सुर्खेतदेखि काठमाडौं छिरेका दुई हनी ट्रयापरको कथा

A+ A A-

सुर्खेत वीरेन्द्रनगर-१० की लालसरी शाही र कल्पना हमाल ४ चैतमा कोटेश्वरबाट पक्राउ परे । गोरो अनुहार, सेतो सर्ट र कालो पाइन्टमा लालसरी स्मार्ट देखिन्थिन् ।

उनीभन्दा केही मोटी र रातो कुर्ता सुरूवालमा ठाँटिएकी थिइन् कल्पना हमाल । दुवैकाे उमेर ३७ वर्ष पुगे पनि हेर्दा कमैका देखिन्छन् । प्रहरी अनुसन्धानले भने उनीहरू आफ्नो सौन्दर्यतालाई देखाएर पुरुषलाई जालमा पार्ने पेसेवर अपराधी भएको देखाएको छ । जसलाई ‘हनी ट्रयाप’ भन्ने गरिन्छ ।

कोटेश्वरका एक पुरुषलाई हनी ट्रयापमा फसाउन खोज्दा दुवै जना प्रहरीको फन्दामा परेका हुन् । उपत्यका अपराध अनुसन्धान कार्यालयले उनीहरूलाई पक्राउ गरेको थियो । हाल दुवै जना काठमाडौं जिल्ला प्रहरी परिसरको हिरासतमा छन् । प्रहरीको थप अनुसन्धानले लालसरी र कल्पना पेसेवर हनी ट्रयापर भएको खुलाएको हो ।

लालसरी र कल्पनाले हनी ट्रयापको यात्रा करिब ११ वर्षदेखि सँगै सुरु गरेको खुलेको छ । योबीचमा लालसरी १ मंसिर २०६६ मा नेपालगञ्जबाट जुम्लाका राजु धितालको अपहरण र हत्या अभियोगमा जेलसमेत परेर २०७४ मा छुटेकी हुन् ।

उनले धिताललाई हनी ट्रयाप शैली अपनाएर अपहरणमा सघाएकी थिइन् । गत ६ असोजमा पनि सुर्खेत वीरेन्द्रनगर नगरपालिका लेखा अधिकृत खेमराज शर्मालाई कुनै शारिरीक सम्बन्ध बिनै नक्कली घटनास्थल बनाएर बलात्कारको आरोप लगाएकी थिइन् । सो अभियोगमा लालसरीलाई जिल्ला अदालत सुर्खेतले साढे तीन वर्ष कैद र १ लाख जरिवानाको फैसला गरेको छ ।

अदालतको फैसलापछि सुर्खेतबाट भागेकी लालसरी र कल्पना दुवै जना मिलेर हनी ट्रयापको शैली अझै बढाएको खुलेको प्रहरीको अनुसन्धानले देखाएको छ ।

भीआईपीलाई टार्गेट

लालसरी र कल्पनाको हनी ट्रयाप टार्गेटमा सर्खेतका ठूला व्यापारीदेखि सरकारी कर्मचारीसम्म परेका छन् ।

काठमाडौं प्रहरीका अनुसार, उनीहरूमाथि विभिन्न तरिकाले पैसा खायो भन्ने उजुरी दैनिक आइरहेको छ । कतिपयकाे प्रमाण अभावका कारण उजुरी दर्ता गर्न नसकिने अवस्था रहेको परिसरका डीएसपी प्रमेश विष्ट बताउँछन् ।

उनीहरूमाथिको अनुसन्धान अझै जारी छ । सुर्खेतका एक व्यापारीका अनुसार, कल्पना र लालसरी दुवैले एक समूह नै बनाएर हनी ट्रयाप जालाे फिँजाएका थिए । जसमा आफूसमेत परेको ती व्यापारीले बताए ।

‘म होटल व्यवसायी हुँ । आफ्नै साथीमार्फत कल्पना हमालसँग चिनजान भयो । त्यसपछि भेट पनि हुन्थ्यो । नेपालगञ्ज जाँदा सँगै पनि गयौँ । यो दौरानमा खिचिएका फोटो देखाएर त पछि मलाई ब्ल्याकमेल नै गर्न थालिन्,’ उनले भने, ‘कहिले मेरो घरमै आउँछु, कहिले बलात्कारको उजुरी दिन्छु भन्न थालिन् । पछि १० लाख दिएर मोबाइलको फोटो डिलिट गराएँ ।’

सहमति गर्दा पछि रकम फिर्ता गर्ने र फाेटाे डिलिट गर्ने भएपनि त्याे रकम कल्पनाले फिर्ता नगरेकाे उनकाे भनाइ छ ।

उनका अनुसार, कल्पना र लालसरीसहित युवतीको एक समूहले सुर्खेतदेखि नेपालगञ्जका केही प्रहरी अधिकारीदेखि सरकारी कर्मचारीसँग समेत ब्ल्याकमेलिङ गरेर मोटो रकम असुल गरेका छन् ।

हनी ट्रयापपछि ब्ल्याकमेल

कल्पना र लालसरी दुवै श्रीमान्‌सँग सम्बन्धविच्छेद गरेर अलग्गिएका महिला हुन् । कल्पनाका दुई छोरा छन् भने लालसरीका एक छोरा । दुवैले दैलेखका युवासँग विवाह गरेका थिए ।

श्रीमान्‌सँगको सम्बन्धपछि उनीहरूले हनी ट्रयापमार्फत पुरुषलाई मायाजालमा पार्न थाले । कल्पनाको हनी ट्रयापमा परेका होटल व्यवसायीका अनुसार, उनीहरू दुवै जना सुरुमा आफैँ नजिक हुन खोज्छन् ।

‘चिनजानका साथीहरूलाई घुम्नेदेखि रमाइलो गर्नेसम्मको प्रस्ताव उनीहरू आफैँ गर्छन् । कतिपयसँग फेसबुकमार्फत चिनजान गर्छन् । घुम्न गएका फाेटाे, भिडियाे गाेप्य रूपमा कैद गर्दा रहेछन् । त्यसको केही समयपछि उनीहरू आफूलाई समस्या पर्‍यो भनेर पैसा माग्न थाल्छन्, ‘ती व्यवसायी भन्छन्, ‘कतिले त हो क्या रे भनेर पैसा पनि दिन्छन् । पैसा नदिनेहरूसँग उनीहरूले त्यही फोटो, भिडियो पठाएर पैसा नदिए सार्वजनिक गर्ने धक्की र बलात्कारको उजुरी दिने भनेर ब्ल्याकमेल गर्न थाल्छन् ।’

ब्ल्याकमेल गरेर रकमको बार्गेनिङ गर्ने समूहमा कतिपय उनीहरूका युवा साथी र आफन्तसमेत रहेको प्रहरीको भनाइ छ । कल्पनाले विभिन्न युवालाई हनी ट्रयापमा पारेका युवासँग आफूनजिकका सर्खेत बुलबुले होटल- २ का म्यानेजर जनक शाहीलाई नै बार्गेनिङमा पठाउने गरेको प्रहरीसँगको बयानमा कल्पनाले स्वीकार गरेकी छिन् ।

कल्पना र लालसरीको हनी ट्रयाप समूहमा परेर दैलेखका एक युवाले समेत करिब साढे १६ लाख रुपैयाँ गुमाएका छन् । याे समूहमा करिब १० जना युवती रहेकाे प्रहरीकाे अनुसन्धानले देखाएकाे छ ।

प्रकाशित मिति: शुक्रबार, चैत २०, २०७७ १७:०१