विदेशबाट फर्केर हाइड आउट रेस्टुरेन्ट खोलेका अमृत भन्छन्– सिस्टम बुझ्न पनि एक पटक विदेश जानुपर्छ

विदेशबाट फर्केर हाइड आउट रेस्टुरेन्ट खोलेका अमृत भन्छन्– सिस्टम बुझ्न पनि एक पटक विदेश जानुपर्छ

A+ A A-

कोरियामा हुन्डाई कम्पनीको मोटर पार्ट्स कम्पनीमा काम गर्थे काभ्रेको चौँरी देउराली गाउँपालिका– ६ का अमृतराज गिरी । कमाइ राम्राे थियो, तैपनि उनी सन्तुष्ट भने थिएनन् । केही अलग प्रकारको काम गर्न चाहन्थे उनी । उनलाई पैसा मात्र कमाउनु थिएन । एउटा आफ्नै अनि छुट्टै ब्रान्ड बनाउने चाहना उनको थियो ।

कोरियामा पाँच वर्ष बिताएपछि उनले त्यहीँ रेस्टुरेन्ट खोल्ने योजना बनाएका थिए । रेस्टुरेन्ट स्थापनाका लागि मासिक नेपाली ३ लाख रुपैयाँ तिर्नेगरी लिजमा जग्गा पनि लिएका थिए उनले । तर, कोभिड संक्रमणको भय देखिएपछि सो योजनाले मूर्त रूप लिन सकेन ।

राम्रै कमाइ गरेका अमृतको कोरियामा व्यवसाय गर्ने सपनाले मूर्त रूप नलिएपछि उनी त्यत्तिकै नेपाल फर्किए । कोरिया जानुअघि बाँकी रहेको पढाइ पूरा गर्न अस्ट्रेलिया जाने सोच पनि नबनाएका होइनन् उनले । तर, अस्ट्रेलिया गएर पढ्नुभन्दा नेपालमै रेस्टुरेन्ट खोल्ने योजनाले जित्यो । ‘यत्रो वर्ष विदेश बसियो । अब नेपालमै केही गर्नुपर्छ भनेर यहीँ रेस्टुरेन्ट खोलेँ,’ उनले भने ।

कोरियामै छँदा पनि आफू नेपाल फर्किएर आफ्नै लगानीमा रेस्टुरेन्ट खोल्ने चाहना सुनाउँथे उनी । कोरियाबाट फर्किएपछि काठमाडौंको काँडाघारीमा बसे उनी । ‘यो ठाउँमा राम्रोसँग कफी खाने ठाउँ पनि नभएको देखेपछि रेस्टुरेन्ट खोल्नुपर्ने उपयुक्त स्थान मलाई यहीँ लाग्यो,’ उनी भन्छन् । र, ८० लाख रुपैयाँ लगानी गरेर उनले 'हाइड आउट' रेस्टेरेन्ट खोले । अहिले कुक, वेटर र डिस वासरमा गरी १२ जनालाई रोजगारीसमेत दिइरहेका छन् उनले । दरबारमार्ग र ठमेलमा जति पनि रेस्टुरेन्ट छन्, तीभन्दा फरक शैलीमा आफूले सेवा दिनका लागि यो ठाउँमा रेस्टुरेन्ट खोलेको उनी सुनाउँछन् ।

‘यो अलिक गाउँक्षेत्र पनि हो । ठमेल, दरबारमार्गमा त जति पनि रेस्टुरेन्ट छन् । तर, यो रेस्टुरेन्टको विशेषता भनेको फरक स्वाद र स्तरीय सेवा हो,’ उनी भन्छन्, ‘अबको केही दिनमा यहाँ मैले कोरियाका चार, पाँच थरीका परिकारहरू पस्किने योजना बनाएको छु । टाइगर चिकेन, मस्रुम ससेज, टिमुर चिकेन, कोरियन स्टाइलको झोल मःम:चाहिँ यहाँको खास परिकार हो ।’

