सीके राउतलाई मन्त्री रेणु यादवको ज्यान मार्ने धम्की, भनिन्- गौरकाण्डको इतिहास नभुल्नु

सीके राउतलाई मन्त्री रेणु यादवको ज्यान मार्ने धम्की, भनिन्- गौरकाण्डको इतिहास नभुल्नु

A+ A A-

मधेस केन्द्रित दलले बुधबार ‘मधेस बलिदानी दिवस’ मनाउँदा भौतिक पूर्वाधार तथा यातायातमन्त्री रेणु यादव रौतहटको गौरमा जनता समाजवादी पार्टी (जसपा), नेपालले आयोजना गरेको कार्यक्रममा प्रमुख अतिथिका रूपमा सहभागी भइन् । र, उनले कार्यक्रममा चर्को भाषण गर्ने क्रममा धम्कीपूर्ण अभिव्यक्ति दिइन् ।

तराईका जिल्लामा किसान आन्दोलनका नाममा प्रदर्शन गरिरहेको सीके राउत नेतृत्वको जनमत पार्टीप्रति अन्य मधेसकेन्द्रित दल असहिष्णु छन् । जसपाकी नेतृसमेत रहेकी मन्त्री यादवले बुधबार दिएको अभिव्यक्ति सोही असहिष्णुको पराकाष्ठा थियो । मन्त्री यादवले जनमत पार्टीप्रति संकेत गर्दै भनिन्, ‘आज बलिदानी दिवसका दिन हिंसा होइन । आज हिंसा गर्नु छैन । आज हामी बलिदानी दिवस मनाउन आएका छौँ । र, भोलि हामी यहाँको सडक भिजिट गर्छौं । यदि तुफानसँग टक्रायौँ भने तपाईंको त्यही हालत हुन्छ, जो गौरको राइस मिलमा भयो । त्यो इतिहासलाई नभुल्नुस् ।’

रौतहटको गौरमा तत्कालीन मधेसी जनाधिकार फोरमका कार्यकर्ताले माओवादीको कार्यक्रमलाई बिथोल्ने नाममा हिंसा मच्चाएका थिए । र, २७ जना माओवादी कार्यकर्ताको हत्या गरेका थिए । जसलाई गौरकाण्डका रूपमा स्मरण गरिन्छ । मन्त्री यादवको जसपा त्यही जनाधिकार फोरमबाटै परिवर्तित भएको पार्टी हो । तत्कालीन जनाधिकार फोरम नै अहिलेको जसपा हो ।

मन्त्री यादवले बुधबार गौरमा सोही नरसंहार नभुल्न सीके राउतलाई चेतावनी दिइन् । हिन्दी भाषामा सम्बोधन गरेकी उनले चेतावनी दिँदै भनेकी छन्, ‘म डाक्टर साहेबलाई यतैबाट भन्छु– कोही एक बिरामी मर्छन् । र, तपाईंलाई घेराबन्दी पारेर मारिदिन्छन् । त्यसैले सतर्क हुनुहोस् ।’

सीके राउतको जनमत पार्टीले एक महिनादेखि किसान आन्दोलनका नाममा पूर्वको झापादेखि पश्चिमको बर्दियासम्म शक्ति प्रदर्शन गरिरहेको छ । हातामा लाठी लिएर राउतका कार्यकर्ताहरू प्रदर्शनमा उत्रिने गरेका छन् । मन्त्री यादवले लाठी ननचाउन भन्दै त्यसप्रति आपत्तिसमेत प्रकट गरेकी छन् ।