ठेगाना पत्ता लागेन ? यस्तो छ सजिलो तरिका

A+ A A-

तपाईं कुनै ठाउँमा जानुपर्ने भयो भने फलानो मार्गको यति घर नम्बर भनेर खोज्नुहुन्छ होला । तर, काठमाडौं जस्ता सहरी क्षेत्रमा भनेको बेलामा खोजेको मार्ग पत्ता नै कहाँ लाग्छ र !

सार्वजनिक स्थल, होटल, पार्टी प्यालेस जस्ता ठाउँमा जान झन् हैरानी बेहोर्नुपरेको होला । घर वा मार्ग नभएको दुर्गम ठाउँमा पुर्याउन पथप्रदर्शक वा कसैसँग सोध्नुपर्ने बाध्यता हुन सक्छ ।

तर, अब यस्तो चिन्ता नलिए हुने देखिएको छ । किनकि, अब मोबाइलमा तपाईंले ‘ठेगाना सर्भिस’ एप्स डाउनलोड गरे पुग्छ । मोबाइल फोनको प्ले स्टोर वा आईओएसको एप सेन्टरमा गएर यो एप डाउनलोड गर्न सकिन्छ । अर्काे राम्रो विकल्प के पनि छ भने यो एप डाउनलोड गरेपछि ठेगाना पत्ता लगाउन इन्टरनेट चाहिँदैन ।

नेपालमा ठेगाना पत्ता लगाउन गाह्रो भएको देखिएपछि यो एप बनाएको ठेगाना एपका प्रमुख कार्यकारी अधिकृत विशाल केसी बताउँछन् । उनका अनुसार यो एप निःशुल्क डाउनलोड गर्न सकिन्छ । तर, हाल यो एप एन्ड्रोइड अपरेटिङ् सिस्टममा मात्र उपलब्ध छ । आईओएसमा एक सातापछि उपलब्ध हुने केसी बताउँछन् ।

केसीका अनुसार ठेगाना एप ‘रि–इन्जिनियरिङ’ गरिएको ठेगाना प्रणाली हो, जसमा नेपालको सतहलाई ८५ करोड १४x१४ वर्गमा विभाजित गरिएको हुन्छ । हरेक वर्ग पहिचान गर्न विशिष्ट कोड दिइएको छ । यस्ता कोडले नेपालभर मोबाइल एपमार्फत निःशुल्क ठेगाना उपलब्ध गराउँछ ।

केसीका अनुसार ठेगानाको कोडमा ९ वटा अक्षर या नम्बर दिइएका हुन्छन् । पहिलो ३ नम्बर या अक्षरले सम्बन्धित जिल्ला जनाउँछ भने बाँकी ६ वटा नम्बर या अक्षररले तोकिएको स्थान जनाउँछ ।

गोश्वारा हुलाक सुन्धारा, काठमाडाैंको ठेगाना बुझाउन ‘ठेगाना एप’ ले KTM-P82756 देखाउँछ । यसमा KTM ले काठमाडाैं जिल्ला र बाँकीले गोश्वारा हुलाकको विद्युतीय ठेगाना भन्ने जनाउँछ

त्यसैगरी, लुम्बिनीमा रहेको अशोका स्तम्भको विद्युतीय ठेगाना RUP-F78GV6 देखाउँछ, जसमा RUP ले रुपन्देही जिल्ला र बाँकी अंक र अक्षरले अशोका स्तम्भको विद्युतीय ठेगाना भन्ने जनाउँछ ।

ठेगाना सेवाले केही स्थानीय निकायसँग डिजिटल ठेगाना व्यवस्थापनबारे सहकार्य गर्न थालिसकेको केसीले बताए ।

कसरी आयो यो अवधारणा ?

केसी १९ वर्षदेखि अमेरिकामा बस्दै आएका कम्प्युटर इन्जिनियर हुन् । आफूले अमेरिकी सरकारलाई परामर्श सेवा प्रदान गर्दै आएको उनले बताए ।

‘करिब १८ महिना पहिला नेपाल आएको थिएँ, पाटनमा एउटा अफिसमा जानुपर्ने थियो, साथीले दिएको ठेगाना पत्ता लगाउन सकिनँ । अनि, फोन गरेर मान्छे बोलाएर त्यहाँ पुगेपछि ठेगाना एप बनाउने विषय दिमागमा पस्यो,’ केसीले भने ।

उनको समूहले करिब १८ महिना लगाएर विश्वका अन्य देशले ठेगानाबारे कसरी विद्युतीय व्यवस्थापन गरेका रहेछन् भनेर अध्ययन गर्यो । सोही अध्ययनबाट निकालिएको निष्कर्षअनुसार ठेगाना एप बनाइएको केसीले जानकारी दिए ।

प्रकाशित मिति: मंगलबार, असार १०, २०७६ ०६:४२