काठमाडौंमा मौलाउँदै हनी ट्र्यापिङ, प्रहरीकै पूर्वएआईजीसहित पीडितहरू प्रहरी गुहार्दै

काठमाडौंमा मौलाउँदै हनी ट्र्यापिङ, प्रहरीकै पूर्वएआईजीसहित पीडितहरू प्रहरी गुहार्दै

A+ A A-

‘अदिती क्षेत्री’ नामको एउटा फेसबुक एकाउन्ट छ । फेसबुकको प्रोफाइल पिक्चरमा आकर्षक फोटो राखिएको छ । नुवाकोटका विदुर थापा (नाम परिवर्तन) लाई माघ पहिलो साता उनै अदितीको फ्रेन्ड रिक्वेस्ट आयो । थापाको बालाजुमा किराना पसल छ ।

ग्राहक नभएका बेला उनी पसलमै भए पनि सामाजिक सञ्जाल फेसबुक चलाउँछन् । सोही क्रममा थापालाई अदितीको फ्रेन्ड रिक्वेस्ट आएको हो । थापाले केही नसोची सहजै अदितीको रिक्वेस्ट एक्सेप्ट गरे ।

फेसबुकमा साथी भएको केही दिनदेखि नै उनीहरूबीच कुराकानी हुन थाल्यो । कुराकानीको सिलसिलामा भेटघाटहुँदै घुम्न जाने र रमाइलो गर्ने प्रस्तावसमेत अदितीले गरेकी थिइन् ।

अदितीको प्रस्तावबाट थापा हौसिए । फेसबुकमा साथी बनेको एक सातामै उनीहरूबीच भेटघाट भयो । अदितीकै प्रस्तावअनुसार उनीहरू घुमघाम गर्न बालाजु बाइपास क्षेत्र पुगे ।

त्यही मौकामा थापाले अदितीलाई होटलमा बस्ने प्रस्ताव गरे । अदितीले थापाको कुरामा नाइँनास्ती गरिनन् । सहमति जनाइन् । केही समय उनीहरू होटलमा बसे अनि सहमतिमै 'रासलीला' गरे । बालाजुबाट उनीहरू दुवै अबेर घर फर्किए ।

त्यो दिन थापा खुसी भएरै घर फर्किएका थिए । युवतीका बारेमा नराम्रो केही सोचेका थिएनन् ।

भोलिपल्ट एक्कासि थापालाई अपरिचित नम्बरबाट फोन आयो । थापाले हेलो भन्न नपाउँदै उताबाट प्रश्नको वर्षा भयो, ‘तपाईंले हिजो मेरो बहिनीलाई होटलमा लिएर के गर्नुभएको हो ? तपाईं मलाई भेट्नुहुन्छ कि कानुनी उपचार खोजौँ ?’

थापा छाँगाबाट खसेझैँ भए । ‘हजुर, म भेट्छु । कता आउनुपर्ने हो ?’ थापाले आत्तिँदै भने ।

अदितीका दाइले भेटका लागि थापालाई बालाजुमा बोलाए । भेटमा थापालाई १ लाख रुपैयाँ दिन दबाब दिए । नदिए बलात्कारको उजुरी प्रहरीमा दिने धम्की उनको थियो ।

थापाले पसलमा जम्मा गरेको १ लाख रुपैयाँ अदितीका दाइलाई दिएर छुट्टिए । उनलाई लागेको थियो– १ लाख दिएपछि त कुरा मिल्छ होला ।

तर, फेरि अर्को दिन पनि अदितीका दाइले त्यसरी नै धम्की दिँदै डेढ लाख रुपैयाँ मागे । थापाले बलात्कार मुद्दा खेप्नुभन्दा डेढ लाख रुपैयाँ दिनै ठीक ठाने । उनले त्यो डेढ लाख रुपैयाँ दिएको कागजसमेत गरे ।

तर, थापासँग पैसा माग्ने क्रम अझै रोकिएको छैन ।

थापालाई अदितीका दाइले १० लाख रुपैयाँ दिन धम्कीपूर्ण चेतावनी दिए । १० लाख नदिए प्रहरीकोमा बलात्कारको उजुरी दिने उनको भनाइ थियो ।

