नोबेल मेडिकल कलेजका सञ्चालक सुनील शर्मा सुटुक्क अमेरिका पुगे

A+ A A-

चिकित्सा शिक्षा आयोगले निर्धारण गरे विपरीत अरिक्त शुल्क अशुल्ने विराटनगरस्थित नोबेल र काठमाडौंस्थित काठमाडौ मेडिकल कलेज (केएमसी) का सञ्चाल सुनील शर्मा अमेरिका पुगेका छन् ।

सरकारले नोबेल र केएमसी मेडिकल कलेजलाई विद्यार्थीसँग अरिरिक्त शुल्क नलिन निर्देशन दिएको थियो । तर, सञ्चालक शर्माले अटेरी गर्दै होस्टेललगायतको अतिरिक्त शुल्कविना पढाउन नसक्ने बताउँदै आएका छन् ।

चिकित्सा शिक्षा आयोगको निर्णय तथा सरकारले पटकपटक दिएको निर्देशन पालना नगरेको भन्दै उनलाई पक्राउ गर्न विद्यार्थी संगठनले माग गर्दै आएका छन् ।

जिल्ला प्रशासन कार्यालय मोरङले पनि नोबेल मेडिकल कलेज र सञ्चालक शर्मालाई कारबाही प्रक्रिया अगाडि बढाइसकेको छ । ‘हामीले जिल्ला प्रहरी कार्यालयलाई छानविन गरी कारवाही गर्नु भनेर पठाइसकेका छौँ’, मोरङका प्रमुख जिल्ला अधिकारी काशीराज दाहालले शिलापत्रसँग भने, ‘प्रहरीले कारवाही प्रक्रिया पनि सुरु गरिसकेको छ ।’

पक्राउ पर्ने डरले शर्मा अमेरिका उडेको नोबेल मेडिकल कलेज स्रोतले जनाएको छ । सो विषयमा शिलापत्रको जिज्ञासामा नोबेल मेडिकल कलेजका अस्पताल प्रवन्धक नारायण दाहालले सञ्चालक शर्मा अमेरिका पुगेको पुष्टि गरे । प्रवन्धक दाहालले सञ्चालक शर्मा अमेरिका पुगेको शिलापत्रलाई जानकारी दिए पनि अमेरिका पुग्नुको कारणबारे खुलाएनन् । ‘डाक्टर साब अहिले अमेरिकातिर जानुभएको छ । चार/पाँचदिन भयो’, उनले भने ।

अतिरिक्त शुल्कको विरुद्धमा नोबेल मेडिकल कलेजका विद्यार्थी एक महिनादेखि आन्दोलित छन् । उनीहरूले नोबेल मेडिकल कलेज प्रशासनमा तालाबन्दी समेत गरेका छन् । केही दिन अघि नोबेलले केही अभिभावकलाई बोलाएर सुटुक्क सहमति गरेको थियो । उक्त सहमतिपछि थप आक्रोशित बनेका विद्यार्थी र उनीहरूलाई साथ दिएका विद्यार्थी संगठनहरूले आन्दोलन चर्काएका छन् । विद्यार्थीहरूले नोबेल मेडिकल कलेज र सञ्चालक शर्मालाई कारबाही नहुन्जेल आन्दोन जारी राख्ने घोषणा गरेका छन् ।

प्रकाशित मिति: मंगलबार, माघ ११, २०७८ १९:२६