साताभर ओरालो लागेको नेप्सेमा सामान्य वृद्धि, कारोबार भने ३ अर्बमै सीमित

A+ A A-

कारोबारको अन्तिम दिन बिहीबार नेप्से परिसूचकमा हरियाली छाएको छ । प्रिओपन सेसनबाट नै बढ्न सुरु गरेको परिसूचक ३.३३ अंकले बढेर २७७९.९८ बिन्दुमा पुगी बजार बन्द भएको हो । यस्तै, सेन्सेटिभ इन्डेक्स पनि ०.३८ अंकले बढेर ५१८.७२ बिन्दु कायम भएको छ ।

आज बजार बढेसँगै सातवटा समूहका सूचक बढेका छन् भने छवटा समूहका सूचक घटेका छन् । सर्वाधिक ननलाइफ इन्स्योरेन्स समूहको १.०५ प्रतिशतले बढेको छ भने सर्वाधिक होटल्स र पर्यटक समूहको ०.६९ प्रतिशतले घटेको छ ।

बिहीबार कारोबारमा आएका २२४ वटा कम्पनीको ३ अर्ब ३४ करोड ३४ लाख रुपैयाँबराबरको ६६ लाख ७५ हजारभन्दा बढी कित्ता शेयर खरिदबिक्री भएको छ ।

आज विन नेपाल लघुवित्त र बुद्ध भूमि नेपाल हाइड्रोपावरको शेयर मूल्यमा सकारात्मक सर्किट लागेको छ । उक्त कम्पनीको शेयर मूल्य क्रमशः प्रतिकित्ता १ हजार ३ सय ३८ रुपैयाँ र ५ सय ९ रुपैयाँ कायम भएको छ ।

यस्तै, सर्वाधिक शेयर कारोबार भने नेसनल लाइफ इन्स्योरेन्सको २० करोड २ लाख कित्ता भएको छ भने शेयर मूल्य प्रतिकित्ता १ हजार १ सय ३१ रुपैयाँ कायम भएको छ ।

गत आइतबार दोहोरो अंकले गिरावट आएको बजारले सोमबार पनि निरन्तरता पाएको थियो । आइतबार २९२०.५१ बिन्दुमा पुगेर बन्द भएको बजार सोमबार १०० अंकले घटेर २८२०.४१ बिन्दुमा झरेको थियो । साथै, कारोबार रकम भने आइतबारको तुलनामा सोमबार बढी भएको थियो ।

यस्तै, कारोबारको तेस्रो दिन मंगलबार भने झिनो ५.५९ अंकले ओरालो लागेको बजार २८१५.०६ बिन्दुमा पुगेर बन्द भएको थियो । बजार घटेसँगै यस दिन कारोबार रकममा पनि गिरावट आएको थियो । अघिल्लो दिन सोमबार ८ अर्ब ८८ करोड रुपैयाँबराबरको शेयर कारोबार भएकोमा मंगलबार भने ५ अर्ब ३९ करोडमा झरेको थियो ।

यसरी साताको पहिलो दिनबाटै निरन्तर ओरालो लागेको बजारमा बुधबार पनि बढ्ने कुनै छाँटकाँटै थिएन । बुधबार ३८.४२ अंकले घट्यो बजार । यस दिन कारोबार रकम ४ अर्ब ३१ करोडमा झर्दा ९ करोड ३५ लाख कित्ता शेयर खरिदबिक्री भएको थियो ।

प्रकाशित मिति: बिहीबार, माघ १३, २०७८ १६:००