घरेलु दर्शकका अगाडि मौरिससमाथि नेपालको ऐतिहासिक जित

A+ A A-

काठमाडौंस्थित दशरथ रंगशालामा भएको मौरिसससँगको मैत्रीपूर्ण फुटबल खेलमा नेपालले जित हात पारेको छ । नेपालले १-० गोल अन्तरले मौरिससलाई पराजित गरेको हो ।

नेपालको जितमा लामो समयपछि राष्ट्रिय टिममा कमब्याक गरेका स्ट्राइकर विमल घर्तीमगरले खेलको ५४औँ मिनेटमा गरेको गोल निर्णायक रह्यो ।

पहिलो हाफ गोलरहित बराबरीमा सकिएको थियो । दोस्रो हाफ सुरु भएपछि नेपालले आक्रामक खेल प्रस्तुत गरेको थियो ।

कोरोनाका कारण दर्शकहरू मुखमा मास्क लगाएर रंगशाला पुग्दा ज्वरो नापेरमात्र भित्र जान पाएका थिए । स्वास्थ्य सुरक्षा मापदण्ड पूरा गरेर रंगशाला पुगेका दर्शकलाई नेपाली खेलाडीले जितको उपहार दिए ।

निर्धारित ९० मिनेटको खेल सकिएपछि थप भएको अतिरिक्त समयको तेस्रो मिनेटमा खेल सकिएको सिट्ठी बज्दा नेपाली दर्शकहरूले हुटिङ गरेर नेपाली खेलाडीको सम्मान गरे । नेपाली खेलाडीहरू भने अफ्रिकी मुलुकमाथि पहिलो जित हात पारेको सेलिब्रेसनमा झुम्मिए ।

शनिबार खेल हुनुअघि नेपालका कप्तान किरण चम्जोङले मौरिसससँगको खेल नेपालका लागि नयाँ अनुभूति हुने बताएका थिए । शनिबार पहिलो मैत्रीपूर्ण खेल सकिँदा उनले भने जस्तै नेपालले नयाँ अनुभूति मात्र प्राप्त गरेको छैन, अफ्रिकी मुलुकलाई घरेलु मैदानमा पराजित गरेको गौरवपूर्ण इतिहास रचेको छ ।

त्यसमाथि नेपालले फिफा वरीयतामा आफूभन्दा माथि रहेको टिमलाई पराजित गरेको हो । नेपालले फिफा वरीयताको १६९औँ स्थानमा छ भने मौरिसस १४७औँ स्थानको टिम हो ।

नेपाली फुटबल टिमका मुख्य प्रशिक्षक अब्दुल्ला अलमुताइरीले नेपाली टिम सम्हालेपछि उनले युवाहरूलाई मौका दिइरहेका छन् । र युवा खेलाडीले आफूलाई प्रमाणित पनि गरेका छन् । मुख्यप्रतिशक्षक अलमुइतारीले मौरिसससँग नेपालले जित हात पारे त्यसको श्रेय खेलाडीलाई जाने र पराजित भए त्यसको जिम्मेवारी आफूले लिने बताएका थिए ।

शनिबार दशरथ रंगशालामा नेपाली टिम उत्रिँदा प्रशिक्षक अलमुइतारीले देखाएको विश्वासअनुरुप खेलाडीले कलात्मक खेल पनि प्रस्तुत गरे । अलमुइतारीले खेलाडीमाथि विश्वास गरेर नै श्रेय उनीहरूलाई जाने बताएका थिए । शनिबार खेलाडीहरूले प्रशिक्षकको विश्वासलाई सही सावित गरिदिएका छन् ।

प्रकाशित मिति: शनिबार, माघ १५, २०७८ १८:५३