त्यसपछि थापा प्रहरीकोमा पुग्न बाध्य भएका छन् । थापा आफू ब्ल्याकमेलिङ अर्थात् ‘हनी ट्र्यापिङ’मा परेको भन्दै महानगरीय अपराध महाशाखामा पुगेका छन् ।

थापाको उजुरीपछि युवतीमाथि अनुसन्धान भइरहेको महाशाखाका एक प्रहरी अधिकारीको भनाइ छ । दाइ भनिएका व्यक्तिलाई प्रयोग गरेर युवतीले हनी ट्र्यापमा पारेर युवालाई रकम असुल्न प्रयोग गरेको खुलेको प्रहरीको दाबी छ ।

०००

थापाजस्तै रामेछापका सविन श्रेष्ठ (नाम परिवर्तन) पनि त्यसरी नै हनी ट्र्यापिङमा परेका छन् । उनी पनि फेसबुकमार्फत चिनजान भएकी योञ्जन थरकी युवातीको ट्र्यापमा परेका हुन् ।

योञ्जनसँग फेसबुकबाट चिनजान भएपछि श्रेष्ठ सहमतिमै सुन्धाराको एक होटलमा बस्न गएका थिए । तर, होटलबाट निस्कन नपाउँदै योञ्जनले आफ्नी दिदी पनि भेट्न आउन लागेको भन्दै श्रेष्ठलाई होटलमै केही समय कुराइन् ।

श्रेष्ठलाई भेट्न आउँछु भनेकी दिदीले उल्टै बहिनीलाई होटलमा ल्याएर के गरेको भन्दै ब्ल्याकमेलिङ गर्न थालिन् । योञ्जनकी दिदीले श्रेष्ठसँग त्यही बेला ७० हजार रुपैयाँ लिइन् ।

श्रेष्ठलाई ब्ल्याकमेलिङ गर्ने योञ्जनकी दिदीको धन्दा अझै रोकिएको छैन । योञ्जनकी दिदीले कम्तीमा १० लाख नदिए प्रहरीकोमा बलात्कारको उजुरी दिने धम्की श्रेष्ठलाई दिँदै आएकी छन् ।

आफू ब्ल्याकमेलिङमा परेको भन्दै श्रेष्ठ पनि सोमबार अपराध महाशाखामा पुगेका छन् ।

काठमाडौं प्रहरी परिसर स्रोतका अनुसार यसरी युवतीको हनी ट्र्यापमा प्रहरीकै एक पूर्वअतिरिक्त महानिरीक्षक (एआईजी) समेत परेका छन् । ती एआईजी आफैँ प्रहरीमा पुगेर एक युवतीले आफूलाई हनी ट्र्यापमा पारेको मौखिक जानकारी काठमाडौं प्रहरीलाई गराएका छन् ।

गौशालाको एक होटलमा सहमतिमै बसेकी ती युवतीले पैसाको बार्गेनिङ गर्न थालेपछि उनी प्रहरीमा पुगेको परिसर स्रोतको भनाइ छ ।

काठमाडौं प्रहरी परिसरका प्रवक्ता प्रहरी उपरीक्षक (एसपी) दिनेश मैनालीले अहिले काठमाडौं प्रहरीमा हनी ट्र्यापिङको कुनै उजुरी नआए पनि पछिल्लो समय हनी ट्र्यापिङको घटना भने बढ्न थालेको स्वीकार गरे ।

मानिसमा नैतिकता र आत्मीयता मर्दै गएपछि यस्ता प्रकारका आपराधिक गतिविधिहरू बढ्न थालेको उनको भनाइ छ ।

‘कुनै पनि व्यक्तिले आपसी हसमतिमा सम्बन्ध राखेर पैसाका लागि ब्ल्याकमेलिङ गर्नु गैरकानुनी काम हो । यस्तो गरेको खुले कानुनी दायरामा ल्याएर कारबाही गर्छौं,’ एसपी मैनालीले भने ।

प्रहरीले अपरिचित व्यक्तिसँग सामाजिक सञ्जालमा नजोडिन आग्रह गरेको छ ।

याे पनि पढ्नुहाेस्: