सिमेन्ट उद्योगविरुद्ध भ्रष्टाचार मुद्दा दायर भएपछि निजीक्षेत्रको गुनासो : मुद्दाले हतोत्साही बनायो

सिमेन्ट उद्योगविरुद्ध भ्रष्टाचार मुद्दा दायर भएपछि निजीक्षेत्रको गुनासो : मुद्दाले हतोत्साही बनायो

A+ A A-

अख्तियार दुरुपयोग अनुसनधान आयोगले सिमेन्ट उद्योगीविरुद्ध भ्रष्टाचार मुद्दा दायर गरेपछि निजीक्षेत्रका तीन वटा छाता संगठनहरूले आपत्ति जनाएका छन् । नेपाल उद्योग वाणिज्य महासंघ, नेपाल उद्योग परिसंघ, नेपाल चेम्बर अफ कमर्सले सोमबार संयुक्त विज्ञप्ति जारी गर्दै मुद्दा दायार गरेर निजीक्षेत्रलाई हतोत्साही बनाएको बताएका छन् ।

महासंघका अध्यक्ष शेखर गोल्छा नेपाल उद्योग परिसंघका अध्यक्ष विष्णुकुमार अग्रवाल र नेपाल चेम्बर अफ कमर्सका अध्यक्ष राजेन्द्र मल्लले विज्ञप्ति जारी गर्दै कोरोना महामारीका कारण धराशायी बनेको निजीक्षेत्र भर्खर ठाडो उठ्न लाग्दा विभिन्न क्षेत्रबाट प्रहार भएको बताएका छन् । विज्ञप्तिमा भनिएको छ, ‘कोभिड–१९ महामारीबाट विस्तारै तंग्रिन खोजिरहेको निजी क्षेत्रमाथि विभिन्न क्षेत्रबाट निरन्तर प्रहार भइरहेका छन् । यसले नेपालमा लगानी प्रवद्र्धन, रोजगारी सिर्जना र समग्र अर्थतन्त्रको विकास एवं विस्तारमा नकारात्मक प्रभाव पर्नेमा निजी क्षेत्र गम्भीर चिन्ता व्यक्त गर्दछ ।’

२०७२ सालको भूकम्पपछि नेपालमा सिमेन्टको मागमा उच्च वृद्धि भएको र आर्थिक वर्ष २०७२÷०७३ मा ११ अर्ब ७० करोड रूपैयाँ बराबरको, आर्थिक वर्ष २०७३÷०७४ मा २६ अर्ब १० करोड रूपैयाँ बराबरको, आर्थिक वर्ष २०७४÷०७५ मा ३१ अर्ब ७० करोड रूपैयाँ बराबरको सिमेन्ट क्लिङ्कर आयात भएकोमा अहिले नेपाल सिमेन्टमा आत्मनिर्भर भएको उनीहरूको दाबी छ । विदेशी विनिमय सञ्चिति र भुक्तानी सन्तुलनमा समेत सिमेन्ट उद्योगले महत्वपूर्ण योगदान दिएको तर अहिले सिमेन्ट उद्योगीमाथि भ्रष्टाचार मुद्दा दायर गरको भन्दै उनीहरूले आपत्ति जनाएका छन् ।

चुनढुंगा खाजीको अनुमतिभन्दा धेरै परिणाममा उत्खनन् गरेको भन्दै अख्तियारले उद्योग वाणिज्य महासंघका पूर्वअध्यक्ष पशुपति मुरारकालगायतका सिमेन्ट उद्यागीविरुद्ध अख्तियारले मुद्दा दायर गरेको छ ।