चार्जिङ स्टेसन बनाउने लहरः कसैको बन्यो, कोही बनाउँदै

A+ A A-

कात्तिक २०७४ मा चिनियाँ विद्युतीय सवारीसाधन निर्माता कम्पनी विवाईडीले नेपाल विद्युत् प्राधिकरणको प्राङ्गणमा चार्जिङ स्टेसन स्थापना गर्‍यो । त्यसपछि नेपालमा चार्जिङ स्टेसनको बहस राम्रै चल्यो ।

पहिलो पटक राखिएको त्यो ४० किलोवाट क्षमताको चार्जिङ स्टेसन खासै प्रयोगमा नआए पनि नेपालमा विद्युतीय सवारीसाधनको सम्भावना भने अवश्य देखायो ।

चार वर्षअघि विद्युतीय सवारीसाधनमा त्यत्ति विश्वास नगर्ने हामी नेपालीले अहिले त्यसमै भविष्य देखिरहेका छौँ । भन्सार विभागको तथ्याङ्क हेर्ने हो भने चालु आर्थिक वर्षको ६ महिनामा मात्रै १ हजार १ सय तीनवटा विद्युतीय सवारीसाधन आयात भएका छन् ।

हाल नेपालमा विवाईडी, एमजी, ग्रेटवाल मोटर्स, टाटा, किया, हुण्डाईलगायत ब्रान्डका विद्युतीय कार लोकप्रिय छन् ।

टाटा

टाटाका लागि नेपालको आधिकारिक वितरक सिप्रदी ट्रेडिङले चार्जिङ स्टेसनको सञ्जाल तीव्र रूपमा अघि बढाइरहेको छ । कम्पनीले हाल काठमाडौं, ढल्केवर, इटहरी, हेटौँडा, भैरहवा, पोखरा र चुम्लिङटारमा डीसी फास्ट चार्जिङ स्टेसन बनाइसकेको छ । यही महिनाभित्र धार्के, बिर्तामोड र नारायणगढमा पनि निर्माण सम्पन्न हुने सिप्रदीका प्यासेन्जर भेहिकल बिजनेस युनिटका प्रमुख सावन्तजंग सिजापतिले जानकारी दिए ।

त्यस्तै, कम्पनीले १५ वटा स्थानमा विद्युतीय गाडी सर्भिस स्टेसन पनि निर्माण गरिसकेको छ । टाटाको एसी चार्जिङ स्टेसन भने सबै आउटलेट गरी १ सय ३ स्थानमा राखिएको उनले जानकारी दिए । हाल बजारमा टाटाका विद्युतीय गाडी नेक्सन ईभीका तीनवटै भेरियन्ट चर्चित छन् ।

हुण्डाई

नेपालका लागि हुण्डाई मोटर्सको आधिकारिक वितरक लक्ष्मी इन्टरकन्टिनेन्टल चार्जिङ स्टेसन विस्तार गर्न लागिपरेको छ । कम्पनीले हालसम्म ४० स्थानमा एसी चार्जिङ स्टेसन स्थापना गरिसकेको छ भने केही स्थानमा डीसी फस्ट चार्जर थप्ने तयारी गरिरहेको छ ।

विद्युतीय कारको बढ्दो मागसँगै पूर्वाधार निर्माणलाई प्राथमिता दिएर काम गरिएको कम्पनीले जनाएको छ ।

एमजी

अमेरिकी अटोमोबाइल ब्रान्ड एमजीको नेपालका लागि आधिकारिक वितरक पारामाउन्ट मोटर्सले १५/१६ ठाउँमा चार्जिङ स्टेसन तयार पारिसकेको छ । त्यस्तै, अबको चरणमा १५ वटा डीसी फस्ट चार्जरसहित चार्जिङ स्टेसन तयार पारिने कम्पनीका जनरल म्यानेजर सचिन अर्यालले बताए ।

‘हाल पोखरा, काठमाडौं, चितवन, बर्दिबास, ढल्केबर, वीरगञ्जलगायतका ठाउँमा एसी चार्जर छ । अब १५ वटाजति डीसी फस्ट चार्जर स्थापना गर्छौं । त्यसपछि भनेको आवश्यकता र सरकारको नीति के हुन्छ, त्यहीअनुसार अगाडि बढ्छौँ,’ उनले भने । हाल नेपालमा एमजीको एडएसईभी विद्युतीय कार उपलब्ध छ ।

