बझाङमा वडा कार्यालयमा तोडफोड र आगजनी

A+ A A-

नेत्रविक्रम चन्द विप्लव नेतृत्वको नेकपाले गरेको नेपाल बन्दको प्रभाव बझाङमा बिहानैदेखि देखिएको छ ।

बन्दका कारण बझाङको जनजीवन बिहानैदेखि प्रभावित भएको हो । बन्दका कारण लामो तथा छोटो दूरीका यातायातका कुनै पनि साधन नचलेकाे अस्थायी ट्राफिक चेक पोस्ट सिमखेतले जनाएको छ ।

त्यस्तै, विप्लव नेकपाले गरेको बन्दका क्रममा विभिन्न स्थानीय तहमा शंकास्पद वस्तु फेला परेको छ भने केही स्थानमा आगजनीसमेत भएकाे छ । बिहान ४ बजे वित्थडचिर गाउँपालिकाको ६ नम्बर वडा कार्यालयमा विप्लव समूहले आगजनी र तोडफोड गरेको छ । आगजनीबाट वडा कार्यालयका सम्पूर्ण कागजात नष्ट भएको वडा अध्यक्ष तथा गाउँपालिकाका प्रवक्ता हर्क धामीले बताए ।

उनका अनुसार कागजात जलाइएपछि नियमित कार्यालयको कामकाज ठप्प भएको छ । यस्तै, वडा नम्बर ६ मा रहेको भगवती प्राविको कक्षाकोठामा समेत तोडफोड गरी टेबलकुर्सी जलाइएको अध्यक्ष धामीले बताए ।

यस्तै, जयपृथ्वी नगरपालिका वडा नम्बर ३ को कार्यालयमा आगजनीको प्रयास भएको छ । अज्ञात समूहले बिहान ४ बजे वडा कार्यालयको ढोकामा पेट्रोल छर्केर आगो लगाएको वडा नम्बर ३ का वडा अध्यक्ष कलक ओलीले बताए ।

वडा कार्यालय पडेस गाउँनजिकै भएका कारण स्थानीयले तत्कालै थाहा पाएपछि आगो नियन्त्रणमा लिएको उनले बताए । आगलागीबाट वडा नम्बर ३ को मूल ढोकामा सामान्य क्षति पुगेको वडा अध्यक्ष ओलीले बताए ।

यस्तै, बुंगल नगरपालिका वडा नम्बर ११ मा समेत शंकास्पद वस्तु राखिएको छ । वडा नम्बर ११ को मूल ढोकामा जीआई पाइपबाट मोबाइलको ब्याट्रीमा तार बेरेर वडा कार्यालयभित्र दुईवटा तार लगिएको वडा नम्बर ११ का वडा सदस्य नबहादुर पातलीले बताए ।

उनका अनुसार कसले राखेको हो भन्ने केही पनि जानकारी नभएको तर अहिले सो कुराको जानकारी सुरक्षा निकायलाई गराएको उनले बताए ।