सीके राउतलाई धम्क्याएकी मन्त्री रेणु यादवको स्पष्टोक्ति– घेराबन्दी गरेपछि मैले चेतावनी दिएको हो

सीके राउतलाई धम्क्याएकी मन्त्री रेणु यादवको स्पष्टोक्ति– घेराबन्दी गरेपछि मैले चेतावनी दिएको हो

A+ A A-

गौर नरसंहारको उदाहरणसहित दिएको उत्तेजनात्मक भाषणले भौतिक पूर्वाधार तथा यातायात मन्त्री रेणु यादव विवादमा परेकी छिन् । उनको अभिव्यक्ति पदीय मर्यादाविपरित रहेकोभन्दै विपक्षी एमाले र नागरिक अगुवाहरुले राजीनामा मागेका छन् ।

मधेस आन्दोलनको बलिदान दिवस मनाउन रौतहट पुगेकी मन्त्री यादवले आफूलाई अबरोध गर्न खोज्ने जनमत पार्टीका कार्यकर्ता र अध्यक्ष सीके राउतलाई गौर घटनामा जस्तै घेराबन्दी गरेर मारिदिनसक्ने चेतावनी दिएकी थिइन् । ‘तुफानसँग टकराउने प्रयास गर्यो भने तपाईको त्यही हालत हुन्छ, जुन गौरको राइस मिलमा भएको थियो’ मन्त्री यादवले भनेकी थिइन्, ‘म डाक्टर साबलाई भन्छु, त्यो इतिहास नभुलुन् । नत्र तपाईंका कार्यकर्ता मारिन्छन्, घेराबन्दी गरेर तपाईलाई मारिदिन्छन् ।’

रौतहटको गौरमा ३ चैत २०६३ मा भएको एउटा नरसंहार, जहाँ मधेसी जनअधिकार फोरम समर्थक समूहले २७ माओवादी कार्यकर्तालाई लखेटी–लखेटी हत्या गरेका थिए । न गहिरो अनुसन्धान गरियो, न त दोषीमाथि कारबाही गरियो । त्यो बर्बर हत्याकाण्डलाई पीडित परिवारलाई १०–१० लाख राहत दिएर बिर्सिइयो ।

दण्डहिनताको पराकाष्टाको उदाहरण बनेको गौर नरसंहार सम्झाउँदै धम्की दिएकी यादवलाई मन्त्रीबाट हटाउन उनको पार्टी जनता समाजवादी, सत्तारुढ गठबन्धन र प्रधानमन्त्री शेरबहादुर देउवामाथि दबाब छ । प्रतिपक्षी दल एमालेले यादवलाई तत्काल बर्खास्त गर्न माग गरेको छ ।

नागरिक अगुवाहरुले शुक्रबार जारी गरेको वक्तव्यमा मन्त्री पदको गरिमालाई नसुहाउने, आपराधिक मनोवृत्ति प्रष्ट पार्ने, पुरानो अपराध समेत सार्वजनिक रूपमा स्वीकार गर्ने रेणु यादव जनताप्रति उत्तरदायी कुनै पनि पदमा रहन अयोग्य भनिएको छ ।

‘बहालवाला मन्त्रीले व्यक्ति हत्याको धम्की दिनु र विगतका हत्याकाण्डमा सामेल भएको विषयलाई गर्वका साथ स्वामित्व लिनु मुलुकमा जारी दण्डहीनताको प्रतिफल हो’ वक्तव्यमा छ, ‘हामी प्रधानमन्त्री देउवासमक्ष मन्त्री रेणु यादवलाई तत्काल पदमुक्त गरी कानुनी कारबाहीको दायरामा ल्याउन जोडदार माग गर्दछौं ।’

मानवअधिकार आयोगका पूर्व सदस्य मोहना अन्सारी मन्त्री यादवको अभिव्यक्ति पदीय मर्यादा र संविधानविपरित घृणा फैलाउने गरी आएकाले कारबाहीको दायरामा ल्याउनुपर्ने बताउँछिन् ।

‘गौर हत्याकाण्ड सामान्य घटना होइन् । त्यहाँ जुन रुपमा अनुसन्धान र अभियोजन हुनुपर्ने थियो नहुँदा अहिले अपराधलाई सम्झाएर धम्की दिने आँट आयो’ उनले भनिन्, ‘दण्डहीनताले हुने यस्तै हो । अपराधमा संलग्नको मनोबल बढ्छ, न्याय कमजोर हुन्छ ।’

अन्सारीले मन्त्री यादवको अभिव्यक्तिबारे प्रधानमन्त्रीले जवाफ दिनुपर्ने बताएकी छिन् । राजनीतिको आवरणमा भएका अपराध र घटाइएका घटनाको अनुसन्धान र कानुनी कारबाही नहुँदा अपराध घटाउनेहरु नै पटक–पटक धम्कीको भाषा प्रयोग गर्ने उल्लेख गर्दै अन्सारी भन्छिन्, ‘कानूनको खिल्ली उडाउने त्यस्ता पात्रहरुको कमि छैन, रेनु यादव उदाहरण हुन् ।’

मन्त्री यादवले भने आफ्नो मनसाय हिंसा भड्काउने वा गौर काण्ड घटाउने नभएको बताएकी छिन् । ‘मैले संयम नअपनाएको भए त्यहाँ मुठभेड हुन्थ्यो । बलिदानी दिवस हो, हिंसा नहोस् भनेर सचेत थिए’ उनले शिलापत्रसँग भनिन्, ‘मन्त्रीलाई घेरामा राख्ने र मानविय क्षति पु¥याउनेगरी आएका थिए । त्यसैले चेतावनी दिएको हो । राइस मिल जस्ताे घटना नहाेस् भनेकै हाे ।’

कुनै अप्रिय घटना नहोस् भनेर आफूले निर्धारित रुटसमेत परिवर्तन गरेको मन्त्री यादवले दाबी गरेकी छन् । तैपनि, सीके राउतका कार्यकर्ताले घेराबन्दी गरेको, मोटरसाइकल र झण्डामा क्षति पू¥याएको टिप्पणी गर्दै उनले भनिन्, ‘ल ठिकै छ, मेरा शब्दमा तलमाथि भयो होला । मेरो ज्यानै तलमाथि भएको भए कसले जिम्मा लिन्थ्यो ?’

प्रकाशित मिति: शुक्रबार, माघ ७, २०७८ १९:२९