कर्णालीमा गैरसांसदलाई मन्त्री बनाउने खेल, माओवादीमा चर्को असन्तुष्टि

A+ A A-

कर्णाली प्रदेशमा गैरसांसदलाई मन्त्री बनाउने खोजेपछि माओवादीमा असन्तुष्टि बढेको छ । नेकपा माओवादी केन्द्रले हुम्लाका छिरिङ डम्डोल लामा (कार्चेन) लाई कर्णाली प्रदेशको मन्त्री बनाउन खोजेको छ ।

अध्यक्ष पुष्पकमल दाहाल प्रचण्डले लामालाई मन्त्री बनाउन प्रदेशका नेतालाई निर्देशन दिएका छन् । प्रचण्डको निर्देशनपछि लामालाई मन्त्री बनाउन प्रदेशका नेताहरू पनि दबाबमा छन् । माओवादी कर्णालीका प्रमुख सचेतक ठम्मर बिष्टले भने, कमरेड कार्चेनलाई मन्त्री बनाउने बिषयमा पार्टीमा छलफल भएको छ तर, हुनेनहुने अहिले नै फिक्स छैन ।

सत्ता गठबन्धनमा भने मन्त्रालयकै भागबण्डा टुंगिएको छैन । नेपाली कांग्रेस, माओवादी र नेकपा समाजवादीबीच मन्त्रालयको भागबण्डा नटुंगिदा मन्त्रिपरिषद्ले तीन महिनासम्म पनि पूर्णता पाउन सकेको छैन । माओवादीले चार मन्त्रालयको दाबी गरिरहेको छ । अहिले माओवादीका तर्फकाट बिन्दमान बिष्ट आर्थिक मामिला मन्त्री नियुक्त भैसकेका छन् ।

गैरसांसदलाई मन्त्री बनाउने शीर्ष नेताहरूको दबाबबाट माओवादीका सांसदहरू भने असन्तुष्ट बनेका छन् । ‘मन्त्री हुनका लागि भैरहेकै सांसदहरू एकसे एक योग्य छौँ’, नाम खुलाउन नचाहने एक जना सांसदले भने, ‘जो बोल्छ उही तितो हुने अवस्था छ । नत्र अहिलेको अवस्थामा जसको नाम चर्चा गरिएको छ उहाँलाई मन्त्री बनाउनुपर्ने कुनै कारण देख्दिनँ ।’

सांसद नभएको व्यक्ति छ महिनाका लागि मन्त्रि नियुक्त गर्न सकिने व्यवस्था छ । अध्यक्ष प्रचण्ड र प्रदेशका शीर्ष नेताहरू भने हुम्लामा आफ्नो जनमत रक्षाका लागि लामालाई सांसद बनाउने योजनामा छन् । २०६४ सालमा माओवादीबाट संविधानसभा सदस्य जितेका छिमि लामाले एमालेमा प्रवेश गरेपछि माओवादीलाई धक्का लागेको छ । त्यसैको प्रभाव रोक्न गैरसांसदलाई भए पनि हुम्लामा मन्त्री बनाउने माओवादीको योजना छ ।

अहिले हुम्लाबाट कर्णाली प्रदेशसभामा माओवादीका सांसद छैनन् । २०७४ को निर्वाचनमा एक सिट प्रदेशसभा सदस्यको उमेद्वार उठाएकोमा हालका मुख्यमन्त्री जीवन बहादुर शाहीसँग विजय भण्डारी पराजित भएका थिए । त्यस्तै प्रतिनिधिसभामा पनि माओवादीका उमेद्वारलाई स्वतन्त्र उमेद्वारले हराएका थिए ।

प्रकाशित मिति: मंगलबार, माघ १८, २०७८ १४:१३