बलिउडमा जम्न नसकेकी शमिता करोडौं आम्दानी गर्छिन्

A+ A A-

बलिउड शमिता शेट्ठी लामो समयदेखि फिल्मी क्षेत्रबाट बाहिर थिइन् । उनी हालै 'बिग बोस १५' मा देखा परेकी थिइन् । उनी रियालिटी शोको 'टप ४' मा पुगिन् । उनी शिल्पा शेट्ठीकी बहिनी समेत हुन् । ४३ वर्षकी शमिता अहिलेसम्म अविवाहित छिन् ।

२ फेब्रुअरी १९७९ मा मंगलोरमा जन्मेकी शमितालाई बाल्यकालदेखि नै फेसनप्रति लगाब थियो । उनले आफ्नो पढाइ मंगलौर र मुम्बईमा गरिन् । यसपछि सपना चुम्न मुम्बईको एसएनडीटी कलेजबाट फेसन डिजाइनिङको अध्ययन गरिन् । यसपछि उनले चर्चित फेसन डिजाइनर मनिष मल्होत्रासँग काम गरिन् ।

शमिताको फिल्ममा काम गर्ने रहर थियो । उनले सन् २००० मा आदित्य चोपडाको फिल्म ‘मोहब्बतें’ बाट बलिउडमा डेब्यु गरेकी थिइन् । यस फिल्ममा उनीसँग अन्य धेरै कलाकार थिए । उनले उत्कृष्ट अभिनयका कारण 'डेब्यु अफ द इयर'को अवार्ड पाइन् ।

त्यसपछि उनले फरेब, जहर, नगदजस्ता धेरै फिल्ममा काम गरिन् । तर, बलिउड क्षेत्रमा खासै जम्न सकिनन् । यसपछि उनी २००९ मा 'बिग बोस' सिजन ३ मा देखा परिन् तर शिल्पा शेट्ठीको विवाहका कारण शो बीचमै छाडिन् ।

शमिता शेट्ठी झलक दिखला जा, खतरों के खिलाडीमा देखिएकी थिइन् । बेव सिरिज ब्रो र ब्ल्याक विडोमा अभिनय कौशल देखाएकी थिइन् । फिल्ममा असफल भए पनि शमिता करोडौंको मालिक हुन् । शमिताको कुल सम्पत्ति १ देखि ५ मिलियन डलर रहेको बताइएको छ । उनी एक इन्टेरियर डिजाइनर पनि हुन् । कामबाट उनले लाखौँ आम्दानी गर्छिन् ।

किन गरिनन् बिहे ?

एक समय शमिताको नाम आफताब शिवदासानी, उदय चोपडा र हरमन बावेजासँग पनि जोडिएको थियो । तर, उनले आफूलाई सिंगल नै दाबी गरिरहिन् । शमिताले अहिलेसम्म किन बिहे गरिनन् भन्ने कुरा उनी आफैँले एक मिडिया अन्तर्वार्तामा बताएकी थिइन् ।

बिहे नहुनुको कारण आफूले जीवन बिताउन चाहेको जस्तो कोही नभटेको बताएकी थिइन् । अहिले शमिता राकेश बापटसँग प्रेममा छिन् । यो सम्बन्धबाट दुवै जना निकै खुसी छन् । उनले पहिलो पटक आफ्नो प्रेमीसँग जन्मदिन मनाउने बताइन् ।

प्रकाशित मिति: बुधबार, माघ १९, २०७८ १७:३८