एमसीसीलाई लेखेकाे पत्रले माओवादीमा तरङ्ग: प्रचण्डमाथि विचलनको आरोप

A+ A A-

अमेरिकी सहायता परियोजना एमसीसीको मुख्यालयलाई पठाएको प्रतिबद्धता पत्र सार्वजनिक भएपछि माओवादी केन्द्रभित्र तरङ्ग पैदा भएको छ ।

प्रधानमन्त्री शेरबहादुर देउवा र माओवादी केन्द्रका अध्यक्ष पुष्पकमल दाहाल प्रचण्डको हस्ताक्षरसहित एमसीसीको मुख्यालयलाई पठाएको ६ बुँदे प्रतिबद्धता पत्र सार्वजनिक भएपछि माओवादी केन्द्रभित्र तरङ्ग पैदा भएको हो ।

पत्र सार्वजनिक भएपछि प्रधानमन्त्री शेरबहादुर देउवासँग माओवादी केन्द्रका अध्यक्ष प्रचण्ड र नेता नारायणकाजी श्रेष्ठले फोन संवाद गरेका छन् । फोनवार्तामा पत्र सार्वजनिक गर्नुको उद्देश्य र कारणबारे नेताद्वयले असन्तुष्टि पोखेको श्रेष्ठले बताएका छन् । 'गठबन्धनभित्र एमसीसीको विषयमा छलफल चलिरहेको अवस्थामा अहिले नै पत्र सार्वजनिक गर्नुको उद्देश्यबारे प्रधानमन्त्रीलाई प्रश्न गरेका छौँ,' नेता श्रेष्ठले भने ।

पत्र सार्वजनिक भएपछि त्यसबारे धारणा बनाउन माओवादी केन्द्रका नेताहरू आन्तरिक छलफलमा पनि जुटेका छन् । एमसीसीको मुख्यालयलाई प्रधानमन्त्री देउवा र प्रचण्डले १३ असोजमा पत्र पठाएका थिए । प्रधानमन्त्री देउवा ग्लास्गो सम्मेलनबाट फिर्ता भएपछि त्रिभुवन अन्तर्राष्ट्रिय विमानस्थलमा सञ्चारकर्मीहरूसँग कुराकानी गर्दै प्रचण्ड र आफूले एमसीसी पारित गर्छौं भनेर प्रतिबद्धता पत्र पठाएको खुलासा गरेका थिए ।

एमसीसी पास गर्छौं भनेर पत्र पठाएको विषय प्रधानमन्त्री देउवाले खुलासा गरिदिएपछि प्रचण्डले त्यसको बचाउमा १९ कात्तिकमा भनेका थिए, 'शेरबहादुरजीले हामीले सहमति जनाएर चिठी पठाइसक्यौँ भनिदिनुभएछ, त्यसले तरङ्ग पैदा भएछ। हामीले त्यस्तो चिठी पठाएका छैनौँ ।’

पार्टीले एमसीसी संशोधनबिना पारित हुननसक्ने निर्णय गरेको अवस्थामा अध्यक्ष प्रचण्डले प्रतिबद्धता पत्रमा हस्ताक्षर गर्नु कार्यशैलीगत विचलन भएको माओवादी केन्द्रका प्रमुख सचेतक देव गुरुङले बताए । 'अर्थ मन्त्रालयको कर्मचारीले पत्राचार गर्दा पुग्ने अवस्थामा पोर्टफोलियोलाई समेत ख्याल नगरी प्रधानमन्त्री र हाम्रा पार्टीका अध्यक्ष प्रचण्डले पत्र पठाउने कुरा कार्यशैलीगतरूपमा विचलन हो । यो विषयमा पार्टीभित्र गम्भीर छलफल गर्नुपर्छ,' गुरुङले भने ।

