उप-प्राध्यापक प्रेम चलाउनेमाथि आक्रमण गर्नेहरू मुद्दा फिर्ता गराउने चलखेलमा

उप-प्राध्यापक प्रेम चलाउनेमाथि आक्रमण गर्नेहरू मुद्दा फिर्ता गराउने चलखेलमा

A+ A A-

त्रिभुवन विश्वविद्यालयका उप-प्राध्यापक प्रेम चलाउनेमाथि आक्रमण गर्ने समूह मुद्दा फिर्ता गराउने प्रयासमा लागेको छ ।

उप-प्राध्यापक चलाउनेमाथि त्रिविका विद्यार्थी योगेन्द्र रावल, हरिप्रसाद आचार्यसहित पाँच जनाले त्रिवि परिसरमा आक्रमण गरेका थिए । आफूमाथि आक्रमण गरेको भन्दै चलाउनेले रावल, आचार्य, दिपकराज ओझा, रुपेश शाह, रविन कुमार लामा, निरज राना मगर र सयुज श्रेष्ठविरुद्ध ज्यान मार्ने उद्योग अन्तर्गत मुद्दा दायर गरेका थिए ।

चलाउनेको मुद्दामाथि सुनुवाइ गर्दै २३-२६ कात्तिकको अवधिमा काठमाडौं जिल्ला अदालतका न्यायाधीश अम्बिकाप्रसाद निरौलाको एकल इजलासले मुख्य अभियुक्त दुई जनालाई जनही ५५ हजार तथा अन्यलाई जनही ३०, ३५, ५० हजार रुपैयाँ धरौटीमा छोड्न आदेश दिएको थियो । उक्त आदेश बदरको मागसहित उच्च अदालत पाटन पुगेका थिए, चलाउने ।

उच्च अदालत पाटनले १३ फागुनमा मुख्य अभियुक्त नेपाल विद्यार्थी संघका नेता हरि आचार्य र योगेन्द्र रावलसहित ६ जनालाई जनही ५ लाख धरौटीमा छोड्न आदेश दिएको थियो ।

विचाराधीन अवस्थामा रहेको यो मुद्दा फिर्ता गराउन रावल, आचार्य, ओझा, शाह, लामा, मगर र श्रेष्ठले काठमाडौं जिल्ला प्रशासन कार्यालयमा निवेदन दिएका छन् । कांग्रेसको भ्रातृ संगठन नेपाल विद्यार्थी संघका नेता समेत रहेका मुख्य अभियुत्त आचार्य गृहमन्त्री बालकृष्ण खाँणकै क्षेत्रका हुन् । उनीहरूले जिल्ला प्रशासन कार्यालयमा फौजदारी मुद्दा फिर्तासम्बन्धी मापदण्ड २०७१ र फौजदारी कसुर सजाय निर्धारण तथा कार्यान्वयन ऐन २०७४ को हवाला दिँदै मुद्दा फिर्ता हुनुपर्ने निवेदन हालेका हुन् ।

सरकारवादी रहेको मुद्दा फिर्ता हुन जिल्ला प्रशासनमा परेको निवेदन गृह मन्त्रालय पुग्छ । त्यसपछि गृह मन्त्रालयले महान्यायाधिवक्ता कार्यालयसँग सल्लाह गरेर मन्त्रिपरिषद् बैठकमा पेस गर्छ । मन्त्रिपरिषद्‍ले मुद्दा फिर्ता गर्ने/नगर्ने निर्णय गर्छ । तर, फौजदारी अभियोगका मुद्दा फिर्ता गर्न पीडित र अदालतको पनि अनुमति लिनुपर्छ ।

विश्वविद्यालय परिसरमा भएको आक्रमणमा अर्धचेत भएका चलाउनेको दाहिने खुट्टा भाँचिएपछि अपरेसन गर्नुपरेको थियो ।