‘भएको कुराबाट राम्रो नतिजा ल्याउने मेरो उद्देश्य छ’

A+ A A-

अष्ट्रेलियामा हुने आईसीसी टी-२० विश्वकप क्रिकेटको ग्लोबल छनोटका लागि नेपाली राष्ट्रिय टिम केही दिनपछि ओमान जाँदैछ । नेपाली टिम अहिले अभ्यासमा छ । यसै सन्दर्भलाई लिएर सोमबार नेपाली क्रिकेट टिमका मुख्यप्रशिक्षक पुबुदु दासानायकेले तयारीबारे जानकारी गराएका छन् ।

जूममार्फत सोमबार भएको पत्रकारसँगको अन्तर्क्रिया कार्यक्रममा दासानायकेले जे कुरा उपलब्ध छ, त्यसैबाट नतिजा ल्याउने आफ्नो उद्देश्य रहेको बताए । उनले ग्लोबल छनोटको तयारीका लागि थोरै समय भए पनि राम्रो तयारी गरेको बताए । उनले ६० प्रतिशत तयारी गरिएको भन्दै अब ३० प्रतिशत तयारी गर्नुपर्ने अवस्था रहेको बताए । ग्लोबल छनोट अघि ओमानमा हुने चार देशीय टी-२० श्रृंखलाले नेपाललाई फाइदा हुने बताए ।

उनले नेपालको लक्ष्य विश्वकप भएको भन्दै त्यसका लागि चार देशीय श्रृंखला राम्रो तयारी हुने उल्लेख गरे । उनले चार देशीय श्रृंखलामा नेपालको टिम कम्बिनेसनबारे प्रयोगहरू हुने र त्यसले छनोट खेलका लागि फाइदा हुने विश्वा व्यक्त गरे । तर, नेपालले पछिल्ला केही महिनायता ठूला राष्ट्रहरूसँग क्रिकेट नखेलेको भन्दै चार देशीय श्रृंखला पनि एक चुनौती हुने बताए ।

उनले पहिलो पटक राष्ट्रिय टिममा परेका युवा ब्याटर लोकेश बम र विवेक यादवले ओमानमा मौका पाउनेसमेत बताए । उनले टिमको कम्बिनेसन अनुसार उनीहरूलाई मौका दिइने उल्लेख गरे । बम र यादव नेपाली क्रिकेटका भविष्य भएकोसमेत उनको भनाइ छ ।

मुख्यप्रशिक्षक दासानायकेले जति कुरा गरे पनि टिमले मैदानमा नतिजा ल्याउनुपर्ने भन्दै विश्वकपमा छनोट भए नेपाललाई अवसरको ढोका खुल्ने बताए । विश्वकपमा छनोट भएपछि प्रतियोगिता पनि बढ्ने, अवसर पनि बढ्ने बताए ।

ओमानमा हुने ८ टिम सहभागी ग्लोबल छनोटको फाइनलमा पुग्ने दुई टिम अष्ट्रेलियामा हुने विश्वकपका लागि छनोट हुनेछन् । यसअघि नेपालले पहिलो पटक टी-२० विश्वकप क्रिकेट बंगलादेशमा खेल्दा पनि दासानायके नै मुख्य प्रशिक्षक थिए । नेपालले २०१४ मा विश्वकप खेलेको थियो । त्यसपछि भने नेपाल ग्लोबल छनोट हुन सकेन ।

प्रकाशित मिति: सोमबार, माघ १७, २०७८ २०:२६