राजनीतिक पहुँचका आधारमा त्रिविमा कक्षाकोठै नटेकेकालाई 'पासमार्क'

A+ A A-

त्रिभुवन विश्वविद्यालयमा कक्षाकोठामा एक दिन पनि उपस्थित नभई डिग्री लिने गरेको पाइएको छ । प्राय:जसो राजनीति गरिरहेका ‘विद्यार्थी नेता’हरूले यसरी डिग्रीको प्रमाणपत्र मिलाउने गरेको देखिएकाे छ ।

त्रिविको समाजशास्त्र केन्द्रीय विभागले गरेको मूल्यांकनलाई हेर्दा पनि उक्त कुरा पुष्टि हुन्छ । शिलापत्रलाई प्राप्त भएको चौथो सेमेस्टर–२०७८ को मूल्यांकन विवरणअनुसार ४३ जना विद्यार्थीमा तीन जनाले एक दिन पनि हाजिर नभई उत्तीर्णाङ्क पाएका छन् । जबकि त्रिविको नियमअनुसार सेमेस्टर प्रणालीमा विद्यार्थीको कक्षाकोठामा कम्तीमा ८० प्रतिशत हाजिर हुनैपर्छ ।

योगेन्द्र रावल, विष्णुप्रसाद घिमिरे र भोगेन्द्रप्रसाद चौधरीले कक्षामा एक दिन पनि उपस्थित नभई उत्तीर्णाङ्क पाएको देखिएको छ । रावल नेपाली कांग्रेसको भ्रातृ संगठन नेपाल विद्यार्थी संघमा आबद्धसमेत छन् । केही समयअघि उपप्राध्यापक प्रेम चलाउनेमाथि कुटपिट गरेको अभियोग रावलमाथि पनि लागेको थियाे ।

रावल, घिमिरे र चौधरीले कक्षाकोठामा हाजिर गरेबापत दिइने नम्बरमा शून्य नम्बर पाएका छन् । यसबाट ती विद्यार्थी कक्षाकोठामा उपस्थित नै नभएको बुझ्न सकिन्छ ।

विद्यार्थीहरूले हाजिरी भएको आधार, ‘टर्म पेपर’ र कक्षाकोठामा हुने अन्तर्क्रियामा भाग लिएबापत छुट्टाछुट्टै नम्बर पाउँछन् । शिलापत्रलाई प्राप्त उक्त कागजात केलाउँदा हाजिरका आधारमा दिइने नम्बरमा शून्य पाएका विद्यार्थीले अन्तर्क्रियालगायतमा भने उत्तीर्ण अंक पाएका छन् ।

‘कक्षामा उपस्थित नै नभई कक्षामा हुने अन्तर्क्रियामा कसरी पास भए ? यसबाट त्रिविले गर्ने मूल्यांकनमै प्रश्न उठ्छ,’ त्रिविकै एक अधिकारीले शिलापत्रसँग भने ।

मूल्यांकनको विवरणमा हाजिरमा शून्य पाएका योगेन्द्र रावलले ‘टर्म पेपर’ र अन्तर्क्रियामा क्रमश: २० र ४ अंक पाएका छन् । त्यस्तै, विष्णुप्रसाद घिमिरे र भोगेन्द्रप्रसाद चौधरीले पनि क्रमश: १७ र ३ अंक पाएका छन् ।

कांग्रेसनिकट रहेका रावलका सहपाठीका अनुसार पनि उनी प्रथम सेमेस्टरको कक्षामा आक्कलझुक्कल देखिन्थे । त्यसपछिका सेमेस्टरमा भने रावल कक्षाकोठाभित्र पढ्न नगएको उनीहरू बताउँछन् । त्यस्तै, अन्य कतिपय विद्यार्थी पनि पाहुनासरह कक्षाकोठामा उपस्थित हुन्थे ।

अर्कोतर्फ प्राय:जसो कक्षाकोठा गइरहने विद्यार्थीले भन्दा रावलजस्ता ‘विद्यार्थी नेता’ले धेरै नम्बर पाएको देखिएको छ । नियमित कक्षा जानेले भन्दा रावल, घिमिरे र चौधरीजस्ता विद्यार्थीलाई धेरै अंक दिइएको छ ।

‘कक्षामा आइरहने विद्यार्थीले भन्दा तिनीहरूले धेरै नम्बर कसरी पाए ? जबकि त्रिविमा ८० प्रतिशत हाजिर नभई विद्यार्थीले फारम पठाउनसमेत पाउँदैनन्,’ त्रिविका एक प्राध्यापकले भने ।

समाजशास्त्र संकायका विभागीय प्रमुख युवराज लुइँटेल पनि हाजिर नै नहुने विद्यार्थीको फारम नै रोकिने कुरा स्वीकार्छन् । तर, नम्बर दिने विषयमा भने कक्षा शिक्षक नै जिम्मेवार हुने भन्दै उनी पन्छिन खोजे । ‘नम्बर दिने विषय कक्षा शिक्षकको हातमा हुन्छ । हामीलाई यसबारे थाहा भएन,’ उनले शिलापत्रसँग भने ।

प्रकाशित मिति: बुधबार, माघ २६, २०७८ १८:११