बर्जु महोत्सव आगजनी प्रकरण : खेसारीलालले भने- आयाेजकले बेवकुफ बनाए

A+ A A-

चर्चित भारतीय कलाकार खेसारीलाल यादवले सुनसरीको बर्जुमा मंगलबार भएको घटनाप्रति दुःख व्यक्त गरेका छन् । बर्जु गाउँपालिका–६ स्थित चिमडीमा आयोजित बर्जु महोत्सवमा सहभागी हुन विराटनगर आएका खेसारीलालले तोडफोड र आगजनीको घटनाप्रति दुःख व्यक्त गरेका हुन् ।

खेसारीलाल आउने भनेर आयोजकले स्थानीयलाई महँगोमा टिकट बिक्री गरेको भए पनि उनी महोत्सवमा उपस्थित हुन नसकेपछि मंगलबार आक्रोशित दर्शकले तोडफोड र आगजनी गरेका थिए ।

आक्रोशित स्थानीयले भारतीय नम्बर प्लेटका चारवटा स्कोरपियो गाडी र मोटरसाइककलमा पनि आगजनी गरेका थिए । त्यस्तै उनीहरूले स्टेज, कुर्सीहरू, बाजागाजासमेत तोडफोड गरेका थिए ।

तोडफोड र आगजनीको घटना हुँदा विराटनगरमै रहेका खेसारीलालले आयोजकको गल्तीका कारण सो घटना भएको आरोप लगाएका छन् । उनले आफू महोत्सवमा सहभागी हुन मंगलबार बिहान ७ बजे नै विराटनगर आइपुगेको बताए ।

तर, सुनसरी प्रशासनले अनुमति नदिएकाले आयोजकले आफूलाई सहभागी नगराएको र कार्यक्रमका लागि टिकट काटेका दर्शकलाई सो विषयमा जानकारी नगराउँदा घटना भएको दाबी गरे । ‘महोत्सवमा मेरो ११ बजदेखि प्रस्तुति थियो । म बिहान ७ बजे नै विराटनगर आइसकेको थिएँ । म विराटनगर आइसकेर त्यत्रो हंगामा भइसकेपछि मात्र आयोजकले टिकट शो राखेको जानकारी पाएँ’, उनले भने, ‘प्रशासनले कार्यक्रम रद्द गर्न भने पनि आयोजकले टिकट बिक्री गर्दै जनतालाई भ्रममा पार्न खोजेपछि यस्तो घटना भयो । आयोजकले मलाई र जनतालाई नै गुमराहामा राखे ।’

कलाकार खेसारीलालले त्यत्रो घटना हुँदासमेत आयोजक आफ्नो सम्पर्कमै नआएको बताए । ‘जनताको नजरमा म कार्यक्रमका लागि नआएको जस्तो देखिएको छ । तपाईंहरूले देखिरहनु भएको छ म आइसकेको थिएँ’, उनले भने, ‘तर, आयोजकको लापरवाही र जनतालाई बेवकुफ बनाउन खोज्दा करोडौँको क्षति भयो ।’

खेसारीलालले तोडफोड र आगजनीबाट भएको सम्पूर्ण क्षति आयोजकले व्यहोर्नुपर्ने र जनताको पैसा फिर्ता गर्नुपर्ने बताए । ‘गल्ती आयोजकको भएकाले सबै क्षति आयोजकले नै व्यहोर्नुपर्छ’, उनले भने, ‘मेरो गल्ती एक प्रतिशत पनि छैन ।’

प्रकाशित मिति: बुधबार, माघ ५, २०७८ ११:२३