सडक पिच गर्ने बेलामा अलकत्रा अभाव, आयातकर्ताले गरे बदमासी

A+ A A-

सडकलगायत पूर्वाधार कालोपत्रे गर्न प्रयोग हुने अलकत्रा अभावले विकास रोकिएको छ । नेपालको सडकलगायतका पूर्वाधार कालोपत्रे गर्ने मौसममा अलकत्राको अभाव हुँदा काम प्रभावित भएको छ ।

कालोपत्रे गर्न अहिले अलकत्रा (विटुमिन) अभाव भएको निर्माण व्यवसायी महासंघका अध्यक्ष रवि सिंहले जानकारी दिए । नेपालको मौसमका कारण चैत दोस्रो सातादेखि असार दोस्रो सातासम्मको समय कालोपत्रेको लागि उपयुक्त मानिन्छ ।

जेठदेखि नै विटुमिनको अभाव भएको अध्यक्ष सिंहको भनाइ छ ।

भन्सार विभागका प्रवक्ता शिशिर घिमिरेले व्यवसायीले विटुमिन छुटाएर नलगेको बताए । व्यवसायीले आयात गरेको विटुमिन समयमै नछुटाउँदा भन्सार बिन्दुमा नै रोकिएको घिमिरेको भनाइ छ ।

किन रोकियो भन्सारमा ?

नेपाल सरकारले तय गरेको भन्सार दरअनुसार सार्क राष्ट्रमा उत्पादित विटुमिन नेपालमा आयात गर्दा ७.२५ प्रतिशत भन्सार महसुल तिर्नुपर्छ । सार्कबाहेकका देशबाट आयात गर्दा भने १५ प्रतिशत भन्सार शुल्क तिर्नुपर्छ ।

तर, नेपालमा आयात गर्ने केही व्यवसायीले सार्क राष्ट्रभन्दा बाहिरबाट विटुमिन खरिद गर्ने र भारतमा उत्पादन भएको प्रमाणपत्र पेस गर्ने गरेको तथ्य भन्सार विभागले गत जेठमा पत्ता लगाएको थियो । व्यवसायीले इरान, कत्तारलगायतका देशबाट आयात गरिएको विटुमिन पनि भारतमा उत्पादन भएको भनेर भन्सार विभागमा कागजात पेस गर्ने गरेका थिए ।

‘आयातकर्ताले भारतमा उत्पादन भएको भनेर कागजपत्र पेस गर्नुभएको छ, हामीले अध्ययन गर्दा सार्क क्षेत्रभन्दा पनि अन्य देशमा उत्पादन भएको भेट्यौं । त्यसले उहाँहरुले पेस गरेको कागजात, गरेको दाबी र ल्याइएको वस्तुको यथार्थ फरक छ । जुन वस्तु जहाँबाट ल्याएको हो, सोहीअनुसारको भन्सार दरबन्दी तिरेर लानुस् भन्दा उहाँहरु (व्यवसायी) ले लानुभएको छैन । भन्सारमै रोकिएको छ,’ विभागका प्रवक्ता घिमिरेले शिलापत्रसँग भने ।

व्यवसायीले आयात गरिएको केही विटुमिनमा इरानमा उत्पादन भएको भन्ने उल्लेख भएको डब्बामा नै ल्याइएको पनि विभागले फेला पारेको छ । तर, आयातकर्ता भने त्यस्तो विटुमिन पनि भारतमा उत्पादन भएको दाबी गरिरहेका छन् ।

नेपालमा उत्पादन हुँदैन विटुमिन ?

नेपाल सरकारअन्तर्गत नै विटुमिन एन्ड ब्यारेल नामक कम्पनी थियो । तर, सरकारले सो कम्पनी निजीकरण गरिसकेको छ । सो कम्पनी अहिले पञ्चकन्या ग्रुपले सञ्चालन गरिरहेको छ ।

पञ्चकन्या ग्रुपले सञ्चालन गर्ने सो कम्पनीले प्रसोधन गर्ने विटुमिनले नेपालको माग धान्न नसक्ने निर्माण व्यवसायी महासंघका अध्यक्ष सिंह बताउँछन् ।

‘नेपालमा प्रशाेधन हुने विटुमिनले यहाँको मागको ५ प्रतिशत जति धान्छ होला, बाँकी आयात नै हो, आयात हुने विटुमिन भन्सारमै रोकिँदा काम प्रभावित भएको छ,’ अध्यक्ष सिंहले भने ।

प्रकाशित मिति: बिहीबार, असार १२, २०७६ ०२:५८