आच्छुछु..आज कति जाडो, आउनोस् चिसोभित्रको मजा नियालौँ

A+ A A-

माघे शुक्रबार औधी चिसो छ । त्यसमाथि बाहिर झमझम पानी परिरहेको छ । उच्च पहाड र हिमाली जिल्ला हिउँले सेताम्य छन् ।

अनि यस्तो बर्फिलो दिनमा तपाईं के गर्दै हुनुहुन्छ ? यो जाडोलाई ‘इन्जोय’ त गरिरहनुभएको छ ? छैन भने आउनोस् यो चिसो दिनभित्र मज्जा खोजौँ !

धेरैले भन्ने गर्छन्, ‘धेरै जाडो हुँदा काममा ध्यान जाँदैन ।’ हुन पनि हो, जाडाे माैसम निरस, कठ्याङ्ग्रिदाे र कठाेर नै हुन्छ । अनि याे चिसाेले कसैलाई चिन्दैन पनि । यस्तो बेला के काम गर्न सक्नु होइन ? नवराज पराजुलीले कवितामा भनेजस्तो ‘मैले यो शरीर बाँच्नलाई पाएको हुँ, बेच्नलाई पाएको होइन !

पराजुली दाइको कुरा ठीकै हो । तर, यो चिसोमा रमाइलो गर्दै बाँच्नेचाहिँ कसरी ?

जवाफ हामी आफैँ खोजौँ है त ।

हामी अक्सर भन्ने गर्छौ, ‘पोहोरभन्दा यसपालि धेरै जाडो ।’ कतै पोहोरको जाडोमा पनि हामीले यसै त भनेको थिएनौँ ?

खैर, हरेक जाडो हामीलाई अघिल्लो जाडोभन्दा बढ्ता जाडो नै लाग्छ । यसपालि पनि पहिलाभन्दा जाडो हो, ओके छ । तर, यसलाई हामी धेरै तरिकाले इन्जोय गर्न सक्छौँ । रमाइरमाइ कटाउन सक्छौँ ।

हामीमध्ये अधिकांश नेपालीको विगत गाउँ हो । सम्झिनोस् त, गाउँघरमा अँगेनो वरिपरि बसेर आगो तापेको । ढोड सल्काएर जाडो भगाएको । बाख्राको टाट्नोबाट निकालेर थुपारिएका झ्याँक्रा बालेर रापकाे मजा लिएकाे । त्यो अँगेनाको वरिपरि परिवारमाझ बसेर बात मारेको । अनि बाक्लो दूधको चिया सुरुपसुरुप पारेको । मकै, भटमास भुटेर खाएको ।

गाउँमै हुनुहुन्छ भने त तपाईंले विगत सम्झिनै नपर्ला । यी सबै कुरा अहिले पनि तपाईंको पहुँचमै होलान् ।

शहरमा हुनुहुन्छ भने ठ्याक्कै गाउँको जस्तो मजा त नआउला । तर, तपाईंले त्यस्तै केहीचाहिँ गर्न सक्नुहुन्छ । सोच्नोस् न, यो शहरको भागदौडमा तपाईंले परिवारसित मन खोलेर बात मार्न नभ्याएको कति भयो ? नहतारिई खाना खाएको कति भयो ? हो, यो चिसो दिनले तपाईंका लागि छुटेको त्यो अवसर लिएर आएको छ । परिवारमाझ बस्नुहोस् । विगतका रमाइला किस्साबारे कुरा गर्नुहोस् । आफ्ना छोरा वा छोरीलाई उनीहरू सानो छँदाको रमाइलो पल सुनाउनुहोस् । आफू र श्रीमतीका ती पल खोल्नुहोस् (मिल्नेजति), जसले माहोल रमाइलो बनाउँछ । हजुरबुवा, हजुरआमालाई उहाँहरूको जमानाका रोचक किस्सा भन्न लगाउनुहोस् ।

एक्लै हुनुहुन्छ भने सिरकभित्र गुटमुटिएर एक दिन सुत्न सक्नुहुन्छ । पढ्न छुटाएका पुस्तकहरू पढ्न सक्नुहुन्छ ।

आज घाम आराम गर्न गएको छ । बाहिर पानी परिरहेको छ । चिसो हावा चलिहेको छ । चिसोचिसो मौसममा तातोतातो चिया सुरुप्प पारेर जाडो भगाउन सक्नुहुन्छ । यस्तो जाडोमा चियाले जति मजा अरु केले देला ? चिया खाने बानी नभए हट लेमन, कफी वा हट चकलेट बनाएर पिउन सकिन्छ ।

गाउँतिर जाडोमा कुइनाबाट चुहिनेगरी गुन्द्रुक र भात खाइन्छ । यो शहरमा पनि सम्भव छ । ढुसी नपरेको गुन्द्रुकको झोलसँग भात कपाकप पार्न सकिन्छ । दिउँसो मकै र भटमास भुटेर खान सक्नुहुन्छ । सम्भव भएसम्म आगो तापेर जाडोको मज्जा लुट्न सकिन्छ ।

काठमाडौंमा त ७७ जिल्लाकै मान्छे बस्छौँ । सरकारी कर्मचारीको हकमा आज आधा छुट्टी हुने दिन हो । काठमाडौं वरिपरिका डाँडामा हिउँ परिरहेको छ । गाडी लिएर हिउँ खेल्न जान सकिन्छ । कार लिएर गीतको तालमा हिउँ भएको नजिकैको ठाउँतिर जानुमा पनि भिन्दै मजा छ ।

कोरोना महामारीले संसारै हायलकायल छ । अत्यासलाग्दा समाचार कति पढ्नु, कति हेर्नु । तपाईंलाई मन पर्ने कमेडियन हाेलान् नि । हाे, युट्युब रमाइला भिडियाे, शाे हेर्न सक्नुहुन्छ । अथवा संगीत सुनेर आफ्नो आत्मा र शरीरलाई फुकाउनुहोस्, आनन्द महसुस गर्नुहोस् ।

विदेशमा भएका आफन्तसँग कोठामा बसेर मजाले भर्चुअल्ली कुरा गर्न सक्नुहुन्छ । सेभिङमा कति पैसा खर्च गर्नु, चिसो मनाउन घरमा बसेका बेला आफैँ सेभिङ गर्न सक्नुहुन्छ । सबै भागदौड सकेर दिनको अन्तमा जाने त हामी घर वा कोठामै हो । त्यसैले घर बसेका बेला यसलाई सफा गर्ने वा सजाउन सक्नुहुन्छ ।

तपाईं देश, विदेश, गाउँ, शहर, महल, झुपडी जहाँ हुनुहुन्छ, स्थानअनुसार जाडोको मजा लिनोस् । ह्याप्पी फ्राइडे !

प्रकाशित मिति: शुक्रबार, माघ २१, २०७८ १४:१५