पर्खनेहरू देखेपछि देवेन्द्रले भने- म त पर्खेको पर्ख्यै छु...!

A+ A A-

‘म त पर्खेको पर्ख्यै छु...!’

केही दिनयता धेरैले लयका साथ गुनगुनाइरहने शब्द हो यो । टिकटक तथा सामाजिक सञ्जालमा पनि उत्तिकै चर्चा देखिन्छ ।

पर्खिरहनेहरूको पीडालाई शब्दमा बुनेका गायक देवेन्द्र बब्लुले यसलाई संगीतबाट व्यक्त गरे । ६ जनवरीमा युट्युबमार्फत सार्वजनिक भएको गीत ‘म त पर्खेको पर्ख्यै छु’ले ३० लाखभन्दा बढी भ्युज कमाइसकेको छ ।

कतिपयलाई लाग्छ, जीवनमा पर्खनुजत्तिको पीडा अरु केही हुन्न । तर पनि मानिसहरू पर्खिरहन्छन् । किनकि पर्खनेहरूसँग अपेक्षा हुन्छ ।

'त्यो अपेक्षा कस्तो हुन्छ ?'

लकडाउनको बेला गाउँ गएर बसेका देवेन्द्रले अनुभूति गरे । परदेशिएका श्रीमान् कहिले फर्केलान् भनेर बाटो कुरिरहेकी छिमेकी काकीको फोन संवाद उनले सुने । महामारीको जगजगी बनिरहेको समयसँग तर्सिरहेकी काकीले काकालाई भनिन्, ‘लकडाउन भइरह्यो भने म त पर्खेको पर्ख्यै हुँला है !’

यो शब्दले देवेन्द्रलाई तरंगित बनायो । तत्कालै उनले यो शब्द डायरीमा टिपे । शब्दहरू फुर्दै गएपछि एउटा अन्तरा पूरा भयो-

‘बतास बनी छुन आइदेऊ न
फेरि मेरै हुन आइदेऊ न
म त पर्खेको पर्ख्यै छु...!’

तीन महिनाअघि देवेन्द्रले गीत पूरा गरे । अनि आफ्नै कम्पोज र आवाजमा गीत रेकर्ड गरे । करिब ६ मिनेट ४१ सेकेण्डको गीतमा देवेन्द्रले सुरुमै भन्छन्, ‘छोडेर जानेहरूको यादमा, पर्खनेहरूको एउटा पीडा ।’

गीत सुनिसकेपछि देवेन्द्रलाई प्रतिक्रियाहरू आए । कतिले आफ्नै कथा शब्दमा उतार्‍यौ भनेर तारिफ पनि गरे ।

गीतको शब्द मर्मस्पर्शी छ । संगीत र आवाजले गीत नसकिउञ्जेल पर्खिरहन बाध्य बनाउँछ । गीतले पर्खनेहरूको निराश मनस्थितिलाई चित्रण गर्छ । गीतको भिडियोमा एक प्रेमीको मनोदशालाई प्रस्तुत गरिएको छ ।

पर्खेको मान्छे फर्कन्छ फर्कन्न निश्चित छैन । तर पनि पर्खिरहेको छ एउटा प्रेमी ।

‘छुन छोड्यो रक्सीले नि बाँचौँ के को भरमा
ज्यान अडिन्न बाहिर पनि मन अडिन्न घरमा
मुस्कान बनी ओठमा आइदेऊ न
मलम बनि चोटमा आइदेऊ न
म त पर्खेको...!’

गीतको भिडियोमा दीप सागर र रोशनी कार्की फिचर्ड छन् भने भिडियोलाई विशाल घिमिरेले निर्देशन गरेका छन् ।

तर, गीतको भिडियोमा नयाँपन देखिन्न । सधैँ बारमा गइरहने केटा पात्रको केटी पात्रसँग भेट हुन्छ । एकाध भेटपछि उनीहरूबीच प्रेम सुरु हुन्छ । अचानक एक दिन केटी पात्रले ‘अबदेखि आफू त्यहाँ नआउने’ पत्र पठाउँछिन् ।

केटा पात्र एक्लो हुन्छ । त्यसपछि विगतका प्रेमिल दृश्यहरू सम्झेर दुःखी बन्छन् ।

यो कथाले पर्खिरहेको कुरा स्पष्टसँग बताउँदैन । गीतमा जस्तो भिडियो हेर्दा दर्शकले पीडा महसुस गर्न पाउँदैनन् । आइरहने पात्र अचानक आउन छाड्छिन्, त्यतिमै केटा पात्र रोनाधोना गरिरहेको दृश्य मात्र छ ।

उनले गर्नुपर्ने थप प्रयत्न अरु हुन्थे होला, तर मदिरा र चुरोटको धुवाँसँगै उनले खसालेको आँसुलाई प्राथमिकता दिइएको छ ।

प्रेम, सम्बन्धसँगै जोडिएर आउने जीवनका मसिना पाटाहरू हुन्छन् । ती कुरा भिडियोमा देखिन्न । पर्खनुको पीडा र व्यक्तिको मनोदशालाई हल्का ढंगबाट प्रस्तुत गरिएको देखिन्छ ।

भिडियो: