त्रिवि र कृषि विश्वविद्यालयबीच जग्गा विवाद उत्कर्षमा

A+ A A-

त्रिभुवन विश्वविद्यालय, वन विज्ञान अध्ययन संस्थान, हेटौंडा क्याम्पस र कृषि तथा वन विज्ञान विश्वविद्यालयबीच जग्गा विवाद बढेको छ ।

वन विज्ञान अध्ययन संस्थान हेटौंडा क्याम्पसले आफ्नो नाममा दर्ता स्रेस्ता रहेको कित्ता नम्बर ५६ को जग्गामा कृषि तथा वन विज्ञान विश्वविद्यालयले अतिक्रमण गरेको आरोप लगाएको छ ।

जग्गा अतिक्रमण गरी जंगल फँडानी र भवन निर्माण कार्य सुरु गरेप्रति त्रिवि वन विज्ञान अध्ययन संस्थान, डीनको कार्यालयले विज्ञप्ति जारी गर्दै गम्भीर ध्यानाकर्षण भएको जनाएको हो ।

वन वातावरणको क्षेत्रमा अध्ययन अध्यापन गराउने वन विज्ञान अध्ययन संस्थान हेटौंडा क्याम्पस १५८ बिघा जमिनमा फैलिएको छ । २३ जेठ २०७४ मा दुई विश्वविद्यालयका पदाधिकारीबीच भएको छलफलले १५८ बिघा जग्गामध्ये पश्चिमतर्फको ६० बिघा जग्गा कृषि तथा वन विज्ञान विश्वविद्यालयलाई हस्तान्तरण गर्ने निर्णय गरेको थियो । तर, वन विज्ञान अध्ययन संस्थानले कृषि तथा वन विज्ञान विश्वविद्यालयले एकलौटी रुपमा जग्गा हडप्न खोजेको आरोप लगाएको छ ।

कृषि तथा वन विज्ञान विश्वविद्यालयले वन विज्ञान अध्ययन संस्थानको पूर्व–दक्षिण क्षेत्रमा पर्ने जंगल क्षेत्रमा एकलौटी रुपमा रुख कटान गरी भवन निर्माणको कार्य सुरु गरेपछि दुई विश्वविद्यालयबीच विवाद सुरु भएको हो ।

दुई विश्वविद्यालयवीच चलेको विवाद नयाँ भने होइन । विगत १० वर्षदेखि यो विवाद चल्दै आएको छ । दुवै विश्वविद्यालयबीच सिर्जना भएको समस्याको समाधानका लागि मन्त्रिपरिषद्को ४ चैत २०७२ को निर्णयले राष्ट्रिय योजना आयोगका तत्कालीन सदस्य प्राडा. गीताभक्त जोशीको संयोजकत्वमा राय सुझावसहितको प्रतिवेदन पेस गर्न समिति गठन गरेको थियो ।

समितिले सरकारलाई बुझाएको प्रतिवेदनको आधारमा १५८ रोपनी जग्गाको कित्ता नम्बर ५६ को पश्चिमतर्फबाट कुल ६० बिघा क्षेत्रफल भएको खाली जग्गा कृषि तथा वन विज्ञान विश्वविद्यालयलाई हस्तान्तरण गर्ने सहमति साथ निर्णय भएको थियो ।

१० वर्षदेखि चल्दै आएको दुई विश्वविद्यालयबीच जग्गासम्बन्धी विवाद सर्वोच्च अदालतमा विचाराधीन छ । तर, मन्त्रिपरिषद्को निर्णय र अदालतमा विचाराधीन रहेको विषयलाई ध्यानै नदिई कृषि तथा वन विश्वविद्यालयले एकलौटी रुपमा जग्गा भोगचलन गरेपछि दुई विश्वविद्यालयबीचको तनाव बढेको हो ।

कृषि तथा वन विज्ञान विश्वविद्यालयले अवैध रुपमा डोजर प्रयोग गरी २ सय रुख काटेर भवन निर्माणको कार्य सुरु गर्यो । जसको शिलान्यास प्रदेश ३ का मुख्यमन्त्री डोरमणि पौडेलले गरेका थिए ।

शिलान्यासअघि नै वन विज्ञान अध्ययन संस्थान हेटौंडा क्याम्पसका क्याम्पस प्रमुखलगायत प्राध्यापक टोलीले मुख्यमन्त्रीलाई विवादबारे जानकारी गराएका थिए । तर, मुख्यमन्त्रीले त्यसको बेवास्ता गर्दै गत ९ असारमा भवनको शिलान्यास गरेपछि जग्गा विवाद उत्कर्षमा पुगेको हो ।

प्रकाशित मिति: बिहीबार, असार १२, २०७६ ०५:४२