महाभारतमा भीमकाे भूमिका निभाएका अभिनेता प्रविण कुमारकाे निधन

A+ A A-

भारतको बहुचर्चित टेलिभिजन श्रृंखला महाभारतमा ‘भीम’को भूमिका निर्वाह गरेका अभिनेता प्रविण कुमारको निधन भएको छ । उनको ७४ वर्षको उमेरमा मंगलबार निधन भएको भारतीय सञ्चारमाध्यमहरूले जनाएका छन् ।

बीआर चोपडाको निर्देशनमा बनेको महाभारत दूरदर्शनबाट प्रशारण हुन्थ्यो । महाभारत धारावाहिकका साथै उनले अन्य धारावाहिक र बलिउड चलचित्रमा पनि अभिनय गरेका थिए । उनको निधनपछि महाभारतमा युधिष्ठिरको भूमिका निभाएका गजेन्द्र चौहानले ट्वीट गरेर शोक प्रकट गरेका छन् ।

उनले लेखेका छन्, ‘आज बिहान नै एउटा असाध्यै दुखद खबर प्राप्त गरेँ । महाभारतमा मेरा भाइ बन्नुभएका प्रविण कुमार हामी सबैलाई छोडेर अनन्त यात्रामा जानुभएकाे छ । विश्वास नै भइरहेको छैन, तपाईँ सधैँ हाम्रो स्मृतिमा रहिरहनु हुनेछ ।’

प्रविण लामो समयदेखि बिरामी थिए । पछिल्लो समय उनको आर्थिक अवस्था नाजुक थियो । 'महाभारत'मा भीमको भूमिका निभाएपछि उनको घर-घरमा प्रशंसक बनेका थिए ।

प्रविणले आफ्नो अभिनय करिअरमा अमिताभ बच्चन र जितेन्द्रजस्ता सुपरस्टारसँग पनि काम गरेका छन् भन्ने कुरा कमैलाई थाहा छ । पञ्जाब निवासी प्रविण ६ फिट अग्ला थिए । अभिनयमा आउनुअघि उनी खेलकुदमा पनि निकै सक्रिय थिए ।

उनी ह्यामर र डिस्कस थ्रो खेलाडी थिए । उनले एसियाली र कमनवेल्थ गेम्समा पनि धेरै पदक जितेका थिए ।उनले हङकङमा भएको एसियाली खेलकुदमा स्वर्ण पदक जितेका थिए । उनले दुई पटक ओलम्पिकमा पनि देशको प्रतिनिधित्व गरेका थिए । उनलाई अर्जुन अवार्डबाट पनि सम्मानित गरिएको थियो ।

खेलकुदको दुनियाँमा नाम कमाएपछि प्रविणले सीमा सुरक्षा बल अर्थात् बीएसएफको जागिर पनि पाए तर केही वर्षपछि उनले अभिनय गर्ने मन बनाए । 'महाभारत'मा काम गरेपछि उनले करिब ५० फिल्म र टीभी शो गरे ।

सन् १९८१ मा उनको पहिलो फिल्म ‘रक्षा’ थियो । दोस्रो फिल्म ‘मेरी आवाज सुना’ पनि त्यही वर्ष आएको थियो । यी दुवै फिल्ममा उनीसँगै जितेन्द्र थिए । उनले अमिताभ बच्चनको सुपरहिट फिल्म ‘शहंशाह’ मा पनि काम गरेका थिए । प्रविणले 'चाचा चौधरी' सिरियलमा पनि साबुको भूमिका निर्वाह गरेका थिए ।

उनको अन्तिम फिल्म २०१३ मा आएको थियो, जसको नाम थियो ‘महाभारत र बर्बरिक’। पछि उनले अभिनय छाडेर वजिरपुरमा ‘आमआदमी पार्टी’मा प्रवेश गरेपछि राजनीतिमा प्रवेश गरे । त्यसपछि उनी भाजपामा प्रवेश गरे । उनले आफ्नो जीवनमा धेरै ठाउँमा हात हाले, त्यसमा सफलता पनि हासिल गरे । तर, अन्तिम दिनमा उनी आर्थिक अभावसँग लडिरहेका थिए ।

उनले पेन्सनप्रति सरकारसँग असन्तुष्टि पनि व्यक्त गरेका थिए । उनले पञ्जाबमा आएका सबै सरकारले एसियाली खेलकुद वा पदक जित्ने खेलाडीलाई पेन्सन दिने भने पनि नदिइएको बताएका थिए । कमनवेल्थको प्रतिनिधित्व गर्ने उनी एक मात्र खेलाडी थिए । यो गुनासोलाई लिएर पनि प्रविणकाे निकै चर्चा भएकाे थियाे ।

प्रकाशित मिति: मंगलबार, माघ २५, २०७८ ११:५४