सही छः विज्ञापन संघ, व्यवसाय चौपट हुने भोः केवल व्यवसायी

A+ A A-

सरकारले ल्याएको विदेशी टेलिभिजन च्यानलमा विदेशी विज्ञापन राख्न नपाइने (क्लिन फिड) नीतिको सरोकारवालाले पक्ष र विपक्षमा मत जाहेर गरेका छन् ।

नेपाल पत्रकार महासंघ र विज्ञापन एजेन्सी संघले क्लिन फिड नीतिको समर्थन गरेका छन् भने केवल टेलिभिजन सेवा प्रदायक व्यवसायीले यसको विरोध गरेका छन् ।

नेपाल पत्रकार महासंघले सरकारले ल्याएको नीति सही भएको प्रतिक्रिया दिएको छ । सरकारले संसदमा विचाराधीन विज्ञापन विधेयकमा क्लिन फिडको व्यवस्था गरेको विषयलाई महासंघले सकारात्मक रुपमा लिएको हो ।

महासंघका महासचिव रमेश विष्टद्वारा जारी विज्ञप्तिमा सरकारको आमसञ्चार नीति र पत्रकार महासंघले विभिन्न चरणमा अघि सारेको मागपत्र तथा पारित दस्तावेजमा क्लिन फिड व्यवस्था लागू गर्ने विषय उच्च प्राथामिकतामा रहँदै आएको भनिएको छ ।

‘क्लिन फिडले नेपाली सञ्चार माध्यमको दिगो विकासमा महत्त्वपूर्ण सहयोग पुग्छ भन्ने महासंघको विश्वास छ, विज्ञापन विद्येयकमा क्लिन फिड व्यवस्थागरि लागू गर्ने दृढता प्रदर्शन गरेकोमा महासंघ सरकारलाई हार्दिक धन्यवाद ज्ञापन गर्दछ,’ विज्ञप्तिमा भनिएको छ ।

विज्ञापन एजेन्सी संघका अध्यक्ष शशी रिजालले क्लिन फिड नीति सही रहेको प्रतिक्रिया दिए । क्लिन फिड नीति राष्ट्रियता र जनजागरणसँग जोडिएको विषय भएकोले यसको प्रभावकारी कार्यान्वयन हुनुपर्ने उनको भनाइ छ ।

‘क्लिन फिड नीति राष्ट्रियता हो, व्यापार होइन, व्यापारमा नोक्सान हुन्छ भन्ने कसैलाई लाग्छ भने जागिर गर्न गए हुन्छ, २–४ जना व्यवसायीको हित रक्षा गर्न राष्ट्रियता नै धरापमा पार्नुहुदैन,’ अध्यक्ष रिजालले भने ।

संघका निवर्तमान अध्यक्ष सन्तोष श्रेष्ठले पनि क्लिन फिड नीति लागू गर्नैपर्ने भन्दै व्यावसायिक र भावनात्मक रुपमा पनि यो नीति कार्यान्वयनको विकल्प नभएको बताए । संघका पूर्वअध्यक्ष निर्मलराज पौडेलले आफ्नै पहलमा करिब १२ वर्षअगाडि सुरु भएको क्लिन फिड नीति अहिले कार्यान्वयनमा आउन लागेको भन्दै स्वागत गर्नुपर्ने बताए ।

तर, केवल टेलिभिजन सेवा प्रदायकले भने आफूहरुसँग छलफल नै नगरी एकपक्षीय ढंगले कार्यान्वयन गर्न खोजिएको र नीतिले आफूहरुको व्यवसाय नै धरापमा पर्ने प्रतिक्रिया दिए ।

डिसहोम प्रालिका प्रबन्ध सञ्चालक सुदीप आचार्यले आफूहरु क्लिन फिड नीतिको विरोधी नभई यसमा भएका कतिपय प्रावधानको विषयमा प्रस्ट हुन चाहेको बताए ।

‘क्लिन फिड लागू भएपछि विदेशी च्यानलमा स्वदेशी विज्ञापन राख्न पाउने नपाउने प्रस्ट छैन, यस्ता थुप्रै अस्पष्ट प्रावधान छन् । हामीसँग पर्याप्त छलफलबिना ल्याइएको यो नीति कार्यान्वयनले हाम्रो व्यवसाय नै धरापमा पर्छ भन्ने हाम्रो बुझाइ हो,’ आचार्यले भने ।

सुबिसु केबल प्रालिका प्रमुख कार्यकारी अधिकृत विनय साउद पनि आचार्यको जस्तै धारणा राख्छन् ।

‘क्लिन फिड नीति राम्रो हो तर जसरी कार्यान्वयन गर्न खोजिएको छ । त्यसमा हाम्रा केही प्रश्न छन् । हाम्रा जिज्ञासाको समाधान र व्यावहारिक रुपमा हामीले देखेका समस्या समाधान गर्ने पहल सरकारले गरोस्, हामी यसको विरोध गर्दैनौं,’ साउदले भने ।

व्यवसायीका अनुसार केबल टेलिभिजन सेवा प्रदायक व्यवसायमा करिब ५० हजारले रोजगारी पाएका छन् भने वार्षिक १ अर्ब रुपैयाँभन्दा बढी राजस्व उठ्ने गरेको छ । यस्तै, यो क्षेत्रमा २ खर्ब रुपैयाँभन्दा बढी लगानी भएको व्यवसायीको दाबी छ ।

प्रकाशित मिति: बुधबार, असार ११, २०७६ ०७:००