अहिले यही रेस्टुरेन्टको शाखा खोल्नका लागि धेरैतिरबाट प्रस्ताव आइरहेको पनि उनले बताए । ‘तर मेरो काममा पोख्त नभईकन म कतै पनि शाखा खोल्दिनँ, कसैलाई पनि शाखा खोल्न दिन्नँ,’ उनले भने, ‘अबको केही वर्षमा शाखा पनि विस्तार गर्छु र त्यहाँ कोरियाबाट फर्किएकाहरूलाई विशेष छुटसहित खाना खुवाउने व्यवस्था मिलाउने सोचमा छु ।’

कोरियाबाट फर्किएका उनलाई रेस्टुरेन्ट नगर्न परिवारका सदस्यबाट दबाब नै आएको थियो । तर जसरी हुन्छ रेस्टुरेन्ट नै खोल्ने योजनामा थिए अमृत । ‘ड्याडी, ममी, भाइ, दाइ सबैले मलाई रेस्टुरेन्ट नखोल्न भन्नुभएको हो । तर, आफूले जानेको काम नै यही हुँदा रेस्टुरेन्ट नै खोल्ने मैले योजना बनाइसकेको थिएँ,’ उनी भन्छन्, ‘तर अहिले रेस्टुरेन्टको नाम चल्न सुरु गरेको छ, त्यसैले ड्याडी, ममी पनि मेरो कामबाट खुसी नै हुनुहुन्छ ।’

हाइड आउटमा पारिवारिक वातावरणमा खानाका विभिन्न परिकारको स्वाद लिन पाइने बताउँछन् उनी । अहिले दैनिक ६० देखि ९० हजार रुपैयाँसम्म व्यापार हुने गरेको उनले बताए ।

काठमाडौंमा सुरुमा डिसवासरको काम, अनि वेटर तालिम

काभ्रे घर भएका उनी एसएलसी दिएर थप पढाइका लागि काठमाडौं आएका थिए । ब्रिलियन्ट कलेजमा स्नातकसम्म पढेका उनी काठमाडौंमा कसरी टिक्ने भन्नेमा अलमलमा थिए । उनले आफ्नो दैनिक आवश्यकता पूरा गर्न कठिन भएकाले पढाइसँगै केही काम गर्ने सोचे । एउटा मिठाई पसलमा वेटरको काम पाए उनले । सेलरी खासै राम्रो नभएकाले केही महिनामा नै त्यो काम छोडेको उनले सुनाए ।

तर, यतिमै हार मानेनन् उनले । ठमेल र दरबारमार्गका रेस्टुरेन्टमा कामको खोजी गरिरहे । कतै वेटर त कतै डिस वासरको पनि काम पाएका उनले कुनै पनि रेस्टुरेन्टमा धेरै समय काम गर्न सकेनन् ।

यसरी धेरैवटा रेस्टुरेन्टमा वेटरको अनुभव लिएका उनलाई रेस्टुरेन्टसम्बन्धी ट्रेनिङ लिन मन लाग्यो । कलेजमा बीबीएस भर्ना गरेका उनलाई ट्रेनिङपछि गौशालास्थित इन्द्रेणी रेस्टुरेन्टमा कामको अवसर मिल्यो । दिउँसो २ देखि राति १० बजेसम्म इन्द्रेणीमा काम गर्थे उनी । ‘भन्नलाई १० बजेसम्म भने पनि कहिले त १२ नै बज्थ्यो । यसले गर्दा बिहान चाँडै उठ्न नसकेपछि कलेज पनि रेगुलर हुँदैनथ्यो,’ उनी सुनाउँछन् ।

काम यसरी गरे पनि मासिक २, ४ हजार रुपैयाँ तलबमा चित्त बुझाउनुपर्थ्यो उनले । यही बेलादेखि हो उनको मनमा आफ्नै लगानीमा रेस्टुरेन्ट स्थापना गर्ने सपना अंकुराएको ।

त्यो लाइन, जसले उनलाई कोरिया पुर्‍यायो

रेस्टुरेन्टमा काम सकेर घर फर्किंदै गर्दा गौशालामा मान्छेहरूको लामो लाइन देखे । दक्षिण कोरियामा रोजगारीका लागि ईपीएस परीक्षा दिनेहरूको लाइन रहेको उनले थाहा पाएपछि यसबारे उनलाई थप चासो लाग्यो । यता परिवारका सदस्यलाई अमृतको परीक्षा बिग्रिएको थाहा थिएन ।

