सुदूरपश्चिमका पहाडमा हिमपातः बाटाे थुनियाे, बिजुली काटियाे, बाहिर निस्कनै गाह्राे

सुदूरपश्चिमका पहाडमा हिमपातः बाटाे थुनियाे, बिजुली काटियाे, बाहिर निस्कनै गाह्राे

A+ A A-

बिहीबार दिउँसोदेखि निरन्तरको हिमपातका कारण सुदूरपश्चिमको पहाडी जिल्लाको जनजीवन कष्टकर बनेको छ । मौसममा आएको परिवर्तनसँगै बाजुरा, अछाम, डोटी, डडेल्धुरा, बैतडी, बझाङ र दार्चुलामा सुरु भएको हिमपात अझै रोकिएको छैन ।

सुदूरपहाडका विभिन्न जिल्ला जोडने राजमार्ग क्षेत्रमा भारी हिमपात भएपछि सवारी आवागमन रोकिएको छ । हिमपातले राजमार्ग अवरुद्ध हुँदा धनगडीबाट पहाडी जिल्लाका लागि छुटेका दिवा तथा रात्री सेवाका यातायातका साधन बाटोमै रोकिएका छन् ।

बैतडी–बझाङ जोड्ने जयपृथ्वी राजमार्ग, सतबाँझ दार्चुला जोडने महाकाली राजमार्ग र डडेल्धुरा, खोडपे जोडने दशरथचन्द राजमार्ग, धनगडी–डडेल्धुरा जोडने भिमदत्त राजमार्ग, स्याउले-दिपायल जोने डा. केआई सिंह राजमार्ग, अछाम र बाजुरा जोने पहलमानस्वार राजमार्गलगायतका अन्य पहाडी राजमार्ग अवरुद्ध बनेका छन् ।

हिउँ पर्ने क्रम जारी रहेको र बाटो खोल्ने प्रयास नहुँदा यात्रुहरू बीच बाटोमै अलपत्र परेका छन् । राजमार्ग बन्द हुँदा बैतडी, बझाङ र दार्चुलाका लागी छुटेका सवारी साधन खोपेमै रोकिएका जिल्ला प्रहरी कार्यालय बैतडीका सूचना अधिकारी प्रहरी निरीक्षक दर्शन खडकाले बताए ।

डडेल्धुराको साहुखर्क, हगुल्टे लेक, बैतडीको खोड्पे, बझाङको वित्थड, देउलेक क्षेत्रमा भारी हिमपात भएको छ । हिमपातका कारण सुदूरपहाडमा विद्युत तथा संचार सेवा पनि अवरुद्ध भएको छ । विद्युत पोल ढलेर पहाडी जिल्लामा बिजुली सेवा पनि अवरुद्ध छ ।

हिमपात र वर्षातका कारण जिल्लाको टेलिफोन तथा इन्टरनेट सेवासमेत पूर्णत अवरुद्ध भएपछि जिल्लाको जनजीवन अस्तव्यस्त भएको हो । पहाडी जिल्लाबाट प्रसारण हुने एफएम रेडियोको प्रसारण सेवा पनि अवरुद्ध बनेको छ ।

रिलेस्टेसनमा घाम नलाग्दा सौर्य ऊर्जामार्फत ब्याट्री चार्ज नहुँदा रेडियोको प्रसारण सेवा अवरुद्ध बनेको सामुदायिक रेडियो प्रसारक संघ सुदूरपश्चिम प्रदेशका अध्यक्ष जगत खडकाले बताए ।

बझाङ सदरमुकाम चैनपुरमा पनि यस वर्ष हिँउ परेको छ । हिमपातका कारण एक गाउँबाट अर्को गाउँसम्म पुग्न सकिने अवस्था नरहेको साइपाल गाउँपालिकाका दिपकबहादुर बोहराले बताए । गाउँमा ३ फिटभन्दा बढी हिँउ परेकोले एक घरबाट अर्को घरसम्म जान सकिने अवस्था छैन ।

दैनिक कामकाजका लागि मानिसहरू घर बाहिर निस्कन सकेका छैनन् । विगतका वर्षहरू भन्दा यस वर्ष चिसो अत्यधिक बढेकाले बालबालिका र ज्येष्ठ नागरिकलाई बढी कष्ट परेकाे बोहराको भनाइ छ ।

प्रकाशित मिति: शुक्रबार, माघ २१, २०७८ ०९:००