बर्जु महोत्सवमा तोडफोड प्रकरण : सुनसरी प्रशासनले गठन गर्‍यो छानविन समिति

A+ A A-

सुनसरीको बर्जु महोत्सवमा मंगलबार भएको तोडफोड र आगजनीको घटना छानविनका लागि सुनसरी प्रशासनले पाँच सदस्यीय छानविन समिति गठन गरेको छ । प्रमुख जिल्ला अधिकारी इन्द्रदेव यादवको अध्यक्षतामा बसेको बैठकले महोत्सवमा भएको घटना छानविनका लागि सहायक प्रमुख जिल्ला अधिकारी आनन्द पौडेलको संयोजकत्वमा पाँच सदस्यीय छानविन समिति गठन गरेको हो ।

समितिको सदस्यमा सुनसरीका प्रहरी नायब उपरीक्षक नरेन्द्र कुमार कार्की, सशस्त्र प्रहरी बल नम्बर ४ गण हेडक्वाटर सुनसरीका सशस्त्र प्रहरी नायव उपरीक्षक मित्रलाल श्रेष्ठ, राष्ट्रिय अनुसन्धान जिल्ला कार्यालय सुनसरीका अनुसन्धान अधिकृत किरण भट्टराई र बर्जु गाउँपालिका प्रमुख प्रशासकीय अधिकृत प्रमोद चौधरी रहेका छन् ।

समितिलाई पाँच दिनभित्र सत्यतथ्य छानविन गरी प्रतिवेदन पेस गर्न निर्देशन दिइएको प्रमुख जिल्ला अधिकारी यादवले बताए ।

कोभिड संक्रमणको जोखिमलाई दृष्टिगत गर्दै सुनसरी प्रशासनले महोत्सवमा रोक लगाएको भएप नि आयोजकले प्रशासनको निर्देशन विपरीत महोत्सव जारी राखेकाले मंगलबार आगजनी र तोडफोडको घटना भएको प्रजिअ यादवको भनाइ छ । उनले तत्कालीन अवस्थामा पुस २३ गते महोत्सव आयोजनाको अनुमति दिइएको भए पनि पुस २६ गते गृह मन्त्रालयबाट जारी कोरोना संकट व्यवस्थापन समितिको कोरोना प्रोटोकोल पालनासम्बन्धी निर्देशनअनुसार सबै कार्यक्रम र अनुमति खारेज गरिएको जानकारी दिए ।

सुनसरीको बर्जु गाउँपालिका—६ स्थित चिमडीमा आयोजित बर्जु महोत्वसमा चर्चित भारतीय कलाकार खेसरीलाल नआएको भन्दै मंगलबार स्थानीयले तोडफोड र आगजनी गरेका थिए । चर्चित भारतीय कलाकार खेसरीलाल आउने भनेर प्रचार गरिए पनि अन्तिम समयमा नआएपछि आक्रोशित स्थानीयले स्टेज तोडफोड गरिदिएका थिए । खेसरीलाल आउने भनेर महंगोमा टिकट काटेका स्थानीयले उनी आउने कार्यक्रम रद्द भएको जानकारी पाएपछि तोडफोड र आगजनी गरेका थिए ।

आक्रोशित स्थानीयले भारतीय नम्बर प्लेटका ४ वटा स्कोरपियो र मोटरसाइकमासमेत आगजनी गरेका थिए । त्यस्तै आक्रोशित स्थानीयले स्टेज, कुर्सी र बाजागाजासमेत तोडफोड गरेका थिए । सो तोडफोड र आगजनीमा डेढ करोड रुपैयाँभन्दा बढीको क्षति भएको सुनसरी प्रशासनले जनाएको छ ।

प्रकाशित मिति: बुधबार, माघ ५, २०७८ २१:१८