‘पढ्न त म पढिरहेकै थिएँ तर कलेजको पढाइ छोडेर ईपीएस परीक्षाको तयारी गरिरहेको थिएँ । २२ दिनमा भाषा परीक्षा पास भएको रिजल्ट आएपछि कोरिया जाने बाटो खुल्यो,’ उनी विगत सम्झिन्छन् । ०७२ सालमा कोरिया पुगे अमृत । हुन्डाई कम्पनीको मोटर पार्ट्स कम्पनीमा रोजगारी पाएका उनका सुरुवाती दिन त्यति सजिला थिएनन् ।

‘कोरियामा काम गर्न धेरै गाह्रो थियो । ‘हात एकदमै छिटोछिटो चलाएर काम गर्नुपर्थ्यो, ड्युटी आवर पनि लामो हुन्थ्यो,’ कोरियामा काम गर्दाताकाको अनुभव सुनाउँछन् अमृत ।

भावी योजना

सिन्धुपाल्चोकको सुकुटेमा पनि आफ्नो रेस्टुरेन्टको शाखा विस्तार गर्ने योजनामा छन् उनी । सि–फुडलाई पनि थप गर्ने योजनामा छन् उनी ।

कोरियन खानाका परिकार बनाउनका लागि तालिम लिएका कुकलाई आफ्नो रेस्टुरेन्टमा भर्ना गर्ने सोचमा छन् उनी । ‘यसका साथै अहिले हाइड आउटमै काम गरिरहेका एक जना कुकलाई मैले कोरियन खाना बनाउने तालिम लिने व्यवस्था मिलाएको छु । मैले पनि कोरिया बस्दा देखे जानेको अनुभवलाई यहाँ सदुपयोग गर्नेछु,’ उनले भने ।

‘पढाइ बीचमै रोकिएकोमा त्यत्रो पछुतो त छैन । तर, रोकिएको पढाइ पूरा गरेर मास्टर्सचाहिँ पूरा गरूँ कि जस्तो लागेको छ । अब ग्याप पनि धेरै भयो । हेरौँ के हुन्छ,’ पढाइबारे उनी भन्छन् ।

सिस्टम बुझ्न पनि एक पटक विदेश जानुपर्छ

नेपालका अधिकांश युवामा खटेर, डटेर काम गर्ने परिपाटी नै नभएको उनको बुझाइ छ । ‘भन्नुपर्दा दुःख लाग्छ तर नेपालका प्रायः सबै क्षेत्र सिस्टमबिनै चलिरहेको छ । कोरियामा चाहिँ हरेक कुरा सिस्टमले चलेको मैले देखेँ । गर्नुपर्छ भनेपछि गर्नैपर्छ, गर्नु हुँदैन भनेपछि गर्नु हुँदैन,’ उनी भन्छन्, ‘कोरियाका युवाले सोच्ने र हामी नेपाली युवाले सोच्ने कुरामा धेरै फरक पाएँ मैले । सिस्टमले कसरी काम गर्छ भन्ने बुझ्न पनि एक पटक विदेश जानैपर्छ भन्ने मेरो बुझाइ छ ।’

कुनै पनि काम सानो/ठूलो हुँदैन भन्ने अर्को पाठ बुझे उनले कोरियामा । ‘म अहिले यहाँ रेस्टुरेन्टमा ट्वाइलेट सफा पनि गरिरहेको हुन्छु । खाएको थाल, बटुका, प्लेट पनि माझिरहेको हुन्छु,’ उनले भने ।

ओमिक्रोनको असर

कोभिड–१९ संक्रमणको नयाँ भेरियन्ट ओमिक्रोनको त्रास बढेसँगै व्यापारमा केही गिरावट आएको उनी बताउँछन् । ‘माघे संक्रान्तिदेखि व्यापारमा केही गिरावट आएको छ । रेस्टुरेन्टमा आउने ग्राहकको संख्या पनि केही घटेको छ,’ उनले भने ।

प्रकाशित मिति: शनिबार, माघ ८, २०७८ १७:५५