पीएम कप क्रिकेटको फाइनलमा एपीएफ र पुलिस भिड्‌ने, एपीएफका बमको कीर्तिमानी अर्धशतक

पीएम कप क्रिकेटको फाइनलमा एपीएफ र पुलिस भिड्‌ने, एपीएफका बमको कीर्तिमानी अर्धशतक

A+ A A-

काठमाडौंमा जारी पीएम कप राष्ट्रिय टी ट्वान्टी क्रिकेट प्रतियोगिताको फाइनलमा दुई विभागीय टिम नेपाल पुलिस क्लब र सशस्त्र प्रहरीको एपीएफ क्लब भिड्‌ने भएका छन् । मंगलबार भएका सेमिफाइनल खेलमा पुलिसले बागमीतलाई र एपीएफले आर्मी क्लबलाई पराजितत गर्दै उपाधि भिडन्त पक्का गरेका हुन् ।

त्रिव मैदानमा भएको सेमिफाइनल खेलमा एपीएफले त्रिभुवन आर्मीलाई ४७ रनले पराजित गर्दै फाइनलमा पुलिससँगको भिडन्तलाई पक्का गरेको हो । पहिला ब्याटिङ गर्दै एपीएफले आर्मीलाई २ सय ३१ रनको विशाल लक्ष्य दिएको थियो । जवाफी ब्याटिङ गरेको आर्मी १ सय ८३ रनमै सीमित भयो ।

आर्मीका लागि राजेश पुलामीले २१ बलमा सर्वाधिक ३८ रन बनाए । भिम सार्कीले १९ बलमा ३५ रनको आकर्षक ब्याटिङ गरे पनि टिमलाई जित दिलाउन सकेनन् ।

एपीएफका लागि शरद भेषावकरले सर्वाधिक तीन विकेट लिएका थिए । अविनाश बोहरा र भुवन कार्कीले दुई–दुई विकेट लिए ।

यसअघि पहिला ब्याटिङ गरेको एपीएफले निर्धारित २० ओभरमा २ विकेट गुमाउँदै २ सय ३० रनको विशाल स्कोर बनाएको थियो । एपीएफका लागि आसिफ शेखले सर्वाधिक ८४ रनको बनाए भने लोकेश बमले ६६ रनको योगदान दिए । यस्तै प्रदिप ऐरीले ५७ रन बनाए ।

आर्मीका जितेन्द्र मुखिया र सुमित श्रेष्ठले एक–एक विकेट हात पारे ।

लोकेश बमको विस्फोटक ब्याटिङ

एपीएफका लोकेश बमले त्रिवि मैदानमा कीर्तिमानी ब्याटिङ गरेपछि एपीएफले २३० रनको विशाल स्कोर बनाएको थियो । १६ ओभर ४ बलबाट खेल्न मैदानमा आएका बमले सुरुदेखि नै विस्फोटक ब्याटिङ गरे । जितेन्द्र मुखियाको चौथो, पाँचौ र अन्तिम बलमा बमले लगातार छक्का प्रहार गरे ।

त्युपछि बमले १८ औँ ओभरमा १ छक्का र एक चौका प्रहार गरे भने १९ औँ ओभरमा जितेन्द्र मुखिया फेरि उनको निशानामा परे । मुखियाको यो ओभरमा पनि उनले लगातार ३ छक्का प्रहार गरे । २० औँ ओभरमा सुशान भारीलाई चौका प्रहार गर्दै १४ बलमा बमले अर्धशतक पूरा गरे । यो एपीएम कपको फास्टेस्ट शर्धशतक हो । बमले १८ बल खेल्दै ६६ रन बनाउँदा ९ छक्का प्रहार गरे ।

सुदूरपश्चिमका बमले यू १९ बाट नेपालका लागि खेलिसकेका छन् । नेपाल क्रिकेट संघले बन्द प्रशिक्षणमा राखेका ३० जना खेलाडीमा बम भने समेटिएका छैनन् । तर, मंगलबारको उनको ब्याटिङले छनोटकर्ताको ध्यान भने तानेको छ ।

प्रकाशित मिति: मंगलबार, माघ ४, २०७८ १८:०५