६ महिनामा प्रदेश १ सरकारको खर्च २६ प्रतिशत, पुँजीगत खर्च २१ प्रतिशत मात्रै

A+ A A-

प्रदेश १ को सरकारले चालु आर्थिक वर्षको पुस मसान्तसम्ममा २६ प्रतिशत मात्र बजेट खर्च गरेको छ ।

प्रदेश लेखा नियन्त्रण कार्यालय विराटनगरको तथ्यांकअनुसार, प्रदेश सरकारले पुस मसान्तसम्ममा २६ दशमलव २६ प्रतिशत मात्र बजेट खर्च गरेको हो ।

कुल ३२ अर्ब ८१ करोड ५८ लाख रुपैयाँ बजेटमध्ये पुस मसान्तसम्ममा ८ अर्ब ६१ करोड ८० लाख रुपैयाँ मात्र बजेट खर्च भएको हो । प्रदेश सरकारले सो अवधिमा २० दशमलव ९४ प्रतिशत पुँजीगत र ३० दशमलव ९३ प्रतिशत चालु बजेट खर्च गरेको प्रदेश लेखा नियन्त्रण कार्यालय विराटनगरले जनाएको छ ।

प्रदेश सरकारले पुँजीगततर्फ १५ अर्ब २३ करोड २१ लाख ६६ हजार रुपैयाँ छुट्याएकोमा पुस मसान्तसम्म ३ अर्ब १८ करोड ९१ लाख ७९ हजार रुपैयाँ खर्च भएको प्रदेश लेखा नियन्त्रण कार्यालयका सूचना अधिकारी ऋषिकुमार खनालले जानकारी दिए ।

खनालका अनुसार प्रदेश सरकारअन्तर्गतको लोक सेवा आयोगले सबैभन्दा बढी ३६ दशमलव ९३ प्रतिशत पुँजीगत खर्च गरेको छ । यस्तै सबैभन्दा कम मुख्यमन्त्री तथा मन्त्रिपरिषद्को कार्यालयले १ दशमलव ९८ प्रतिशत मात्र पुँजीगत खर्च गरेको छ ।

आन्तरिक मामिला तथा कानुन मन्त्रालयले ३ दशमलव ३० प्रतिशत, उद्योग वन तथा वातावरण मन्त्रालयले ११ दशमलव ६६ प्रतिशत खर्च गरेको छ ।

सबैभन्दा बढी विकास बजेट खर्च हुने भौतिक पूर्वाधार विकास मन्त्रालयले २२ दशमलव ८६ प्रतिशत, सामाजिक विकास मन्त्रालयले १९ दशमलव ४० प्रतिशत पुँजीगत खर्च गरेको छ । त्यस्तै, आर्थिक मामिला तथा योजना मन्त्रालयले १८ दशमलव ७४, मुख्य न्यायाधिवक्ताको कार्यालयले २ दशमलव ९४, प्रदेश योजना आयोगले १२ दशमलव २० प्रतिशत र प्रदेशसभाले ३३ दशमलव ५६ प्रतिशत पुँजीगत खर्च गरेको छ ।

चालु खर्चतर्फ प्रदेश सरकारले ३० दशमलव ९३ प्रतिशत खर्च गरेको छ । चालुतर्फ कुल १७ अर्ब ५५ करोड ३७ लाख २१ हजार रुपैयाँ बजेट विनियोजन गरेकोमा ५ अर्ब ४२ करोड ८८ लाख २२ हजार रुपैयाँ खर्च भएको छ । चालुतर्फ मन्त्रालयमध्ये आर्थिक मामिला तथा योजना मन्त्रालयले सबैभन्दा बढी ८५ दशमलव ८८ प्रतिशत बजेट खर्च गरेको प्रदेश लेखा नियन्त्रण कार्यालयले जनाएको छ ।

प्रकाशित मिति: बिहीबार, माघ ६, २०७८ १४:३२