एमसीसीमा पार्टीलाइनभन्दा फरक छ जनार्दनको धारणा

A+ A A-

एमसीसीको विषयमा खासै प्रतिक्रिया नदिएका अर्थमन्त्री जनार्दन शर्माले बजेटको अर्धवार्षिक समीक्षाका क्रममा भने स्पष्ट धारणा पेस गरे ।

कतिपय माओवादी नेताले एमसीसी राष्ट्रिय स्वाधिनता विपरीत भएको, इन्डोप्यासेफिक रणनीतिअन्तर्गत रहेको दाबी गरिरहेको सन्दर्भ र बिहीबार मात्रै माओवादी अध्यक्ष पुष्पकमल दाहाललले प्रधानमन्त्री शेरबहादुर देउवालाई भेटेर अहिलेकै अवस्थामा एमसीसी अनुमोदन गर्न नसकिने बताएको अवस्थामा शर्माको धारणालाई अर्थपूर्ण रुपमा हेरिएको छ ।

शर्माले अमेरिकी अनुदान सहयोग एमसीसी ऊर्जा र सडकमा मात्र काम गर्ने परियोजना भएको बताएका छन् । बजेटको अर्धवार्षिक समीक्षामा शर्माले भने 'एमसीसी ऊर्जा र सडकमा काम गर्ने परियोजना मात्रै हो ।'

प्रधानमन्त्री देउवा एमसीसीलाई निष्कर्षमा पुर्‍याउने गरी छलफलमा रहेकोले छिटै निष्कर्षमा पुग्ने बताउँदै आफू देउवाको लाइनमा रहेको स‌ंकेत उनको थियो ।

यद्यपि राजनीतिक मुद्दा बनिसकेको अवस्थामा सबै पार्टीसँग छलफल गरेर अघि बढाउनुपर्ने उनले बताएका छन् ।

यसअघि तत्कालीन नेकपाको केन्द्रीय समितिको बैठकमा तत्कालीन ऊर्जामन्त्री वर्षमान पुन र वन मन्त्री शक्ति बस्‍नेतले पनि एमसीसी परियोजना पास गर्नुपर्ने धारणा राखेका थिए ।

त्यस्तै अनौपचारिक छलफलका क्रममा ऊर्जा मन्त्री पम्फा भुसालले पनि ऊर्जाको विकासमा एमसीसी परियोजनाको महत्त्वपूर्ण भएको बताउने गरेको ऊर्जाका अधिकारीहरूले बताएका छन् ।

राजनीति रुपमा हानी पर्ने सक्‍ने भन्दै माओवादीले भने चुनाब अघि एमसीसीको विषयमा निर्णय लिन नहुने जनाएको छ । यथाअवस्थामा पास गर्न नसकिने माओवादीको आधिरकारिक धारणा रहेको छ ।

प्रकाशित मिति: बिहीबार, माघ २७, २०७८ २०:३०