कोरोना संक्रमित एमाले उपाध्यक्ष पौडेलले बुटवल उपमहानगरपालिका भवनको गरे उद्‌घाटन

कोरोना संक्रमित एमाले उपाध्यक्ष पौडेलले बुटवल उपमहानगरपालिका भवनको गरे उद्‌घाटन

A+ A A-

कोरोना महामारीका बीच बुटवल उपमहानगरपालिकाको नवनिर्मित प्रशासनिक भवनको उद्घाटन गरिएको छ । २०७५ साल असार ८ गते तत्कालीन अर्थमन्त्री एवं नेकपा एमाले उपाध्यक्ष विष्णु पौडेलले शिलान्यास गरेको उक्त भवनको बुधवार पौडेलले नै भर्चुअल माध्यमबाट उद्घाटन गरेका छन्।

कोरोना संक्रमणका कारण होम आइसोलेसनमा रहेका पौडेलले सेवाग्राहीका कामलाई पहिलो प्राथमिकता राखेर अगाडि बढ्न सुझाव दिए । उनले नागरिकले नयाँ भवनबाट प्राप्त गर्ने सेवालाई पनि स्तरीय बनाउन आग्रह गरे।

भवन निर्माण गर्दा ५४ करोड ७८ लाख ४५ हजार ३ सय ८१ रुपैयाँ अनुमानित लागत राखिएकोमा विकोही, शिवशक्ति, बन्दन भगवती जेभी न्यू बानेश्वरले ४३ करोड ५३ लाख ४९ हजार ५ सय ७२ रुपैयाँ ८४ पैसामा भवन निर्माणको ठेक्का सम्झौता गरेको थियो । गत ६ असारभित्रै निर्माण सम्पन्न गरिसक्नुपर्ने सम्झौताको म्याद भए पनि कोरोना महामारीका कारण सात महिना ढिलो गरी भवन निर्माण सकिएको उपमहानगरपालिकाका योजना प्रमुख इन्जिनियर सुमन श्रेष्ठले जानकारी दिए ।

२०३५ सालमा निर्माण गरिएको हाल उपमहानगरपालिका कार्यालय रहेको भवन २०७२ सालको भूकम्पले चर्किएपछि मर्मत गरेर कार्यालय सञ्चालन भइरहेको थियो। भूकम्पले क्षतिग्रस्त भएको भवनमा कार्यालय सञ्चालन गर्न जोखिम भएको भन्दै उपमहानगरपालिकामा जनप्रतिनिधि निर्वाचित भएर आएपछि अत्याधुनिक भवन निर्माणको प्रक्रिया अगाडि बढाइएको थियो ।

बुधबार उद्घाटन गरिएको भवन करीब तीनबिगाहा क्षेत्रफलमा निर्माण गरिएको र सोही क्षेत्रमा आवश्यकताको आधारमा थप ६ वटा अन्य ब्लकसमेत निर्माण गरिने उपमहानगरपालिकाले जनाएको छ ।

गुरुयोजना अनुसार पहिलो चरणमा निर्माण गरिएको ‘ए ब्लक’ अर्थात् प्रमुख प्रशासनिक भवन बेसमेनसहित चार तलाको अत्याधुनिक रहेको छ । दुई अलग–अलग स्थानमा लिफ्ट र दुबैतर्फ सिँढी बनाइएको अण्डरग्राउण्डसहितको नवनिर्मित भवनमा अण्डरग्राउण्डमा १ सय ६ वटा मोटरसाइकल, ३५ देखि ५० वटासम्म कार पार्किङ गर्न मिल्ने गरी निर्माण गरिएको छ। भवनको बाहिर पनि छुट्टै सवारी साधन पार्किङ गर्न मिल्ने क्षेत्र छुट्टाइएको छ ।

उपमहानगरपालिकाका इन्जिनियर गौतम रौनियारका अनुसार भुँइतलामा प्रतिक्षा कक्ष, बैंकका लागि काउण्टर, हेल्प डेस्क, नक्सा, योजना, राजश्व र भूमी व्यवस्थासम्बन्धी शाखा राखिएका छन् । पहिलो तलामा नगर प्रमुख, उपप्रमुख, प्रमुख प्रशासकीय अधिकृत, लेखा र प्रशासन शाखा राखिएको छ । त्यस्तै दोस्रो तलामा वातावरण, सामाजिक कल्याण, सूचना प्रविधि लगायतका शाखा राखिएको छ भने तेस्रो तलामा शिक्षा, युवा तथा खेलकुद शाखा र २ देखि ३ सय जना क्षमताको सभाहल छ ।

इन्जिनियर रौनियारले चारवटै तलामा २०–२५ जना क्षमताका बैठक कक्षहरूनिर्माण गरिएको जानकारी दिए । नवनिर्मित भवन निर्माणको काम सम्पन्न भई बुधवार उद्घाटन गरिए पनि अहिले फर्निचर व्यवस्थापन र इन्टेरियरको काम भइरहेकोले फागुन ३ गते उपमहानगरपालिकाको स्थापना दिवससम्म सम्पूर्ण शाखाहरुको काम नयाँ भवनबाटै संचालन गरिने उनले बताए । २०१६ सालमा स्थापना भएको बुटवल नगरपालिकाले हरेक वर्ष विभिन्न रचनात्मक कार्यक्रमका साथ स्थापना दिवस मनाउँदै आएको छ ।

गृहमन्त्री खाँणको नाम नलिएकोप्रती कांग्रेस बुटवल सभापति आक्रोशित

बुटवल उपमहानगरपालिकाको भवन उद्घाटनका क्रममा गृहमन्त्री बालकृष्ण खाँणको नाम नलिएको भन्दै नगर सभापति खेलराज पाण्डेयले आक्रोश व्यक्त गरेका छन् । नगरको प्रशासनिक भवनको उद्घाटनको मूल समारोहमा बोल्दै सभापति पाण्डेयले आयोजकले रूपन्देहीबाट निर्वाचित संघीय सांसद, कांग्रेस केन्द्रीय सदस्य तथा गृहमन्त्री खाँणको नामै नलिएको र सबै दललाई नसम्झेको भन्दै आपत्ति जनाए ।

बुटवलको नयाँ भवनमा सबैको योगदान रहेको भन्दै उनले पूर्वमेयर, पूर्वजनप्रतिनिधि, तथा सबै दलहरूसँग नगरले समन्वय गर्न नसकेको दाबि गरे ।

नगरप्रमुखको जन्मदिनमा उद्घाटन भएको भन्दै आलोचना

बुधबार बुटवल उपमहानगर प्रमुख शिवराज सुबेदीको जन्मदिनको अवसरमा भवन उद्घाटन गरिएको भन्दै आलोचना हुन थालेको छन् । फागुन ३ गते उपमहानगरको स्थापना दिवस आइरहेको अवस्थामा पनि एक महिना अघिनै उद्घाटन गरिनुले सार्वजनिक सम्पत्ति व्यक्तिगत जन्मदिन मनाउन प्रयोग हुन थालेको भन्दै आलोचना भएको हो ।

प्रकाशित मिति: बुधबार, माघ ५, २०७८ १५:४१