लाइसेन्सको परीक्षा दिन छिटो पालो आउने कार्यालय छानेर फारम भर्न सकिने नयाँ प्रणाली आउँदै

लाइसेन्सको परीक्षा दिन छिटो पालो आउने कार्यालय छानेर फारम भर्न सकिने नयाँ प्रणाली आउँदै

A+ A A-

के तपाईले सवारीचालक अनुमतिपत्र (लाइसेन्स) को अनलाइन आवेदन दिनुभएको छ ? दिनुभएको छ भने कार्यालयमा बायोम्याट्रिक दिनका लागि उपस्थित हुने मिति (भिजिट डेट) पक्कै पनि धेरै पछि होला ।

यातायात व्यवस्था विभागका अनुसार हाल करिब ४ लाख ५० हजार जना आवेदकले परीक्षा दिने पालो पर्खिरहेका छन् । त्यसैगरी, भिजिट डेट ३ वर्ष पछाडि अर्थात् सन् २०२५ सम्मको छ । यो समस्यालाई हटाउन आधुनिक नयाँ प्रणाली लागू गर्न लागिएको यातायात व्यवस्था विभागका आईटी प्रमुख सन्तोष पोखरेलले जानकारी दिए ।

‘हामीले एउटा प्रणाली विकास गरेका छौँ । त्यसमा सेवाग्राहीले फोन नम्बर राखेर युजर आईडी बनाउनुपर्छ । त्यो आईडी बनाउँदा मोबाइलमा आईटीपी कोड आउँछ । त्यो कोड प्रयोग गरी प्रक्रिया पुर्‍याएपछि सजिलै सवारीचालक अनुमतिपत्रको आवेदन र नवीकरणका लागि आवेदन दिन सकिन्छ,’ उनले भने ।

यो प्रणालीमार्फत सेवाग्राहीले कुन कार्यालयमा कोटा सकियो, कुनमा आवेदन दिँदा छिटो पालो आउँछ सबै हेरेर आवेदन दिन सक्ने उनले जानकारी दिए ।

‘अहिले अन्योलको अवस्था छ । दैनिक परीक्षाको कोटा ५ सय भएको कार्यालयमा कहिले २ सय जना पनि नपुुग्ने र सेवाग्राहीहरूले भने चाहेर पनि परीक्षा दिन नपाउने अवस्था छ,’ उनले भने, ‘उदाहरणका लागि काठमाडौं उपत्यकाका सेवाग्राहीले आवेदन दिनुपर्‍यो भने एकान्तकुना, चाबहिल, जगाते, ठूलो भर्‍याङ, कुनमा कोटा बाकीँ छ र कुनमा गर्दा भिजिट डेट चाँडो आउँछ हेरेर आवेदन दिन सक्नहुन्छ ।’

यो प्रणालीमार्फत भिजिट डेट पर भएकाको पनि अगाडि तानिने उनले जानकारी दिए ।

‘कुनै कार्यालयमा कुनै दिन कार्यालयले तोकेको कोटाभन्दा थोरै मात्र सेवाग्राहीले आवेदन भरेका छन् भने पछाडि डेट भएकाहरूलाई सिस्टमले तानेर अगाडि ल्याउन सकिन्छ । यस्तो अवस्थामा सेवाग्राहीलाई एसएमएसमार्फत जानकारी दिने सोच बनाइरहेका छौँ,’ उनले शिलापत्रसँग भने ।

सिस्टमले नै खाली रहेको कोटामा पुराना आवेदनलाई अघि सार्ने भएकाले सम्भावित अनियमितता नहुने विभागको विश्वास छ । ‘सिस्टमले स्वचालित रूपमा काम गर्ने भएकाले खाली कोटामा कसैले नयाँ मान्छेको आवेदन छिराउन मिल्दैन । यसो हुँदा अनियमितता हुने सम्भावना हट्छ,’ पोखरेलले भने ।

त्यसैगरी, यो प्रणाली सुरु भएपछि रक्त समूह, जन्ममितिलगायतको सामान्य गल्ती सेवाग्राही आफैँले मिलाउन सकिनेछ । यो प्रणालीको आगामी आइतबार परीक्षण गरिने र सकेसम्म फागुनको पहिलो हप्तादेखि नै लागू गर्ने विभागको तयारी छ ।

प्रकाशित मिति: आइतबार, माघ १६, २०७८ १९:१७