उपत्यकाका अस्पतालमा कार्यरत सयौँ स्वास्थ्यकर्मीलाई कोरोना संक्रमण, अर्को ठाउँबाट झिकाउने तयारी

उपत्यकाका अस्पतालमा कार्यरत सयौँ स्वास्थ्यकर्मीलाई कोरोना संक्रमण, अर्को ठाउँबाट झिकाउने तयारी

A+ A A-

टेकु अस्पताल

शुक्रराज ट्रपिकल तथा सरुवा रोग अस्पताल टेकुको आईसीयू डाक्टर मिलनजंग केसीलाई गत साता ज्वरोले च्याप्यो । भोलिपल्ट उनले पीसीआर गराए । बेलुका रिपोर्ट पोजिटिभ आयो ।

‘जिउ दुख्ने, ज्वरो आउने र दुई पटक डायरिया समेत भयो,’ उनले भने, ‘बिरामीको उपचारकै क्रममा खटिएको थिएँ । तर कहाँबाट सर्‍यो थाहा छैन ।' संक्रमित भएपछि उनी होम आइसोलेसनमा बसेका छन् । टेकुमा १५ जना स्वास्थ्यकर्मी संक्रमित भएका छन् । ‘दुई जना डाक्टर र अरु नर्स हुनुहुन्छ,’ अस्पतालकी निर्देशक डा. मनिषा रावलले बताइन् ।

वीर अस्पताल

कोभिड युनिफाइड केन्द्रीय अस्पाताल वीर अस्पातलमा १ सय ५१ जना स्वास्थ्यकर्मी संक्रमति भएका छन् । जसमा ४० जना डाक्टर, ६५ जना नर्स र बाँकी अन्य कर्मचारी छन् ।

‘स्वास्थ्यकर्मी संक्रमति भएपछि सेवामा धेरै असर परेको छ । करारमा ५० जना नयाँ स्वास्थ्यकर्मी थप गर्दैछौँ,’ अस्पतालका उपनिर्देशक डा. प्रज्ज्वल श्रेष्ठले भने, ‘१० जना मेडिकल अफिसर पनि राख्ने तयारी छ । संक्रमित भएकाहरू कतिपय पाँच दिन आइसोलेसनमा बसेर सेवामा फर्किनुभएको छ ।’

टिचिङ अस्पताल

सबैभन्दा धेरै त्रिवि शिक्षण अस्पताल महाराजगञ्जमा स्वास्थ्यकर्मी संक्रमित भएका छन् । ‘३ सय बढी स्वास्थ्यकर्मी र कर्मचारी संक्रमित छन् । आइसोलेसमा बस्ने र निको भएर फर्किने क्रम चलिरहेको छ,’ अस्पतालका उपनिर्देशक डा. सन्तकुमार दासले भने, ‘ननकोभिडका बिरामीको चाप कम भएकाले वार्डहरूलाई एक अर्कामा मर्ज गरेर व्यवस्थापन गरिरहेका छौँ ।’

पाटन अस्पताल

पाटन अस्पतालका ९० जनाभन्दा बढी स्वास्थ्यकर्मी संक्रमित भएका छन् । ‘स्वास्थ्यकर्मी संक्रमित भएपछि काम प्रभावित भएको छ, सजिलो छैन,’ अस्पतालका निर्देशक डा. रबि शाक्यले भने, ‘धेरै गाह्रो स्थिति आयो भने डाक्टर पढिरहेका विद्यार्थीलाई पनि प्रयोग गर्न सकिन्छ ।’

एपीएफ अस्पताल

सशस्त्र प्रहरीको एपीएफ अस्पतालमा ४० जना स्वासथ्यकर्मी संक्रमित भएका छन् । ‘डाक्टर नर्स संक्रमित भएपछि डबल डिउटी गर्नुपरेको छ,’ अस्पतालका कोभिड फोकल पर्सन डा. प्रविन नेपालले भने, ‘गाह्रो भएको छ । सबै ठाउँको समस्या यस्तै छ ।’

