...अनि बोल्दाबोल्दै भक्कानिए मेयर जीसी

A+ A A-

पोखरा महानगरपालिकाका मेयर मानबहादुर जीसी गत साउनयता बिमारी छन् । १ साउनमा मस्तिष्कघात भएपछि काठमाडौं लगिएका उनी सहजै हिँड्डुल गर्न सक्दैनन् ।

१ साउनको घटनापछि शरीरको बायाँ भागमा समस्या छ । हिँड्डुल गर्न लौरीसँग एक जनाको सहायता चाहिन्छ । उनी नियमित फिजियोथेरापी गराइरहेका छन् । बिमार उनी आराम गर्नुको सट्टा सकेको काममा खटिएका छन् ।

महानगर आउजाउ, योजना निरीक्षणमा उनी हिँडिरहेका हुन्छन् । शुक्रबार पोखरा महानगरपालिकाको दसौँ नगरसभा थियो । मेयर जीसी त्यहाँ बोल्दाबोल्दै भावुक बने, रोए । ठट्टा गरिराख्ने मेयर जीसी बिमार भएयता परिवर्तन भएका छन् । उनी प्रायः भावुक नै रहँदै आएका छन् । उनी नगरसभामा सहभागी हुन पाएको भन्दै शुक्रबारको नगरसभामा भावुक भए । उनलाई गत २९ पुसमा कोरोना संक्रमण पनि पुष्टि भएको थियो ।

मृत्युलाई जितेर आएको भन्दै उनी भावुक बनेका हुन् । ‘म पनि कोभिड पीडित भएको कारणले यसरी भेटघाट हुन्छ, हुँदैन भन्ने लाइराखेको थियो, भेट हुन पाइयो,’ यति भनेपछि केहीबेर रोकिन्छन् । त्यसपछि उनका आँसु बग्छन् । बोल्न नसकी नसकी उनी कार्यक्रम टुंग्याउँछन् । रुँदै मेयर भन्छन्, ‘यति भन्दै नगरसभालाई सफल पारौँ भन्ने अनुरोध गर्न चाहन्छु । प्रमुख अतिथि आदरणीय मुख्यमन्त्रीलाई पनि धन्यवाद दिन चाहन्छु । किनकि समय निकालेर आइदिनुभयो...।’

कार्यक्रम टुंगिएपछि मुख्यमन्त्री कृष्णचन्द्र नेपाली पोखरेल मेयर जीसी भएको ठाउँमा पुग्छन् । उनले बिदाइ माग्दा मेयर जीसी ‘हवस्’मात्रै भन्छन् । त्यसपछि मुख्यमन्त्री पोखरेल निस्किन्छन् ।

बिरामी भएर उपचारपश्चात पोखरा फर्किएपछि उनको बोल्ने शैली पनि निकै परिवर्तन भएको छ । हरेक कुरालाई सतही रुपमा लिने र उट्पट्याङ तरिकाले बोल्ने शैली आजकल देखिँदैन ।

चार वर्षे कार्यकालमा सोचेजस्तो काम गर्न नसकेको स्वसमिक्षा उनी आफैँले पनि गरेको सम्बोधनमा देखियो । बाँकी अवधिमा केही उपयुक्त प्रस्ताव ल्याए त्यसलाई सहयोग गर्न महानगर तयार रहेको सुनाए ।

‘आफ्नो पालामा केही राम्रो काम गर्न पाएर छोड्न पाए हुन्थ्यो भन्ने हामीलाई पनि लागेको छ,’ उनले महानगरका अरु जनप्रतिनिधिसँग भने, ‘अन्तरआत्मादेखि नै यो काम राम्रो छ, गर्न सक्छौँ भन्ने लाग्छ र त्यस्तो उपयुक्त प्रस्ताव लिएर आउनुभयो भने महानगरपालिकाले सहयोग गर्न तयार छ ।’