देशकै पहिलो बालमैत्री गाउँपालिकामा बाल सहजकर्ता नै आन्दोलनमा उत्रिए

A+ A A-

नेपालकै पहिलो बालमैत्री गाउँपालिका मनहरीले प्रत्येक वडामा खटिएका बाल सहजकर्ताहरूलाई हटाएपछि आन्दोलन चर्किएको छ । मकवानपुरको पश्चिमी क्षेत्रस्थित मनहरी गाउँपालिकाले आन्तरिक आयको स्रोत कमजोर भएको भन्दै बाल सहजकर्ता र कृषि प्राविधिक कर्मचारीलाई बर्खास्त गरेको थियो ।

बर्खास्तीमा परेका कर्मचारीमध्ये चारजना सुत्केरी र गर्भवती पनि थिए । २७ पुसमा बसेको गाउँकार्यपालिका बैठकले २०७५ सालदेखि निरन्तर बालमैत्री अभियानमा वडा–वडामा काम गरिरहेका बालमैत्री सहजकर्ता र एकजना कृषि प्राविधिक सहायक कर्मचारीलाई हटाउने निर्णय गरेको थियो ।

बालमैत्री पालिकामा बालमैत्री सहजकर्ता नै हटाइएको भन्दै राजनीतिक दलदेखि बाल क्लबहरूले आन्दोलन चर्काइरहेका छन् । बाल सञ्जाल मनहरीले गाउँपालिकाको बालमैत्री शाखामा ताला लगाएको छ । सञ्जालले बाल सहजकर्ता हटाउने निर्णय नियोजित भएको बताउँदै निर्णय फिर्ता लिनुपर्ने अडान राखेको छ । बालमैत्री गाउँपालिका घोषणापूर्व ९ वटै वडामा १–१ जना बाल सहजकर्ता नियुक्त गरिएको थियो ।

सञ्जालले बालमैत्री शाखामा तालाबन्दी, गाउँपालिका परिसरमा प्ले कार्ड बोकेर नाराबाजी गर्दै धर्ना दिएका थिए । बाल सञ्जाल मनहरीका अध्यक्ष आषिश बुढाथोकीले सहजकर्ताहरू पुनः काममा फर्किने वातावरण नभए चरणबद्ध आन्दोलन गर्ने बताएका छन् । अध्यक्ष बुढाथोकीले सहजकर्ताको लागि मात्र नभई गाउँपालिकाभित्रका सबै बालबालिकाको अधिकारका निम्ति लड्नु परेको बताए ।

महिलालाई सुत्केरी वा गर्भवती हुँदा थप माया, स्नेह र सकारात्मक व्यवहार देखाउनुपर्ने बेला मनहरी गाउँपालिकाले भने दुई जना सुत्केरी र दुई जना गर्भवतीसहित १० जनालाई जागिरबाट जबरजस्ती हटाएको उनले बताए ।

यसअघि बालमैत्री सहजकर्ताहरूको चालु आर्थिक वर्षको अन्तिमसम्म करार सम्झौता थप गर्ने निर्णय भएको थियो । बालमैत्री शासन व्यवस्थामा महिला, बालबालिका, गर्भवती र शिशुहरूलाई उच्च प्राथमिकतामा राखेर व्यवहार गरिनुपर्ने व्यवस्था छ ।

तर, देशकै नमुना भनिएको गाउँपालिकाले आफ्नै अधिकांश महिला कर्मचारी, गर्भवती र सुत्केरीप्रति गरेको निर्णयले बालमैत्री शासन व्यवस्थाको खिल्ली उडाएको हो । बाल सहजकर्ताहरूले वडा तहमा बाल क्लव गठन, उनीहरूको क्रियाकलापहरु सञ्चालन र रेखदेखका साथै वडा कार्यालयहरूमा पन्जिकरण र उपभोक्ता समितिहरूका काममासमेत सहजीकरण गर्दै आइरहेका थिए ।

प्रकाशित मिति: बुधबार, माघ ५, २०७८ ०९:२०