मिटर अभावमा बत्ती बाल्न नपाएका गाउँले विद्युत पोलले हेरेरै चित्त बुझाउँछन्

मिटर अभावमा बत्ती बाल्न नपाएका गाउँले विद्युत पोलले हेरेरै चित्त बुझाउँछन्

A+ A A-

अछामको बान्नीगढी जयगढ गाउँपालिकाको वडा नम्बर ३ बर्दादेवी जोगेना, दोमार्साका नागरिकको वर्षौँदेखि बिजुली बत्ती बाल्ने सपना अधुरै छ । गाउँमा विद्युत बिस्तार भएपछि बत्ती बाल्ने आशामा रहेका स्थानीयको सपना मिटर अभावका कारण अधुरै रहेको हो ।

गाउँपालिकाको केन्द्रसमेत रहेको वडा नम्बर ३ बर्दादेवीको जोगेना, दोमार्सामा विद्युत उद्घाटन गरिएको महिनौँ बितिसक्दासमेत स्थानीयले विद्युत जडानका लागि मिटर पाउन सकेका छैनन् ।

घर आसपासमा बिजुलीका पोल र तारसँगै विद्युत बिस्तार गरिएको भए पनि मिटर अभावका कारण बत्ती जडान गर्न नपाउँदा स्थानीय अन्धकारमा बस्न बाध्य छन् ।

गत ८ पुसमा दोमार्सा र जोगेनामा एक औपचारिक कार्यक्रमका बीच बान्नीगढी जयगढ गाउँपालिकाका अध्यक्ष राजेन्द्र बहादुर खड्काले विद्युतको उद्घाटन गरेका थिए ।

अन्य वडाका बिभिन्न टोलमा बिजुली बिस्तार भएको बर्सौपछि गाउँपालिका केन्द्रदेखि नजिकै रहेको जोगेना, दोमार्सा क्षेत्रमा ८ पुसमा मात्र बिजुलीको उद्घाटन गरिएको थियो ।

विद्युतका पोल र तार जडान सुरु भएसँगै बिजुली बत्ती बाल्न पाउने आशामा घरमा वाइरिङलगायत आवश्यक उपकरण जडान गरेका स्थानीयको सपना मिटर अभावका कारण पूरा हुन सकेको छैन ।

स्थानीय लाल बहादुर ठकुल्लाका अनुसार घरको छेउमै बिजुलीको पोल बिस्तार भइसक्दा समेत मिटर अभावका कारण मोबाइल चार्ज गर्नकै लागि अर्को गाउँसम्म पुग्नुपर्ने बाध्यता गाउँलेहरूले झेलिरहेका छन् ।

विद्युतको उद्घाटनका लागि हौसिएका गाउँपालिकाका जनप्रतिनिधिले समेत स्थानीयलाई मिटर उपलब्ध गराउन कुनै चाँसो नलिएको उनको भनाइ छ ।

यता नेपाल विद्युत प्राधिकरण अछाम बितरण केन्द्रका प्रमुख जयानन्द बोगटीले भने अछाम जिल्लामा मात्र नभई विद्युत प्राधिकरणको केन्द्रीय कार्यालयमा समेत केहि महिनौँदेखि मिटरको अभाव रहेको बताएका छन् ।

जिल्लामा मिटर अभावका कारण स्थानीय अँध्यारोमा बस्न बाध्य भइरहेकाले मिटर उपलब्ध गराउन माथिल्लो निकायमा पटक पटक आग्रह गरेको भए पनि कहिलेसम्म मिटर आइपुग्छ भन्ने यकिन नभएको उनको भनाइ छ ।

प्रकाशित मिति: सोमबार, माघ १७, २०७८ २१:३३