यस्तै एमसीसीको विषयमा पाँच दलीय सहमतिका आधारमा निर्णय गर्ने भनिसकेपछि दुई पार्टीका अध्यक्षले मात्रै पत्राचार गर्नु त्रुटिपूर्ण रहेको गुरुङको भनाइ छ । 'पाँच दलीय सहमतिका आधारमा अघि बढाउने कुरामा दुई पार्टीका अध्यक्षले मात्रै पत्राचार गर्ने विषय त्रुटिपूर्ण छ । छलफलका लागि म्याद थप गर्ने आशयसहित पत्र गए पनि त्यसमा गठबन्धनमा आबद्ध सबैको हस्ताक्षर जरुरी थियो । गठबन्धनको बैठकमा समेत यो त्रुटिको समीक्षा हुन्छ,' उनले भने ।

हालै सम्पन्न माओवादी केन्द्रको महाधिवेशनमा पनि एमसीसी पास गराउने विषयमा भूमिका निर्वाह नगर्नका निम्ती कार्यकर्ताहरूले प्रचण्डलाई दबाब दिएका थिए । कार्यकर्ताहरुलाई प्रशिक्षण दिँदै प्रचण्डले एमसीसी यथास्थितिमा पारित नहुने भन्दै एमसीसी पारितमा पार्टीले जोडबल नगर्ने बताएका थिए ।

२० माघमा कर्णाली प्रदेश कमिटीको प्रशिक्षण कार्यक्रममा प्रचण्डले भनेका थिए, 'एमसीसी यथास्थितिमा पारित हुँदैन । राष्ट्रिय हित सुनिश्चित नभएसम्म यसको समर्थनमा पार्टी लाग्नेवाला छैन । यसबारे पार्टीको पोजिसनका सवालमा उब्जिएका भ्रमलाई चिर्दै तपाईंहरू चुनावी गतिविधिमा केन्द्रित हुनुहोस् ।'

देशभरका कार्यकर्ता नयाँ ऊर्जाका साथ चुनावलाई केन्द्रित गर्दै उत्साहका साथ संगठन निर्माणमा लागेको अवस्थामा यो पत्रले कार्यकर्ताको मनोविज्ञानमा असर पर्ने भएकाले अध्यक्षले यसबारे प्रस्ट पार्नुपर्ने माओवादी केन्द्रका नेता गिरिराजमणि पोखरेल बताउँछन् ।

'कार्यकर्ताले एमसीसीबारे महाधिवेशनमा पनि प्रश्न उठाएका थिए । त्यसताका र त्यसयता विभिन्न प्रशिक्षणमा अध्यक्षले राष्ट्रिय हित सुनिश्चित गरेर मात्रै यसमा निर्णय लिने बताउनुभएको थियो,' पोखरेले भने, 'गठबन्धनमा पनि यसलाई यथावत राख्ने ढंगले छलफल चलिरहँदा पत्र सार्वनजिक भएको छ । यसले संगठन निर्माणमा क्रियाशील कार्यकर्तालाई पङ्क्तिलाई निरास त बनाउने नै छ, पार्टीबारे पनि वितृष्णा सिर्जना हुनसक्ने भएकाले अध्यक्षले प्रस्ट पार्नुपर्छ ।'

पत्र सार्वजनिक भएपछि कार्यकर्ताहरूलाई भ्रममा नपर्न नेता श्रेष्ठले आग्रह गरेका छन् । 'प्रम देउवा र अध्यक्ष प्रचण्डद्वारा एमसीसी अमेरिकालाई पठाइएको भनी सार्वजनिक गरिएको पत्रका कारणबाट एमसीसी कम्प्याक्टका बारेमा हाम्रो पार्टीको दृष्टिकोण र अडानप्रति कुनै द्विविधा र भ्रममा नपर्न आम पार्टी पङ्क्ति र सबैमा अनुरोध छ,' श्रेष्ठले भनेका छन्, 'पार्टी दृढ छ, यथास्थितिमा यो सम्झौता स्वीकार गर्न र संसदीय अनुमोदन प्रक्रियामा अघि बढाउन मिल्दैन, सकिँदैन ।'

*शीर्षक परिवर्तन

प्रकाशित मिति: आइतबार, माघ २३, २०७८ १६:१०