शिरमा चन्द्रमा बोकेर कसैले प्रेम प्रस्ताव राख्यो

A+ A A-

प्रियसी !

संसारका सारा राता गुलाफहरू तिमी आउने प्रतीक्षामा फुलिरहेको देखेँ । हेर मैले के देखेँ सपना ? हेर्दाहेर्दै लालीगुराँसका फूलहरूले पखेरा भरिए, ताकि तिम्रो शिरमा ताज बन्न पाऊन् ।

धर्तीको इन्द्रावती तिम्रो यादमा लोलाएको छ आज । मानौँ, सीताको एक पल दर्शनका लागि अयोध्याबाट श्रीराम जनकपुरधामको बगैँचामा टहलिएका छन् ।

मजनु जरुर आउनेछन्, लैला उनकै प्रतीक्षामा छिन् । उकालीमा मजनुले थकाइ मेट्लान्, लैलाले बाटोभरि चौतारी बनाइदिएकी छिन् । किन आज हावाका हरेक स्पर्शहरूमा मजनुको प्यार भेटिएको छ लैलालाई ?

मदनले धेरै पैसा कमाएछन् ल्हासामा यसपालि । सबै गर्जो चुकाएछन्, साहु महाजनको । मुनाको नयाँ चोली पनि फेरियो । मदन घर फिर्दा आँगन उज्यालो भएको छ । ऐना हेर्दै एक्लै मुस्कुराइरहेकी मुनालाई हेरेर मदन दंग छ ।

हाउ फन्नी ! म पनि हाँसेछु सपनामै ।

जुरुक्क उठेँ । अम्खोराको पानी रित्तियो । कोल्टे फेरेँ, अनि फेरि निदाएछु ।

आहा ! सुरिलो बाँसुरी बज्यो र धुन पच्छ्याउँदै कुदिन् राधा । कृष्णको असीम प्यारमा डुबुल्की मार्नु नै छ आज उनलाई । कृष्ण काले, मनै हर्ने बाँसुरी, बनै हर्ने धुन । म पनि हराउँदै गएँ प्रेमिल जोडीहरूका भावहरूमा ।

‘आहा ! हेर त प्रेम र समर्पण ?,' कानमै आएर कोही बोल्यो, 'कृष्णको बाँसुरी राधामा समर्पित, मदनको ल्हासा मुनामा समर्पित, रामको वनबास सीतामा समर्पित । के तिमी मलाई प्रेम गर्छौ ? के तिम्रो प्रेममा समर्पण छ ?'

मखमली सप्को, लालुपाते ओठमा उषाको रंगीन लाली, शिरमा चन्द्रमा बोकेर कसैले प्रेम प्रस्ताव राख्यो । यो हृदयको उजाड मरुभूमिमा कहिल्यै नओइलाउने मखमली फुले । सुकेर बगर बनेका किनाराहरूमाथि रहरको सागर उर्लियो । तोरीका फूलमा मौरीजस्तै फुरुङ्ग भयो परानी ।

‘भन किन आयौ ? हृदयको मुस्कान यत्रतत्र पोखेर के गर्न खोजेको ?,' मैले सोधेँ ।

‘आकाशको जून पनि बेलाबेला फूल भेट्न ओर्लन्छ धर्तीमा ।'

‘मरुभूमिमा फूलहरू फुल्दैनन्,' मैले सटिक उत्तर दिएँ ।

म डुबिसकेको थिएँ उनका आँखाका गहिराइहरूमा, हराइरहेको थिएँ बगैँचामा भमरा हराएजस्तै ।

एक्कासि रात उठ्यो र भन्यो, 'दियोजस्तो नबन, बाती गुमाउनुपर्छ । फूल किन बन्छौ नियति नै ओइलाउनु हो ।बस तिमी बन्छौ भने याद बन । नमेटिने स्मृति बन, एउटा स्पर्श बन । हावाका सिर्काहरूमाथि प्रियजनको बासना पहिल्याऊ, झरीका रुझानमा स्पर्श खोज ।'

'के तिम्रो मनको वनमा कुर्लने सुस्केरा कृष्णको बाँसुरीको धुनभन्दा कम छन् ?'

ओहोः रातले बुझेछ क्यारे प्रेमीहरूको छातीमा ब्रह्मास्त्र बर्सेको । झसङ्ग भएँ, अब निन्द्रा लागेन । मोबाइल खोले ? आज प्रेमदिवस पो रै'छ ।

प्रेमिकालाई सन्देश लेखेँः नल–दमयन्ती, लैला–मजनु, जुलियट रोमियो, राम–सीता, राधा–कृष्णको पवित्र प्रेमझैँ युगयुग बाँचिरहोस्, हाम्रो प्रेम । प्रेमदिवसको शुभकामना प्रियसी ।

प्रकाशित मिति: सोमबार, फागुन २, २०७८ ०६:५६