तामाकोसीको साधारणसभाः १ प्रतिशत सेयरधनीले अल्पमतमा पारे ९९ प्रतिशतलाई

A+ A A-

माथिल्लो तामाकोसी जलविद्युत् आयोजनाको कम्पनी अपर तामाकोसी हाइड्रोपावर कम्पनीले आज (११ असार २०७६ मा) बोलाएको वार्षिक साधारणसभा ‘गणपूरक संख्या नपुगेको कारण’ रोकिएको छ ।

कम्पनीले गणपूरक संख्या नपुगेको कारण देखाए पनि खास कारण भने अर्कै रहेको तथ्य खुलेको छ । आयोजना निर्माणस्थल विगु गाउँपालिकाले साधारणसभा स्थगित गर्न पत्राचार गरेपछि सभा रोकिएको हो ।

कम्पनीका प्रमुख कार्यकारी अधिकृत विज्ञानप्रसाद श्रेष्ठले गणपूरक संख्या नपुगेको कारण सभा रोकिएको जानकारी दिए ।

तर, आयोजना निर्माण स्थल विगु गाउँपालिका अध्यक्ष युधिष्ठिर खड्काले आफूहरुलाई कुनै जानकारी नै नदिई गर्न लागिएको साधारणसभा रोक्न पत्राचार गरिएको बताए ।

‘हाम्रो गाउँमा आयोजना बन्दै छ, यहाँका स्थानीयले लगानी पनि गरेका छन् । स्थानीय सरकारलाई कम्पनीको साधारणसभाबारे मौखिक वा लिखित रुपमा कुनै जानकारी दिइएको छैन । सेयरधनीले जानकारी नै नपाउने र आफ्नो मताधिकार प्रयोग गर्न नपाउने अवस्था सिर्जना भएपछि सभा रोक्न पत्राचार गरेका थियौं । रोकियो कि भयो भन्ने बारेमा थाहा भएन,’ अध्यक्ष खड्काले शिलापत्रसँग भने ।

गाउँपालिकाको यस्तो पत्रपछि नै कम्पनीले गणपूरक संख्या देखाएर सभा रोकेको हो । कम्पनीले सर्वसाधारण सेयरधनीको तर्फबाट चार जना सञ्चालक समिति सदस्य निर्वाचित गर्ने कार्यक्रम पनि राखेको थियो । कम्पनीका सञ्चालक निर्वाचित गर्ने प्रयोजनमा विगु गाउँपालिकाका स्थानीयले मताधिकार प्रयोग गर्न नपाएको भन्दै गाउँपालिका सरकारले सभा रोक्न पत्राचार गरेको हो ।

विगु गाउँपालिकामा आयोजना प्रभावित क , ख र ग गरी तीन वर्गका सेयरधनी छन् । क वर्गका प्रभावितले १०२ कित्ता, ख वर्गका प्रभावितले ४८ कित्ता र ग वर्गका प्रभावितले ३२ कित्ता सेयर पाएका थिए ।

कम्पनीले आयोजना प्रभावित दोलखावासीलाई १० प्रतिशत सेयर दिएको हो । बाँकी ९० प्रतिशतमा नेपाल विद्युत् प्राधिकरणको ४१ प्रतिशत, नेपाल टेलिकमको ६ प्रतिशत, राष्ट्रिय बिमा संस्थान र नागरिक लगानी कोषको २/२ प्रतिशत, सर्वसाधारणको १५ प्रतिशत र बाँकी २४ प्रतिशत सञ्चय कोषका बचतकर्ता तथा नागरिक लगानी कोष, कर्मचारी सञ्चय कोष, नेपाल टेलिकम, नेपाल विद्युत् प्राधिकरण, राष्ट्रिय बिमा संस्थान र आयोजनाका कर्मचारीको सेयर छ ।

कम्पनीको आज रोकिएको साधारणसभा भने आयोजना प्रभावित स्थानीय १० प्रतिशतभन्दा पनि कम सेयरधनीका कारण हो । कम्पनीले दोलखावासीलाई १० प्रतिशत सेयर दिएको हो । सभा रोक्न पत्राचार गर्ने विगु गाउँपालिकाका स्थानीयसँग १ प्रतिशत पनि सेयर नभएको बताइन्छ ।

विगुसँग किन डरायो कम्पनी ?

यसको खास कारण भनेको आयोजना निर्माण स्थल नै हो । आयोजना प्रवेशद्वार भनेर चिनिने सिंगटीदेखि आयोजाना निर्माण स्थल लामाबगरसम्मको २८ किलोमिटर सडक दूरीमध्ये करिब २० किलोमिटर विगु गाउँपालिकामा पर्छ । यस्तै, आयोजनाबाट उत्पादित विद्युत् प्रसारण हुने लाइन पनि विगु गाउँपालिकाका चारवटा वडा (साविकका लामाबगर, ओराङ, बुलुङ र लादुक गाविस) भएर जान्छ ।

सडक, आयोजना स्थल र प्रसारण लाइनको उद्गम बिन्दु भएको कारण विगु गाउँपालिकाबाट सेयरधनी बनेका केही स्थानीय कम्पनीका लागि सबैभन्दा प्रभावशाली देखिएका हुन् ।

प्रकाशित मिति: बिहीबार, असार १२, २०७६ ०६:००