विद्युत् नियमन आयोग नेतृत्वविहीन बन्दा जलविद्युत् व्यवसायी मर्कामा

A+ A A-

विद्युत् नियमन आयोग विगत २५ दिनदेखि नेतृत्वविहीन छ । कार्यसम्पादनलाई लिएर छानबिन हुनुपर्ने माग राखिएपछि मन्त्रिपरिषद्‌द्वारा गठित छानबिन समितिले २५ दिन भइसक्दासमेत प्रतिवेदन नबुझाउँदा आयोग नेतृत्वविहीन बन्न पुगेको हो ।

२१ पुसमा ऊर्जा, जलस्रोत तथा सिँचाइमन्त्री पम्फा भुसालले अध्यक्षसहित अन्य दुई जनाको कार्यसम्पादनमा प्रश्न उठाउँदै छानबिनका लागि मन्त्रिपरिषद्‌मा सिफारिस गरेकी थिइन् । मन्त्रिपरिषद्‌बाट समिति गठन भएसँगै तीनै जना स्वतः निलम्बनमा परेपछि जलविद्युत्‌सँग सम्बन्धित सबै काम ठप्प भएका हुन् ।

निलम्बनमा परेका आयोगका अध्यक्ष दिल्लीबहादुर सिंह, सदस्यद्वय रामेश्वर कलवार र भागीरथी ज्ञवालीको कार्यसम्पादन तथा कार्यकालमा गरेका निणर्यहरूको अध्ययन प्रतिवेदन मन्त्रिपरिषद्‌मा १५ दिनभित्र बुझाउनुपर्ने भए पनि छानबिन समितिले झण्डै एक महिना हुन लागिसक्दासमेत बुझाउन सकेको छैन ।

आयोजनाका कामहरू ठप्प भएको भन्दै जलविद्युत् व्यवसायीहरू तत्काल समस्या समाधान नगरे जलविद्युत् क्षेत्र नै धराशायी हुने गुनासो गर्दै आएका छन् । व्यवसायीहरूले काम नरोक्न माग राख्दै आए पनि छानबिन समितिको प्रतिवेदन समयमै नआउँदा आयोगमै काम अड्किन पुगेको हो ।

जलविद्युत् व्यवसायी सूर्यप्रसाद अधिकारी आयोगमा नेतृत्व नहुँदा जलविद्युत् आयोजनाहरूको काम अड्किएको गुनासो गरे । ‘झण्डै एक महिनादेखि जलविद्युत्‌सम्बन्धी कुनै पनि काम अगाडि बढ्न सकेको छैन,' अधिकारीले भने, 'यसले जलविद्युत् व्यवसायीमा खर्च भार बढाउँदैछ ।’

छानबिन समितिले समयमा नै प्रतिवेदन नबुझाउँदा आयोग नेतृत्वविहीन अवस्थामा छ । यसले जलविद्युत् आयोजनाले पुँजी वृद्धि गर्न, व्यावसायिक बिजुली उत्पादन गरी राष्ट्रिय प्रसारण लाइनमा जोडिने (आरसीओडी), विद्युत् खरिदबिक्री सम्झौता (पीपीए), आईपीओ, हकप्रद, साधारणसभाबाट आईपीओ स्वीकृतलगायतका काम गर्न पाएको छैन ।

प्रकाशित मिति: बिहीबार, माघ १३, २०७८ १२:०२