अर्को ठाउँबाट स्वास्थ्यकर्मी झिकाउने तयारी

स्वास्थ्य तथा जनसंख्या मन्त्रालयले उपत्यकाका अस्पतालमा स्वास्थ्यकर्मी संक्रमित भएर सेवामा असर परेमा अर्को ठाउँबाट स्वास्थ्यकर्मी झिकाउने तयारी गरेको छ । ‘अस्पतालमा स्वास्थ्यकर्मी संक्रमति हुने दर बढेको छ । नयाँ स्वास्थ्यकर्मी थप गर्ने वा भएका स्वास्थ्यकर्मीलाई संक्रमण हुनबाट जोगाउने हो,’ मन्त्रालयका सह प्रवक्ता डा. समिरकुमार अधिकारीले भने, ‘फरक–फरक ठाउँमा संक्रमणको स्थिति फरक छ । कम भएको ठाउँबाट स्वास्थ्यकर्मी झिकाएर व्यवस्थापन गर्नुपर्ने हुन्छ ।’

ओमिक्रोन भेरियन्ट तीव्र गतिमा फैलिएपछि र स्वास्थ्यकर्मी संक्रमित भएकाले करारमा राखिएका स्वास्थ्यकर्मीको समय अवधि तीन महिना थप गरिएको छ । ‘माघ, फागुन र चैतसम्म करारका जनशक्तिको समय थप गरिएको छ,’ उनले भने, ‘कति जनशक्ति आवश्यक पर्छ त्यो सम्बन्धित अस्पतालले नै राख्ने हो ।’

स्वास्थ्यकर्मीको जोखिम भत्ता खोइ ?

नेपाल चिकित्सक संघले राज्यले स्वास्थ्यकर्मीलाई बेवास्ता गरेको गुनासो गरेको छ । ‘जोखिम मोलेर काम गर्ने स्वास्थ्यकर्मीले भत्ता पाएका छैनन्,’ संघका अध्यक्ष डा. लोचन कार्कीले भने, ‘अरु घरमा बस्दा स्वास्थ्यकर्मी उपचार गर्न जानुपर्छ । भत्ता नदिनु विडम्बना हो ।’

स्वास्थ्यकर्मीको उपचारका लागि छुट्टै संरचनाको व्यवस्था गर्न संघको माग छ । ‘कति चिकित्सक संक्रमित भएर काममा आउन नसक्ने अवस्था छ । चिकित्सक बिरामी भएमा उपचार र मृत्यु भएमा परिवारलाई राज्यले हेर्नुपर्छ । फ्रन्टलाइनमा काम गर्नेको लागि अस्पतालमा छुट्टै बेड छुट्याउनु पर्छ । चिकित्सकले नै उपचार नपाएर मर्ने स्थिति आउनु भएन,’ उनले भने ।

स्वास्थ्यकर्मीलाई कोभिडबाट जोगिन तालिमको आवश्यकता रहेको बताउँछन्, उनी । ‘पीपीईको अभाव हुनु भएन । कोभिड र नन–कोभिडको उपचार गर्दा कसरी जोगिने भनेर स्वास्थ्यकर्मीलाई तालिम दिन जरुरी छ,’ उनले भने ।

स्वास्थ्यकर्मीले ६ महिनादेखि भत्ता नपाएको स्वयं स्वास्थ्य मन्त्रालयले बताएको छ । मंगलबार संसदको शिक्षा स्वास्थ्य समिति बैठकमा मन्त्रालयका सचिव डा. रोशन पोखरेलले भत्ता दिन नसकिएको बताएका थिए ।

‘५० प्रतिशत भत्ता दिने भनिएको छ । असारसम्मको मात्र दिएका छौँ । समितिले अर्थ मन्त्रालयसँग समन्वय गरिदिनुपर्‍यो,’ उनले भने । समिति सभापति जयपुरी घर्तिले अर्थ मन्त्रालयसँग छलफल गरेर स्वास्थ्यकर्मीको जोखिम भत्ता उपलब्ध गराउने बताएकी थिइन् ।