जब मेस्सीले फुटबलबाट सन्न्यास लिए

A+ A A-

सन् २०१६ को कोपा अमेरिका कपको फाइनलमा चिलीसँग पेनाल्टी सुट आउटमा पराजित भएपछि मेस्सीले राष्ट्रिय टोलीबाट सन्न्यास लिने घोषणा गरेका थिए । त्यसको आज ठीक तीन वर्ष पुगेको छ ।

राष्ट्रिय टोलीबाट सन्न्यास लिए पनि समर्थकदेखि राष्ट्रपतिसम्मको आग्रहपछि उनी पुनः राष्ट्रिय टोलीमा फर्किए । उनले सन् २०१८ को विश्वकपमा अर्जेन्टिनालाई छनोट गराए भने यसपटक फेरि अर्जेन्टिना कोपा अमेरिका कपको क्वार्टरफाइनलमा पुगेको छ ।

‘यो मेरो चौथो फाइनल हो र म थाकें,’ अमेरिका कपको फाइनलमा चिलीसँग पराजित भएपछि सन्न्यास लिँदै उनले भनेका थिए, ‘मैले धेरै कुरा सोचेको हुन्छु तर प्राप्त भइरहेको छैन त्यसैले अब यही बिट मार्ने सोचेको हुँ ।’

वर्तमान विश्व फुटबलको महान् खेलाडी हुन्, लियोनल मेस्सी । पाँचपटकका ‘बालोन डि’ओर’ विजेता मेस्सीले क्लब फुटबलमा अनगिन्ती रेकर्ड बनाएका छन् । स्पेनिस क्लब बार्सिलोनाबाट च्याम्पियन्स लिग, कोपा डेल रे, ला लिगा, क्लब विश्वकपसहित सबैजसो मुख्य उपाधि जितिसकेका उनले आफ्नै देश अर्जेन्टिनाका लागि भने केही जित्न सकेका छैनन् । सन् २००८ को बेइजिङ ओलम्पिकमा स्वर्ण पदक जित्नु नै उनले राष्ट्रिय टोलीबाट जितेको उपाधि हो ।

विश्व फुटबलमा चर्चित भएर पनि राष्ट्रिय टिमका लागि केही जित्न नसक्नुको पीडा मेस्सीमा असीमित देखिन्छ । पछिल्लोपटक अर्जेन्टिनाले सन् १९९३ मा कोपा अमेरिका कपको उपाधि जितेको थियो । मेस्सी नेतृत्वको अर्जेन्टिना यसअघि सन् २०१४ को विश्वकप तथा २०१५ र २०१६ को कोपा अमेरिका कपको उपविजेतामा सीमित भयो । त्यसअघि सन् २००४ र २००० मा पनि अर्जेन्टिना उपविजेता मात्रै बनेको थियो त्यसैले पनि विश्व फुटबलको हस्ती अर्जेन्टिनालाई कुनै न कुनै उपाधि जितेर घरेलु दर्शकलाई शान्त पार्नुपर्ने बाध्यता छ ।

अर्जेन्टिना पछिल्ला ११ वर्षमा चारपटक फाइनलमा पुगेर पराजित भएको छ ।

सन् २००५ मा राष्ट्रिय टोलीबाट डेब्यु गरेका उनी अर्जेन्टिनाका सर्वाधिक गोलकर्तासमेत हुन् । तर, अहिले आएर उनले अर्जेन्टिनाका लागि कुनै न कुनै उपाधि जितेर मात्रै फुटबलबाट बिदा लिने बताएका छन् ।

प्रकाशित मिति: शुक्रबार, असार १३, २०७६ ०४:३१