स्थानीय सरकारका बजेटः आलु खेतीदेखि नमुना बस्ती

A+ A A-

जिल्लाका स्थानीय तहले आगामी आर्थिक वर्षको नीति, कार्यक्रम तथा बजेट धमाधम सार्वजनिक गरिरहेका छन् । ३ नगर र ९ गाउँपालिकासहित १२ स्थानीय तहमध्ये ९ पालिकाले आव ०७६/०७७ को नीति, कार्यक्रम तथा बजेट ल्याइसकेका छन् ।

स्थानीय तहको निर्वाचनपछिका दुई आर्थिक वर्ष अलमलमा बिताएका पालिकाले यसपटक भने परिष्कृत कार्यक्रम ल्याएका छन् । केही स्थानीय तहले महत्त्वाकांक्षी एवं लोकप्रिय कार्यक्रमसमेत अघि सारेका छन् ।

‘दुई वर्ष सिकाइको चरणले अलमलमा बितायौं । तेस्रो वर्ष मौलिक कार्यक्रम ल्याएका छौं,’ स्थानीय तहका प्रमुख तथा अध्यक्षको सामूहिक भनाइ छ, ‘कार्यान्वयमा तहमा खरो उत्रन सके यो काम देखाउन सक्ने वर्ष बन्नेछ ।’

स्थानीय तहमा जनप्रतिनिधि आएपछि ल्याएको यो तेस्रो नीति तथा कार्यक्रम हो । सबै स्थानीय तहले चालू आर्थिक वर्षका लागि ल्याएको नीति तथा कार्यक्रमबाट जनताले विकासकाे महसुुस गर्ने बताइएकाे छ ।

संघीय सरकारले सबै स्थानीय तहलाई १० असारभित्र अनिवार्य बजेट तथा नीति र कार्यक्रम सार्वजनिक गर्न निर्देशन दिएको थियो । केही स्थानीय तह तयारी पूरा नभएको भन्दै केही दिनभित्र कार्यक्रम ल्याउने तयारीमा छन् । गत वर्षको जस्तो तामझामबेगर नै स्थानीय तहले नीति, कार्यक्रम र बजेट सार्वजनिक गरेका छन् ।

स्थानीय तहले ‘मौलिक’ नीति कार्यक्रमसमेत ल्याएका छन् । अघिल्लो वर्ष नीति तथा कार्यक्रम एकातिर र बजेट एकातिर हुन्थ्यो । यसपटक नीति तथा कार्यक्रम र बजेट मेल खाने गरी ल्याएका छौं,’ लिसंखुपाखर गाउँपालिका अध्यक्ष कमल नेपालले भने ।

‘यो वर्ष ल्याएको नीति तथा कार्यक्रम गाउँपालिकाको दीर्घकालीन लक्ष्य समेटिने छ,’ बलेफी गाउँपालिका अध्यक्ष केदार क्षेत्रीले भने ।

जिल्लाका १२ स्थानीय तहमध्ये लिसंखुपाखर, बलेफी, जुगल, इन्द्रावती, हेलम्बु, पाँचपोखरी र त्रिपुरासुन्दरी गाउँपालिकाले संघीय सरकारले तोकिएको समयसीमाभित्रै नीति तथा कार्यक्रम र बजेट सार्वजनिक गरेका छन् ।

त्यस्तै, चौतारा साँगाचोकगढी र मेलाम्ची नगरपालिकाले पनि निर्धारित मितिमा नै नीति तथा कार्यक्रम सार्वजनिक गरेका छन् ।

बाह्रविसे नगरपालिकाले शुक्रबार नीति तथा कार्यक्रम ल्याउँदै छ भने सुनकोसी र भोटेकोसी गाउँपालिकाले असारभित्रै नीति तथा कार्यक्रम र बजेट ल्याउने तयारी गरेका छन् ।

