हिमालमा सबै जम्छ, हृदय जम्दैन

A+ A A-

आजलाई क्यान्सिल ।

काठले बनेको अग्लो टावरबाट आएको आवाजले मन निकै खिन्न भयो, बिहानैदेखि आकाशमा उड्ने र गन्तव्यमा पुग्ने आशामा रमेको मुहार एकाएक ओइलायो । मानौँ हाँगा भाँच्चिएको फूल झर्न नसकेरै डालीमै ओइलाउँदै छ ।

हात बाँधेर लामो स्वास लिए । एयरपोर्टमा पुगेको पाँचौँ दिन पनि मौसम खुलेन । बरु झन् बिग्रिँदै गएपछि नागरिक उड्ड्ययन प्राधिकरणका अघिकारीले 'फ्लाइट क्यान्सिल' भनेको आवाज थियो त्यो ।

विगत केही वर्षदेखि काम विशेषले हिमाली जिल्ला मुगु भए पनि स्नातक तहको परीक्षा दिन मैले कैलालीको धनगढी पुग्नु थियो । परीक्षाको तीन दिनअघि गमगढीबाट ताल्चा एयरपोर्ट पुगे । प्रतिकूल मौसमले दिन खाँदै गयो, मौसम भोलि सुध्रिएला, पर्सि सुध्रिएला तर, परीक्षा छुट्दै गए माैसमकाे प्रतिकूलता सुध्रिएन ।

दिनभर कर्णालीको चिसो सिरेटो, आकाशमा जहाज हेर्दै थाकेका आँखा, छुट्दै गरेका परीक्षाको स्मृतिले कुँडिएकाे मनलाई थाम्नै गाह्रो भइरहेकाे छ । नङ थिचिएर निलो भए जसरी मन थिचिएकाे छ । आँसु शायद आँखामै जम्यो, खसेन । तर विकल्प छैन ।

हिमाली भेग, त्यसैमा पनि वर्षा र हिउँदमा यात्राका लागि जोखिम र कष्टकर हुन्छ । हिमपात नरोकिए हिमाल खुल्दैन, हुस्सु र कुहिरोले तराई खुल्दैन । सडक यात्रा कहाँ राेकिन्छ, टुंगाे हुँदैन । हिमपातको बेला कर्णालीको तिरैतिर सडक यात्रा, हत्केलामा ज्यान राख्नु जस्तै हाे ।

परीक्षा सम्झिँदा गाडीमै भए पनि नेपालगञ्ज झर्न मन लाग्छ, कति साथीहरू झरे पनि । फेरि परिवार सम्झिँन्छु हिम्मत जुट्दैन र अन्ततः मैले जुटाउन पनि सकिनँ । साँझ पर्न लाग्यो, किताबको भारीसँग नमिठो मन लिएर अर्को अनिँदो रात बिताउन होटेल छिरे ।

साँझको खाना पनि बनाउँ है ? होटेल पुग्नासाथ साहुले सोधे । मैले भने- हुन्छ बनाउनुहोस् ।

'दु:ख पाउनुभयो तपाईँले', उहाँले यसाे भन्दा मैले थपे- हैन ठीकै छ ।

तर ठीक त कसरी हुन्थ्यो ? मन अमिलो भएकाे छ, स्नातक गर्ने रहरहरू निमोठिएका छन्, केही वर्षदेखि । अध्ययनमै बिताएका धेरै अनिँदा रातहरू बेकाम भएका छन् । वर्षभरको बाली काट्ने बेला बाढी पसेको छ मेरा किताब र नोटहरूमा ।

याे रात चिसोले अम्खोराको पानी जमेको छ, हावामा शीत जमेको छ । पालीमा हिउँ जमेको छ । तर हृदय पग्लिरहेछ, मैनबत्ती जसरी । मैले नजिकबाट अनुभव गरेँ- हिमालमा सबै जम्दो रहेछ सिवाय हृदय । यस वर्ष फेरि परीक्षाका घोषित कार्यहरू रोकिए ।

हुन त परीक्षाको मुखमै काेराेना संक्रमण बढेपछि परीक्षा त रोकियो तर पढ्ने रहरहरू रोकिएका कहाँ छन् र ? आशा छ यसपालि परीक्षा सुरु हुँदा माैसममा कुनै प्रतिकूलता पर्ने छैन । सजिलै जहाँज उड्ने छ अनि परीक्षा दिन पाइने छ ।

(लेखक राष्ट्रिय वाणिज्य बैंक मुगु शाखामा कार्यरत छन् ।)

प्रकाशित मिति: शनिबार, माघ ८, २०७८ ०८:५८