गठबन्धनका साथीहरू एमसीसीलाई गिजोल्न लाग्नुभयो, सरकारले स्पष्ट धारणा ल्याओस् : प्रदीप ज्ञवाली

गठबन्धनका साथीहरू एमसीसीलाई गिजोल्न लाग्नुभयो, सरकारले स्पष्ट धारणा ल्याओस् : प्रदीप ज्ञवाली

A+ A A-

नेकपा (एमाले) का उपमहासचिव प्रदीप ज्ञवालीले एमसीसीको विषयमा सरकारले स्पष्ट धारणा ल्याउनुपर्ने बताएका छन् । एमसीसी पास गर्ने वा नगर्नेमा स्पष्ट धारण ल्याउन सरकारलाई उनले आग्रह गरे ।

प्रेस चौतारी रूपन्देहीले बुटवलमा आयोजना गरेको पत्रकार सम्मेलनमा पूर्वपरराष्ट्रमन्त्री समेत रहेका ज्ञवालीले तत्कालीन समयमा कांग्रेस र माओवादी पार्टीको संयुक्त गठबन्धनको सरकारले यो सम्झौता गरेको स्मरण गरे ।

'एमसीसी सम्झौतालाई यो गठबन्धनका साथीहरूले गिजोल्न लाग्नुभयो । अमेरिकालाई पाँच महिनाभित्र पास गर्छौं भन्ने यता जनतालाई संशोधनबिना पास गर्देनौँ भन्दै झुटा कुरा गरेर हुँदैन,' ज्ञवालीले भने, 'सरकारले के गर्न खोज्दैछ स्पष्ट पार्नुस् । सरकारको तर्फबाट र गठबन्धनको तर्फबाट स्पष्ट धारण ल्याओस । पास गर्न उहाँहरूसँग बहुमत छँदैछ ।’

प्रतिपक्षमा रहेको एमालेले चाहनु र नचाहनुमा कुनै फरक नपर्ने ज्ञवालीको भनाइ थियो । 'प्रतिपक्षले चाहनु र नचाहानुमा यतिबेला कुनै फरक पर्दैन, हामी हाम्रा एजेण्डा पास गराउन पनि सक्दैनौँ, फेल गराउन पनि ।'

ज्ञवालीले भने, 'एमसीसी झण्डै ८ वर्ष लगाएर नेपाल आफैँले ल्याएको परियोजना हो । २०१० देखि नेपाल यो विषयमा जोडिँदै आएको छ । ६-७ जना प्रधानमन्त्रीहरू यसमा जोडिनुभयो । नेपालले यो परियोजना आवश्यक छ भनेर त्यतिबेला छनोट गरेको हो ।’

एमसीसीमा राष्ट्रिय हितविपरीत कुनै प्रावधानहरू भए क्षमायाचना गर्नुपर्ने उनको भनाइ थियो । 'यदि यसमा राष्ट्रिय हितविपरीत कुनै प्रावधानहरू छन् भने सबैभन्दा पहिले जसले हस्ताक्षर गरेको हो उसैले आफ्नो आत्मलोचना गर्नु पर्दैन ?’

तत्कालीन समयमा हस्ताक्षर गर्ने अर्थमन्त्री ज्ञानेन्द्र कार्की रहेको स्मरण गर्दै ज्ञवालीले यो ठीक छ वा छैन भनेर पाँच वर्षपछि अध्ययन गर्ने कार्यदलमा पनि उनी रहेकोमा व्यङ्ग्य । 'पाँच वर्षअघि उहाँहरू निद्रामा हुनुहुन्थ्यो कि, कसैले झुक्कयाएर सही गरायो कि ? ठीक थियो भने ठीक छ भनेर भन्नुपर्‍यो, ठीक छैन भने हामीले गल्ती गरेछौँ भन्नुपर्‍यो । सर्प देखे दुलाबाहिर हात, माछा देखे दुलाभित्र हात जस्तो व्यवहार देखाउनु हुँदैन ।’

यो विषयमा एमालेले उपयुक्त समयमा आफ्नो दृष्टिकोण प्रस्तुत गर्ने ज्ञवालीको भनाइ थियो ।

प्रकाशित मिति: आइतबार, माघ २३, २०७८ १५:०५