनिकाको जवाफले कानुनमा थप अध्ययन गर्ने उनको हुटहुटी मरेको छ । ‘कि यतिबेला यसरी काम हुन्छ भनेर भनिदिनुपर्छ । कि सूचना दिनुपर्छ,’ उनले भनिन्, ‘फारम भरेको भन्दा अर्कै विषयमा प्रमाणपत्र आउनुमा मेरो के गल्ती थियो ? त्यसपछि त मैले पढ्ने मौकै पाइनँ, एलएलबी गर्ने सपना मार्नुपर्‍यो ।’

प्रकाशित मिति: सोमबार, फागुन २, २०७८ ०८:१५