दोस्रो विवाह पनि सफल नभएपछि 'महाभारत'का भगवान श्रीकृष्ण भन्छन्- विवाहको मामिलामा भाग्यशाली भइनँ

दोस्रो विवाह पनि सफल नभएपछि 'महाभारत'का भगवान श्रीकृष्ण भन्छन्- विवाहको मामिलामा भाग्यशाली भइनँ

तस्वीरः लाइभहिन्दुस्तान डटकम

A+ A A-

बहुचर्चित टेलिश्रृंखला 'महाभारत'मा भगवान श्रीकृष्णको भूमिका निभाएका कलाकार नितिश भारद्वाजले विवाहको मामिलामा आफू भाग्यशाली नभएको टिप्पणी गरेका छन् ।

दोस्रोपटक सम्बन्धविच्छेद गरेका नितिशले बम्बे टाइम्ससँग कुरा गर्दै विवाहको मामिलामा आफू भाग्यशाली नभएको टिप्पणी गरेका हुन् । सम्बन्धविच्छेदका बारेमा उनले आफ्नो अनुभव बताएका हुन् ।

नितिशलाई उद्धृत गर्दै लाइभ हिन्दुस्तान डटकमले लेखेको छ, 'मैले सेप्टेम्बर २०१९ मा मुम्बईको फेमिली कोर्टमा सम्बन्धविच्छेदका लागि निवेदन दिएको छु । हामी किन छुट्टियौँ भन्ने कारणतर्फ जान चाहन्न । म केवल यति भन्न सक्छु कि सम्बन्धविच्छेद कहिलेकाँही मृत्युभन्दा बढी दर्दनाक हुन्छ ।'

विवाहको मामिलामा आफू भाग्यशाली नभएको टिप्पणी गर्दै नितिशले विवाह टुट्नुका अनेकौँ कारण हुनसक्ने बताएका छन् । 'जब परिवार टुट्छ तब सबैभन्दा बढी नोक्सान सन्ततीलाई नै हुन्छ । त्यसैले उनीहरूलाई कम नोक्सान पुगोस् भनेर सोच्ने जिम्मेवारी आमाबाबुको हो ।'

नितिशले दोस्री पत्नी स्मिता गाटे चन्द्रासँग पनि सम्बन्धविच्छेद गरेका छन् । विवाहको १२ वर्षपछि स्मितासँग छुट्टिएपछि नितिशले सम्बन्धविच्छेदलाई सबैभन्दा बढी पीडादायी भनेका हुन् ।

नितिशको यो दोस्रो सम्बन्धविच्छेद हो । सन् १९९१ डिसेम्बरमा नितिशले मोनिसा पाटिलसँग पहिलो विवाह गरेका थिए । तर, सन् २००५ मा नितिश र मोनिसाको सम्बन्धविच्छेद भयो ।

मोनिसासँग सम्बन्धविच्छेद भएको तीन वर्षपछि अर्थात् सन् २००८ मा नितिशले स्मितासँग विवाह गरेका थिए । तर, सन् २०१९ मा स्मितासँग पनि उनको सम्बन्धविच्छेद भयो ।

प्रकाशित मिति: मंगलबार, माघ ४, २०७८ १७:३१