जब अमिताभ बच्चन ऋणमा चुर्लुम्म डुबे...

A+ A A-

बलिउड अभिनेता अमिताभ बच्चनका सफलता र चर्चाको पाटोबारे धेरै जानकार छन् । तर, उनी कुनै समय खराब दिनबाट पनि गुज्रेको थिए । यो थाहा पाउन अमिताभको २० वर्षअघिको जीवनमा फर्कनुपर्छ ।

सन् १९९९ मा अमिताभ बच्चन कर्पोरेसन लिमिटेड (एबीसीएल) ले ठूलो घाटा बेहोर्नुपरेको थियो । कम्पनीको उत्पादन, वितरण र इभेन्ट म्यानेजमेन्टमा बारम्बार असफलताका कारण अमिताभ ऋणमा डुबेका थिए ।

२०१३ मा दिएको एक अन्तर्वार्तामा अमिताभले कठिन समयबारे स्मरण गरेका थिए । उनले कसरी ऋणदाताहरू पैसा उठाउन घर पुग्थे र धम्की दिन्थे भन्नेबारे खुलाएका थिए ।

अमिताभले अन्ततः फिल्म 'मोहब्बतें' र उनको टेलिभिजन डेब्यू 'कौन बनेगा करोडपति' को सफलतापछि यी कठिनाइ पार गरे ।

अमिताभका अनुसार मानिसहरूले पैसा मात्रै फिर्ता माग्दैनथे, एक पटक केही मानिस घर लिलामी गर्नसमेत आएका थिए । साहुहरूले गालीगलौज र धम्की दिने गर्थे । उनले अन्तर्वार्तामा आफ्नो ४४ वर्षको व्यावसायिक करिअरमा यस्तो खराब समय कहिल्यै नभोगेको बताएका थिए ।

अमिताभ भन्छन्, 'मैले ऋण कसरी तिर्ने भन्ने सबै विकल्प सोचेँ । यसका लागि त मैले अभिनय मात्र गर्न सक्छु भन्ने बुझेँ । त्यसपछि म सिधै यश चोपडाजीकहाँ गएँ र कामको लागि सोधेँ ।'

यश चोपडा अमिताभ बच्चनको घर नजिकै बस्छन् ।

जब यश चोपडा फिल्मको लागि भूमिका खोज्दै थिए, अमिताभ उनीसँग काम माग्न पुगे । यश चोपडाले उनलाई फिल्म ‘मोहब्बतें’का लागि साइन गरेका थिए । २७ अक्टोबर २००० मा रिलिज भएको रोमान्टिक फिल्म 'मोहब्बतें' बक्स अफिसमा ब्लकबस्टर साबित भयो ।

यस फिल्ममा अमिताभका साथै शाहरुख खान र ऐश्वर्या राय मुख्य भूमिकामा देखिएका थिए । समय यस्तो थियो, अधिकांश निर्माता अमिताभलाई कास्ट गर्नबाट पन्छने गर्थे ।

फिल्म ‘मोहब्बतें’ पछि मात्रै अमिताभको जीवन लयमा आउन थालेको थियो । यसैबीच, अमिताभलाई 'कौन बनेगा करोडपति'को हिन्दी संस्करण होस्ट गर्ने प्रस्ताव आयो । अमिताभ यो शो गर्न राजी भए ।

यो रियालिटी शो को रेटिङ सधैँ राम्रो छ । यस शो मार्फत् अमिताभले टीभीको दुनियाँमा छुट्टै पहिचान बनाए ।

अमिताभका आगामी फिल्मका सूचीमा झुण्ड, ब्रह्मास्त्र, मे डे र अलविदा छन् ।

प्रकाशित मिति: शनिबार, माघ १५, २०७८ ०७:२९