धादिङमा कवि सुवानन्द दासको मूर्ति अनावरण

A+ A A-

नेपालका 'प्रथम कवि' मानिएका सुवानन्द दासको प्रतिमा (मूर्ति) अनावरण गरिएको छ । धादिङको नेत्रावती डबजोङ गाउँपालिका-५ स्थित कटुन्जेमा कवि दासको मूर्ति अनावरण गरिएको हो । सांसद खेमप्रसाद लोहनी, पालिका अध्यक्ष दुर्गकुमार शाक्य, साहित्यकार तथा अनुसन्धाता डा.नवीनवन्धु पहाडी एवं कवि राजु झल्लु प्रसादले संयुक्त रूपमा मूर्ति अनावरण गरेका हुन् ।

वि.सं. १८२५ आसपास कवि सुवानन्दले रचना गरेको पृथ्वीनारायण शाह (राजैभक्तिकृत) कविता नेपाली भाषाको पहिलो कविता मानिएको छ, जुन कविता इतिहासकार बाबुराम आचार्यले सङ्कलन गरेका थिए । पृथ्वीनारायण शाहसँग सम्पर्क र सम्बन्ध भएकै कारणले दासले नेपाली भाषाकै प्रथम कविता पृथ्वीनारायण शाह (राजैभक्तिकृत) रचना गरेको डा. पहाडीले उल्लेख गरे ।

'इतिहासकार आचार्यले सुवानन्द दासकृत पहिलो कवि हुन् भनेर बताउनुभएको थियो, घटराज भट्टराईले नेपाली भाषाकै पहिलो कविता पृथ्वीनारायण शाह (राजैभक्तिकृत) हो भन्नुभएको थियो तर, दासको जन्म कहाँ र कहिले भएको थियो भन्नेबारे उहाँहरूले खुलाउनु भएको थिएन,' डा. पहाडीले भने, 'नेपाल प्रज्ञा प्रतिष्ठानको सहयोगमा मैले अनुसन्धानले गर्दा दासको जन्म धादिङको कटुञ्जेमा भएको पुष्टि हुन पुग्यो । उनको जन्म कति सालमा भयो भनेर वंशावली खोज्ने काम अब अरु दासहरू हो ।'

ऐतिहासिक पुष्टिका आधार इतिहासकार डा.राजाराम सुवेदीबाट समेत प्राप्त भएको उनले उल्लेख गरे । नेपाली भाषाको पहिलो कवि मानिएका सुवानन्द दास धादिङको रहेको पुष्टि भएसँगै यस विषयमा रहेको यावत भ्रमहरू हटेको र यस्ता ऐतिहासिक व्यक्तित्वको सम्मान आवश्यक भएकाले प्रतिमा अनावरण गरिएको गाउँपालिका अध्यक्ष दुर्गकुमार शाक्यले बताए ।

गाउँपालिकाको ५ लाख रुपैयाँ लागतमा बनेको दासको मूर्ति अनावरण समारोहमा गाउँपालिकाको ऐतिहासिक अनुसन्धान प्रतिवेदन पनि सार्वजनिक गरिएको थियो ।