काठमाडौं उपत्यका कोरोनाको हटस्पटः घरघरमा संक्रमण, मास्क नलगाए जेलसम्मको सजाय

काठमाडौं उपत्यका कोरोनाको हटस्पटः घरघरमा संक्रमण, मास्क नलगाए जेलसम्मको सजाय

A+ A A-

स्वास्थ्य तथा जनासंख्या मन्त्रालयको सोमबारको तथ्यांकअनुसार १७ हजार ४ सय ६५ जनाको कोरोना परीक्षा गर्दा ६ हजार ७ सय ३४ जनामा संक्रमण पुष्टि भयो । जसमध्ये आधाभन्दा बढी संक्रमित काठमाडौं उपत्यकाका छन् । काठमाडौंमा २ हजार ९ सय ४३, ललितपुरमा ७ सय ९५ र भक्तपुरमा २ सय १ जना गरी ३ हजार ९ सय ३९ जना संक्रमित भए ।

तथ्यांकले काठमाडौं उपत्यका कोरोनाको 'हटस्पट' बनेको देखाउँछ । यो तथ्यांकभन्दा धेरै नागरिक समुदायमा संक्रमित रहेको स्वयम् स्वास्थ्य मन्त्रालयको ठम्याइ छ । ‘संक्रमण धेरै बढेको छ । समुदायमा व्यक्ति हेर्दा धेरै आशंकाको घेरामा छन् । तर, परीक्षणको दायरामा आएका छैनन्,’ स्वास्थ्य मन्त्रालयका सहप्रवक्त डा. समिरकुमार अधिकारीले भने, ‘समुदायमा संक्रमण बढ्दै जाँदा परीक्षण छिटो गरेर अलग्याउनुपर्ने हुन्छ । संक्रमितको सम्पर्कमा आएकालाई पनि सुरक्षित राख्नुपर्छ ।’

जनघनत्व धेरै भएकाले काठमाडौं उपत्यका हटस्पट बनेको अधिकारीको ठम्याइ छ । ‘जहाँ धेरै मानिस छन्, त्यहाँ धेरै संक्रमण फैलिने जोखिम हुन्छ,’ उनले भने ।

घरघरमै संक्रमण

शुक्रराज ट्रपिकल तथा सरुवा रोग अस्पताल टेकुका भाइरोलोजिस्ट डा. शेरबहादुर पुन उपत्यकामा भएका सभा, जुलुस, कार्यक्रमले पनि उपत्यका हटस्पट बनेको बताउँछन् । ‘काठमाडौंमा हवाई मार्गबाट पनि आयो । काठमाडौं केन्द्रित सभा, सम्मेलन, जुलुसलगायतका गतिविधिले पनि मलजल गर्‍यो,’ पुनले भने, ‘उपत्यकाका घरघरमै संक्रमण पुगिसकेको छ ।’

मापदण्ड पालना नगर्नेलाई जेलसम्मको सजाय

सरकारले संक्रमणको चेन ब्रेक गर्न रोकथाम तथा नियन्त्रणसम्बन्धी आदेश, २०७८ जारी गरेको छ । नियन्त्रण तथा रोकथाममा बाधा पुर्‍याउनेलाई कारबाही गर्ने व्यवस्था उक्त आदेशले गरेको छ । ‘आदेशको पालना गर्नु सबैको कर्तव्य हुनेछ । यस आदेशको अवज्ञा गर्ने वा आदेश कार्यान्वयनमा बाधा पुर्‍याउने व्यक्ति तथा संस्थालाई संक्रामक रोग ऐन २०२० बमोजिम कारबाही र सजाय हुनेछ,’ सरकारको आदेशमा भनिएको छ ।

सोही आदेशअनुसार काम अगाडि बढाइएको प्रशासनले जनाएको छ । ‘संक्रमण धेरै बढेको छ । सरकारको आदेश कडाइका साथ कार्यान्वयन हुन्छ,’ भक्तपुरकी प्रमुख जिल्ला अधिकारी रुद्रादेवी शर्माले भनिन् ।

मास्क लगाउन अटेरी गर्नेलाई संक्रामक रोग ऐनअनुसार कारबाही गरिने शर्माले बताइन् । ‘मास्क लगाउन अटेरी गर्नेलाई कानुनबमोजिम १ सय जरिवाना र एक महिनासम्म कैद हुन सक्छ,’ उनले भनिन्, ‘नियन्त्रणमा बाधा पुर्‍याउनेलाई ६ महिनासम्मको जेल सजाय हुन्छ । यो स्थिति आउन नदिन जनचेतना फैलाउने, मास्क बाँड्ने अभियान पनि सञ्चालन गरिरहेका छौँ । सीमाक्षेत्रहरूमा एन्टिजेन परीक्षण गराउँछौँ ।’

सरकारको नयाँ आदेश आएसँगै उपत्यकाका तीन जिल्ला प्रमुखहरूको बैठक बसेर थप निर्णय गरिने पनि उनले बताइन् । ‘अब कडाइ गर्नुको विकल्प छैन । तीनै जिल्लाका प्रमुख बसेर थप निर्णय गरेर सूचना निकाल्छौँ,’ उनले भनिन् ।