'न बिर्से तिमीलाई..'को नयाँ भर्सनबारे बाेलिन् अन्जु पन्त– मेरै स्वरमा रिरेकर्ड गर्ने कुरा थियाे

'न बिर्से तिमीलाई..'को नयाँ भर्सनबारे बाेलिन् अन्जु पन्त– मेरै स्वरमा रिरेकर्ड गर्ने कुरा थियाे

फाेटाेः अन्जु पन्तकाे फेसबुकबाट ।

A+ A A-

चर्चित गजल ‘न बिर्से तिमीलाई न पाएँ तिमीलाई’ को ‘नयाँ भर्सन’बारे गायिका अन्जु पन्त बाेलेकी छन् । नयाँ भर्सन आउनु खुसीकै कुरा भए पनि यसअघिका गायक-गायिकाको नामै उल्लेख नगरी अफिसियल भनेर सार्वजनिक गरिनु दुखद् र अन्यायपूर्ण भएकाे उनकाे प्रतिक्रिया छ ।

गायिका रचना रिमालको आवाजमा ‘रिरेकर्ड’ भएको गीतको भिडियो ३ फेब्रुअरीमा ‘किरण क्रियसन युट्युब च्यानल’मार्फत सार्वजनिक भएको थियो ।

झण्डै ६ दिनपछि यो गजलको नयाँ भर्सनबारे अन्जुले फेसबुकमार्फत प्रतिक्रिया दिएकी हुन् । १० वर्षअघि विपिन किरणको शब्द तथा महेश खड्काको संगीतमा तयार गजलको फिमेल भर्सन अन्जु र मेल भर्सन जगदीश समालले गाएका थिए । त्यो बेला यो गजलले युट्युबमा सर्वाधिक भ्युज पाएको थियो ।

अहिले युट्युब, टिकटकलगायत सामाजिक सञ्जालको बढ्दो प्रभावमाझ विपिन किरणले नयाँ पुस्ताकी गायिका रचनाको आवाजमा पुन रेकर्ड गराएर गीत सार्वजनिक गरेका हुन् ।

अन्जुले गीत आफ्नै आवाजमा रिरेकर्ड गर्ने कुरा भएको समेत उल्लेख गरेकी छन् ।

‘आजसम्म पनि उत्तिकै सर्वाधिक लोकप्रिय रहेको उक्त गजललाई नयाँ गायक गायिकालाई फरक भर्सनमा गाउनु आवश्यक थियो कि थिएन त्यो विषयमा मेरो केही भन्नु छैन । केही समयअघि विपिन किरण भाइले यो गजलको नयाँ एरेन्जमा मेरो आवाजमा नै रिरेकर्ड गर्ने भन्नु भएको थियो र सोही अनुसार एरेन्जर महाराज थापाले गर्नुभएको नयाँ एरेन्ज पनि मलाई पठाउनु भएको थियो र हामी समयअनुकुल मिलाएर पुनः रेकर्ड गर्ने योजनामा थियौँ’, अन्जुले फेसबुकमा लेखेकी छन् ।

विपिनले आफूसँग कभरको रूपमा किड्स भर्सन नयाँ गायक, गायिकालाई गाउन दिने कुरा गरेको पनि उनले बताएकी छन् ।

अहिले रचना रिमालको स्वरमा नयाँ भर्सन आउँदा आफूलाई कुनै आपत्ति नभए पनि आफ्नो नाम नै उल्लेख नगरिएनुचाहिँ दुखद् र अन्यायपूर्ण भएको अन्जुको भनाइ छ । ‘के र कुन उद्देश्यका लागि यस्तो भयो, मलाई थाहा भएन । म एक व्यक्तिको कुराभन्दा पनि यो चलनले भोलिका दिनमा संगीत र कलाकारलाई दिने सम्मान र आदरको संस्कार नै पो भुल्न लागिरहेका छैनौँ भन्ने चिन्ता लागेको छ’, उनको फेसबुक पोस्टमा उल्लेख छ ।

साथै दर्शक स्रोताको मागअनुसार समाधानका उपाय निकाल्न पनि उनले सम्बन्धित पक्षलाई आग्रह गरेकी छन् । ‘भविष्यमा कोही पनि कलाकार अपमानित र अन्यायमा परेको अनुभूति गर्ने दिन कहिल्यै नआओस्’, अन्जुले लेखेकी छन् ।

न बिर्से तिमीलाई गजलको नयाँ भर्सनलाई लिएर गीतकार विपिनको आलोचना भइरहेको छ । उनीमाथि गीतको मर्म बिगारेको तथा वास्तविक गायक/गायिकालाई उपेक्षा गरेकाे आरोप छ । तर विपिन भने विवादलाई अनावश्यक भनिरहेका छन् । ‘गीत रिमेक वा नयाँ एरेन्जमा ल्याइएकाे भए अन्जु पन्त, जगदीश समालको नाम राख्नैपर्थ्याे । तर गीतमा पुरानै एरेन्जमा छ । याे नयाँ हाेइन नि', उनकाे तर्क छ ।

प्रकाशित मिति: बुधबार, माघ २६, २०७८ ०९:२०