यातायात कार्यालयका सेवामा कटौती, लाइसेन्सको परीक्षा पनि प्रभावित

A+ A A-

कोरोना संक्रमण बढेसँगै यातायात कार्यालयहरूले सेवा कटौती गर्न थालेका छन् । कर्मचारीलाई कोरोना संक्रमण भएको तथा सम्भावित संक्रमणबाट जोगाउन सेवा कटौती गरिएको कार्यालयहरूले जनाएका छन् ।

१०-१२ जना कर्मचारीमा संक्रमण पुष्टि भएपछि आइतबारदेखि सेवा कटौती गरिएको यातायात व्यवस्था कार्यालय एकान्तकुनाकी निमित्त कार्यालय प्रमुख सुनिता भट्टराईले जानकारी दिइन् । ‘कोरोना संक्रमण बढेको र कमर्चारी नै संक्रमित भएकाले सेवा कटौती गरेका हौं । अहिले प्रत्यके दिन एक सयलाई टोकन दिएर लाइसेन्स नवीकरणको काम मात्र गरिरहेका छौँ । नवीकरण पनि म्याद गुज्रिन लागेका र विदेश जान लागेकाहरूलाई प्राथमिकतामा राखेका छौँ,’ उनले भनिन् ।

जिल्ला प्रशासन कार्यालयको निर्देशन अनुसार सेवा कटौती गर्नु परेको यातायात व्यवस्था कार्यालय, जगातीका कार्यालय प्रमुख राजकुमार कपालीले जानकारी दिए । ‘कार्यालय आसपासका मान्छेहरूले प्रशासन कार्यालयमा उजुरी गरेका रहेछन् । पहिल्यै फारम दर्ता गरेकाले परीक्षा लिनै पर्‍यो । सीडीओले नै भन्नु भएकाले बिहीबारदेखि अधिकांश सेवा बन्द गर्दैछौँ,’ उनले शिलापत्रसँग भने ।

नवीकरण, राजश्व बुझाउने, प्रतिलिपी र लाइसेन्स वितरण भने टोकन बाँडेर निश्चित संख्यामा काम हुने उनले जानकारी दिए । अर्को आदेश नआएसम्म भिड हुने सेवा नदिने उनले बताए ।

तर, यातायात व्यवस्था कार्यालय भने पर्ख र हेरको अवस्थामा छ । कार्यालयका कमर्चारीमा संक्रमण नदेखिएकाले काम भने सुचारु रहेको कार्यालय प्रमुख विष्णु भट्टराई बताउँछन् । सरकारले तोकेको मापदण्ड अपनाएर सेवा दिइरहेको यातायात व्यवस्था कार्यालय ठूलो भर्‍याङका कार्यालय प्रमुख सञ्जय थापाले बताए ।

यातायात कार्यालयको काम रोकिँदा सवारी चालक अनुमतिपत्रको फारम भरेर बसेका ३ लाख ५० हजार परीक्षार्थी प्रभावित हुने यातायात व्यवस्था विभागका प्रवक्ता डा. लोकनाथ भुसालले जानकारी दिए । ‘यातायात कार्यालय प्रदेश अन्तर्गत भएकाले हामीले कुनै निर्देशन त दिन मिल्दैन । संक्रमणको अवस्था हेरेर कार्यालयको काम व्यवस्थापन गर्नुभएको होला,’ उनले भने ।

सकेसम्म सेवाग्राहीलाई समस्या नपर्ने गरी सेवा प्रवाह गर्न यातायात कार्यालयलाई निर्देशन दिइएको भौतिक, पूर्वाधार विकास तथा यातायात मन्त्रालय, बागमतीका सूचना अधिकारी राजन पोखरेलले जानकारी दिए । कार्यालयलाई सकेसम्म अत्यावश्यक सेवा नरोकी सेवा व्यवस्थापन गर्न सुझाव दिएको उनले बताए ।

प्रकाशित मिति: बुधबार, माघ १२, २०७८ १४:५२