स्थानीय सरकारले शिक्षा, सडक र कृषिलाई प्राथमिकतामा राखेका छन् । बलेफी गाउँपालिकाले स्थानीयलाई सहज बनाउन ५ लाखसम्मका योजना वडामा नै सम्झौता गर्ने नीति ल्याएको छ ।

जुगल गाउँपालिकाले १० लाखदेखि माथिका योजना ठेक्का प्रक्रियामार्फत गरिने नीति तथा कार्यक्रममा समेटिएको छ ।

जुगल गाउँपालिकाले नांगाे तारमुक्त गाउँपालिका बनाउने अभियानको सुरुवात गर्ने भएको छ भने जुगलको आलुलाई ब्रान्डिङ गरेर बिक्री वितरण गर्ने नीति तथा कार्यक्रममा अघि सारेको छ ।

गाउँपालिकाका एक सय जनालाई एक सय दिनसम्म रोजगार दिने अभियान पनि जुगल गाउँपालिकाले सञ्चालन गर्ने भएको छ ।

बलेफी गाउँपालिकाले नमुना बस्ती निर्माणका लागि जग्गा एकीकरण योजना ल्याउने नीति अघि सारेको छ ।

सबै वडाको राजस्व संकलनलाई विद्युतीय बिलिङ सिस्टमबाट गाउँपालिकासँग इन्टरलिंक गर्ने गाउँपालिकाको नीति तथा कार्यक्रममा समेटिएको छ ।

लिसंखुपाखर गाउँपालिकाले कृषिलाई प्रमुख प्रथमिकतामा राखेको छ । गाउँपालिकाभित्रका कृषकलाई प्रोत्साहनका लागि १ प्रतिशत ब्याजदरमा कृषि ऋण प्रदान गर्नै नीति अघि सारेको छ ।

चौतारा साँगाचोकगढी नगरपालिकाको नीति तथा कार्यक्रम गत वर्षको भन्दा निकै प्रभावकारी रुपमा अघि सारेको छ । शिक्षा, स्वास्थ्य, खानेपानी र कृषिलाई प्रथमिकतामा राखेर नीति तथा कार्यक्रम अघि सारेको छ ।

हेलम्बु गाउँपालिकाको अभियान, नमुना गाउँपालिकाको निर्माण भन्ने मूल नारा हेलम्बु गाउँपालिकाले अघि सारेको छ । हेलम्बु हिमालयन पदमार्ग निर्माण गरेर चर्चामा आएको हेलम्बु गाउँपालिकाले निकै महTत्वपूर्ण योजना नीति तथा कार्यक्रममा अघि सारेको छ ।

स्थानीयको आय स्तरमा वृद्धि गर्न एक घर एक सेयर नीति सुरु गरेको छ । गाउँपालिकाभित्र जलविद्युत् आयोजनालगायत अन्य आयोजनामा स्थानीयलाई सेयर दिने नीति गाउँपालिकाले ल्याएको छ ।

त्रिपुरासुन्दरी गाउँपालिकाले पनि यो वर्ष कृषि, शिक्षा र स्वास्थ्यलाई प्राथमिकतामा राखेर नीति तथा कार्यक्रम ल्याएको छ ।

पाँचपोखरी थाङपाल गाउँपालिकाले पनि आगामी आर्थिक वर्षको नीति तथा कार्यक्रम सार्वजनिक गरेकाे छ । गाउँपालिकाले सडक, शिक्षा र पर्यटनलगायतका क्षेत्रलाई प्राथमिकतामा राखेको छ ।

मेलम्ची नगरपालिकाले पनि आउने आर्थिक वर्षको नीति तथा कार्यक्रमममा शिक्षा, स्वास्थ्य, कृषि र पर्यटनलाई प्रमुख प्राथमिकतामा राखेर नीति तथा कार्यक्रम ल्याएको छ ।

प्रकाशित मिति: बुधबार, असार ११, २०७६ ०४:२४