ग्रेट वाल मोटर्स

नेपालका लागि ग्रेटवाल मोटर्सको आधिकारिक वितरक भीजी इम्पेक्सले पनि चार्जिङ स्टेसन बनाउने तयारी गरिरहेको छ । कम्पनीले ओरा गुड क्याटबाट नेपाली बजारमा विद्युतीय सवारीसाधन प्रवेश गराउँदै छ ।

ओरा गुड क्याट बुकिङ सुरु नभइसकेकाले व्यापार हेरेर ग्राहकको आवश्यकताअनुसार देशका विभिन्न स्थानमा चार्जिङ स्टेसन राख्दै जाने कम्पनीका मार्केटिङ र कम्युनिकेसन विभागका प्रबन्धक पंकज यादवले बताए ।

‘पहिलो चरणमा हाम्रा सातवटा डिलरमा राख्छौँ । त्यस्तै, सबै सर्भिस स्टेसनमा डीसी फास्ट चार्जर राख्छौँ,’ उनले भने । चार्जिङ स्टेसन निर्माणका लागि विभिन्न निकायसँग कुरासमेत भइरहेको उनले जानकारी दिए ।

किया

कियाको नेपालका लागि आधिकारिक वितरक कन्टिनेन्टल ट्रेडिङ इन्टरप्राइजेजले पहिलो चरणमा अरनिको र बीपी राजमार्गसहित १५ स्थानमा डीसी फास्ट चार्जिङ स्टेसन राख्ने तयारी गरेको छ ।

यसका लागि सबै तयारी भइसकेको र सरकारी नीतिको प्रतीक्षामा रहेको कन्टिनेन्टल ट्रेडिङ इन्टरप्राइजेजका सेल्स म्यानेजर किशोर महर्जनले बताए ।

‘यो विषयमा सरकरले पनि चासो देखाइरहेको छ । सरकारी निकायसँग मिलेर जान सकिन्छ कि के हुन्छ, हेरौँ । हाम्रो तयारी त पूरा छ,’ उनले भने । कियाका सबै सर्भिस सेन्टरहरूमा एसी चार्जर रहेको उनले जानकारी दिए ।

विवाईडी

विवाईडीको नेपालका लागि आधिकारिक वितरक साइमेक्स इङ्कले राजमार्गमा चार महिनाभित्र ५० वटा डीसी फास्ट चार्जिङ स्टेसन राख्ने तयारी थालेको छ । कम्पनीले अरु ब्रान्डका गाडीसमेत चार्ज गर्न मिल्ने पोर्टसहित चार्जिङ स्टेसन बनाउन लागेको कम्पनीकी निर्देशक यमुना श्रेष्ठले जानकारी दिइन् ।

‘हाम्रो अहिले नै ३०/३२ वटा एसी चार्जिङ स्टेसन छन् । त्यसैगरी, द्रुत गतिमा चार्ज गर्ने डीसी फस्ट चार्जिङ स्टेसन बनाउँदै छौँ,’ उनले भनिन् ।

सुन्दर यातायात

नेपालमा पहिलो पटक निजीक्षेत्रबाट विद्युतीय सार्वजनिक यातायात सञ्चालन गरेको सुन्दर यातायात प्रालिले पनि चार्जिङ स्टेसन बनाउने तयारी गरिरहेको छ ।

कम्पनीले हाल दुईवटा चार्जिङ स्टेसन सञ्चालनमा ल्याइसकेको र एउटा बन्दै गरेको सुन्दर यातायातका अध्यक्ष भेषबहादुर थापाले जानकारी दिए ।

‘सरकारले सहजीकरण गरिदिएको खण्डमा देशका विभिन्न शहरमा असार मसान्तसम्ममा २५ वटा चार्जिङ स्टेसन बनाउँछौँ,’ उनले भने ।

प्रकाशित मिति: सोमबार, माघ २४, २०७८ १९:२८